أنا لا أثق في حمدوك وحكومته. ودي هي المشكلة الجوهرية. ودي البتخلي أي حاجة مشكلة. ما عارفك اتعهدت للاسرائيليين بشنو، ولا عارف تفاصيل اتفاقك معاهم، ولا انت عندك رغبة توريني. وفي قصة رفع الدعم ما عارف حتعمل بالقروش الحتتوفر شنو وفي ياتو جدول زمني؟ والتنازلات الحتقدما الحكومة شنو؟. فأي قرار تقوم بيو حكومة غير مستحقة للثقة زي دي هو غلط ومرفوض، حتى لو كان نظريا كويس. لأنها بتعملو بالطريقة (الحمدوكية) القايمة على الخداع والالتواء والاستخفاف بالمواطنين. ومافي في تاريخ السودان حاكم سوداني او اجنبي اتعامل مع السودانيين بي ربع الحقارة واللامبالاة اللي اتعامل بيها معاهم هذا الحمدوك. احتمال ان يكون الغرض من رفع الدعم هو توفير أموال لصفقة سلاح غربي أعلى من احتمال توفير ميزانية للتعليم او البنية التحتية او الصحة. خاصة أن الأصوات الحكومية (غير الرسمية) تتحدث عن توفير الدعم لتطوير القطاع الصحي وفي نفس الوقت تضغط الحكومة في اتجاه رفع الدعم عن الدواء، وباستخدام أسلوبها المفضل وهو خلق ندرة قاتلة تجعل المواطنين يقبلون بأي ثمن مقابل مجرد توفر الدواء. الحكومات البترفع الدعم بكون عندها خطة جاهزة بتاعة أنفاق تنموي بجداول زمنية صارمة للتنفيذ، وقبل كده بتبدأ بي نفسها وبتقلص ميزانيتها هي، بتقلص الإنفاق على العربات والعقارات الحكومية وبتقلل ميزانيات التسيير وبتلغي حوافز وتخفض أجور الدستوريين .. الخ ودا كلو ما حصل عندنا. بل الحكومة كانت قالت إنو رفع الدعم حيكتمل خلال سنتين، وأسي نفذتو بالكامل وبدون أي بدايل وتعويضات. فهل دي حكومة زول عاقل يثق فيها أو يدعمها او ينتظر منها أي خير؟
