بسم الله الرحمن الرحيم كان يا مكان ...في حديقة الحيوان محمد عبد المجيد أمين. [email protected] (1) (نص مسرحي للقراءة فقط) الاجتماع الأول الزمان : مع الغروب المكان : حديقة حيوان الخرطوم ( قبل ترحيلها) الشخصيات : كل حيوانات الحديقة ( خيوط الظلام تنسل علي أنحاء الحديقة، بعد يوم شاق من الضجيج والمشاحنات والمماحكات بين طاقم الادارة ولجنة الجرد الحكومية التي أتت لجرد محتويات الحديقة تمهيدا لاغلاقها بشكل نهائي وترحيل الحيوانات منها تمهيدا لتسليم قطعة الأرض لمستثمر أجنبي يقال أنه سيبني فوقها شواهق وناطحات. كانت المشكلة الأهم لادارة الحديقة ليس تسليم الموقع وانما أين سترحل كل هذه الحيوانات. اللجنة تقول انها ليست معنية بهذا الأمر وأن ذلك من اختصاص ادارة حماية الحياة البرية. ولكن الخبر الأهم الذي تسرب أن دولة مجاورة قد طمعت في هذه الأرض وأرادت أن يكون لها بعض الحضور السيادي في قلب العاصمة ، امعانا في المكايدة، فعرضت شراء قطعة الأرض نظير دين مستحق علي الدولة. أنفضت اللجنة وتأهب طاقم الادارة والعمال للانصراف ، مغلقين أبواب الحديقة وراءهم، تاركين حل كل هذه المشاكل للحيوانات. بعد قليل تطلق كل الحيوانات صرخة احتجاج عالية كانت في الحقيقة تسبيحا للمولي الخالق، أما الثانية فكانت صرخات احتجاج علي هذا الانسان العجيب في هذا البلد) الأسد : ( بعدما يزأر زئرته الشهيرة) دقي يامزيكة ..... لحكومة البولوتيكا... باقي الحيوانات : ( بصوت واحد) حديقتنا شلعوها...... أقفصنا دمروها. تراثنا وبعثروه....... تاريخنا وحرفوه خيراتنا وبددوها....والأرض أفسدوها دينا.... ولعبو بيهو...ووطنا ... مزقوه الفيل : ( يرفع خرطومه) سلام مربع لكل الدقسين .... وسلام كبير لكل الخايفين باقي الحيوانات : ( بصوت واحد) عزه في هواك..... عزه نحن الجبال... الثعلب : ( مقاطعا باقي الحيوانات ) .... عليكم الله ما دايرين مشاكل .... مالنا نحنا ومال البشر .... ومشاكل البشر الناس ديل أفهم مننا ... وعارفين خلاصهم . النمر : ( مستوضحا) ناس منو يا مكار .... تقصد اللي دايرين يبيعونا والا اللي كانو بتفرجو علينا ؟. الزرافة : ( تتدخل ) والله كان علي .... ورقبتي مادة لفوق .... شايفة انو الحكومة دي شركة خاصة اصحابها كلهم مجيهين ...قالو البلد دي حقتهم ودايرين يبيعوها قطعة قطعة.... والناس الفيها .... عبيد ... عبيد. ما يستحقو العيش وسط الأسياد...حتي نحنا خاشين في البيعة..ما لنا نحنا ومالهم.... ديل ناس في بعضهم ونحنا حيوانات ساكت... خلوها مستورة. المها : ( للزرافة محتجة) كلام شنو ده يالزرافة يا خويتي ... العبيد ديل عباد الله ... ما تنضمي ساكت. الزرافة : ( للمها) العبيد ديل كانوا بالحق عباد الله لمن كانوا بيخافوه... هسع بقو يخافو من اسيادهم .. وماشيين زي الألف....... ماهو \" الرزاق\" عندهم اتغير. النسناس : ( يقوم بحركات بهلوانية) بركاتك ياريس .... بركاتك يا أمير... الهوبة دي علي حسابي ... وكان داير نوم العذابة ....نوريك البضاعة( يرقد علي بطنه ويرفع مؤخرته)...وسلم لي علي القبيلة..... وكان داير نطيط وشقلبة أنا جاهز سعادتك. وكان داير هتيفة .... نحن جاهزين. مجموعة النسانيس: ( تهتف معا) .........هي لينا.....هي لينا الحضر.... والبادية وكل المدينة. القرنتية : ( بدهشة ) معقول!! .... اتخلو عنا بالسهولة دي... وأنا كت رمز الوطن الحمار الوحشي : ( مستهزأ ) الكلام ده كان زمان ... زمان....في الزمن الجميل ....( يتنهد مسترسلا) أنتي لسه فاكرة ياقرنتية؟ الشعار بقي هسي\"كوز\" ملصق في عربية \" همر\". قرد 1 : ( متحيرا) ونحن .... حا يودونا وين ... ناس البلد دي عاشرونا وعاشرناهم. قرد 2: ( مكملا) ....ضحكونا وضحكناهم.... هسع اللي حايجيب لي فول الحاجات والترمس منو؟!. الشمبانزي : (للقرد رقم 2) علي الطلاق راسي خرمان وكايس لي سيجارة... ما تولع ياجنابو؟. النعامة : ( لباقي الحيوانات) يعني يا جماعة يرحلونا كده ويفرتكونا ..وما يخدو رأينا ... لعبة نحنا والا لعبة؟. الهدهد : ( فجأة) الشليل وينو ؟ مجموعة الطيور: ( بصوت واحد).... أكلو الدودو التمساح : السودان وينو؟ التماسيح( بصوت واحد) حرام في بطونا...كر كر كر الأسد : ( لباقي الحيوانات) اسمعوا ياجماعة .... نحن نقدم عريضة للجهاز القضائي .. وهو يجيب لينا حقنا .... موافقون؟ ( باقي الحيوانات تضحك).... كر كر كر القرنتية : ( لباقي الحيوانات) أنا أعترض.....أخير نمشي المحكمة الدستورية. ( باقي الحيوانات تضحك).... كر كر كر. الدب : ( مقاطعا ) رأيكم شنو نشتكي للدب الأكبر .... أمكن يجيب لينا حقنا؟ كل الحيوانات( بصوت واحد)... كضبا كاضب الهدهد : ( لمجموعة الحيوانات) أقول ليكم قولة : نحنا ما نشتكي ل \" الله \" ونريح نفسنا كل الحيوانات( بصوت واحد) ..... موافقون :...... يارب السلحفاة : ( لمجموعة الحيوانات) عفارم عليكم ... الشكوي لغير الله مذلة .... والمذلة محوطانا من كل الجهات...... يارب. الظبي : ( لمجموعة الحيوانات) وكت ما اخترتم الخيار الصاح ... نقرا الفاتحة ( مجموعة الحيوانات تسبح بالطريقة التي علمها لها ربنا). الأسد : ( لباقي الحيوانات) .... عديلة ..... نخش الاجتماع؟ كل الحيوانات( بصوت واحد) نخش الاجتماع ( حيوانات الحديقة يدخلون في اجتماع صامت يلوحون فيه بالاشارات لبعضهم ،منها تلك الخارجة عن نطاق الأدب ومؤكد أنهم تعلموها من الناس . يبدو أن الاجتماع سيستغرق وقتا طويلا فالأمر جلل بالنسبة لمصيرهم ولا بد أن يخرجوا برأي واحد... للننتظر). نواصل:2 ********* الدمازين في :2010/08/22م. محمد عبد المجيد أمين(عمر براق ) [email protected]