هزيمة أبو الهل من هلال التبلدي عادية جداً فالفارق الفني والخططي والتكتيكي كبير جداً. هلال التبلدي عمل في صمت الا من تصريحات ابراهومة التي تحققت وهلال ام صفقا عراض لا يتفوق على هلال الابيض الا اعلامياً هلال التبلدي ماعندو ناطقة تبرر وتشرح عندو بيان بالعمل وكلو زول يفهم بي طريقتو شخصياً فهمت حاجات كتيرة فهمت انو الديسكو شاطر فهمت انو صائد البطولات بالمواسير ما بصيد ياجيبوا للراجل سنارة وصارقيل يا اسمحوا للراجل بالرحيل فهمت انو شيبوب مقلب مشروب وفهمت انو شيخ موكورو افضل من عشرين شيبولا لكن الارزاق بيد الله وفهمت انو حظ العمايا ضارب هدف هلال ام صفقا عراض الاول حظ عمايا ساكت كورة جات للعم سام (سادومبا) داير يثبتها قلشت منو مشت لعزيز دنيايا شيبولا الماسوره هدف قلشت رجعت لمدافع التبلدي جلاها جات للعم سام صدفة والمعلق يكورك شيبولا لي سادومبا على طبق من ذهب تقلش ويقولوا ليك باص قون يعني النتيجة كده اربعة واحد ابراهومة داير يدخل المهاجم الخامس عشان يجيب القون الخامس مسكوهوا مسك جنيت يا ديسكو؟ داير تفرتقهم! الاسمنت الكبوهو ده الببيضو ليهم منو؟ برغم انو مكسيم قام بمهمة البيض دي ايها الناس الناس ديل ماعندهم شيء بتكلموا ساااااكت بتكلموا ساسا قالوا الاعتماد على الاشبال وبمراجعة التشكيلة نلاحظ الآتي مجموع اعمار مساوي واتير وكاريكا وبشة والشغيل وسادومبا وفداسي ومكسيم وشيبوب يساوي تلتمية وخمسين سنة قول مساوي واتير وكاريكا وبشة والشغيل في اربعين اجمالي دي ميتين سنة عمك سادومبا بالميت كده خمسين والله ولا من محلها كده ميتين وخمسين سنة فداسي ومكسيم الواحد ما بقل عن اربعين لكن قول الجوز بي سبعين كده تلتمية وعشرين سنة فضل كم من التلتمية وخمسين!!! تلتين! التلتين شيبوب لو رموهوا في الواطه بجيبها وفطومة تقول لينا أشبال وحاة الحلف يا فطومة ناسك ديل فيهم كتااار اكبر منك لكن تعال بهناك وشوف الصغار اكبر زول في التشكيلة ضفر لي اسي شنبو ما قام كويس عين الحسود فيها عود ايها الناس ليس الخبر ان يهزم هلال التبلدي الهلال الوصيف ولكن الخبر ان يفوز هلال ام صفقاً عراض على هلال التبلدي ولكن تلك الخسارة يجب ألا تشغلنا عن العمل الجاد الذي نقوم به لياقيا ومعنوياً وفنياً اما مساندة الجماهير فيجب ان تتواصل بشدة ورقابة المجلس والاعلام لي ناس يخطئ ولا يظلم ديل يجب ان تتم بدقة عبر قوقل ففريق الشيوخ اخوان ساسا بات في امس الحاجة لاخطاء التحكيم ومعنوياً يحتاج لخطأين تلاته امام مريخ نيالا ليمسح اثر التبلدي من على جبينه ولكن هل مريخ نيالا مقطوع من شجرة؟ لو مقطوع من شجرة تبلدي ما ظنيتو بتفوت عليهو اخطاء التحكيم نيالا دخلت التاريخ بالتمثيل في الممتاز فهل تقبل بالخروج من التاريخ بتمثيلية عنوانها يخطئ ولا يظلم؟ الرأي عندي التمنية وعشرين عضو مجلس بتاعننا ديل يتفرغوا للكورة الجاية اي خطأ قرار المجلس يصل الاتحاد العام واجهزة الاعلام قبل ان تصل للخرطوم الطائره التي تقل الحكام ايها الناس لا توجد مباراة ساهلة في طريق المريخ بالدوري يقابلنا من يريد ان يتفادى دائرة الخطر ومن يريد ان يتقدم من منطقة الوسط ومن يريد ان ينافس على المراكز المتقدمة وابو الهل الذي يريد ان يتمسك بموقعه الطبيعي وصيفا لنا لذا نعمل حسابنا في اية مباراة ولا يصيبنا الغرور لاننا قد نقابل المحرش المحرش ده بالذات مفروض نفرتقوا فرتيق ايها الناس شكر خاص لشفوت نيالا مقدماً ويا اخوي يا حسبو احسبوها صاح تاني مافي حردان مافي عمك حسبو شتت قصبو الجاييكم تمساح والزول قال للتمساح لمن عرفت انك بتبيض سقطت من نظري ارضية يا حسبو وخلوا الباقي علي التمساح ايها الناس ان تنصروا الله ينصركم اها نجي لي شمارات والي الخرتوم كان شفت يا والينا زمان المطرة بتجينا بي ضبابينا اسي المطرة مسكلت لينا وزاغت مننا وملتنا ضبابينا نرش الضبان ده ولا مربياهو الحكومه لينا!!! سلك كهربا ننساك كيف والكلب قال ضبان وباعوض وجقور ومجاري ضاربة وخضار مفروش على الارض وفواكه في الزلط وخيران مقفلة ومخازن وسط الاحياء السكنية… اجدادنا القدماء لو شافوكم بخجلوا ليكم والى لقاء سلك
