دمك يا عوضية في رقبة كل سوداني حر أسماء الجنيد [email protected] بلد هاملة هملة العدو . ماحدث امس بالديم يقشعر له بدن أي بني آدم له قلب وضمير حي ومن لحم ودم!! اي حكومة وأي بشر في العالم يستبيحوا دم شعبهم , ويقتلوه كالبهائم ؟؟ هذا لا يحدث إلا في السودان وفي عهد الكيزان !!! إليكم تفاصيل الحادثة واحكموا أيها القرآء الأفاضل في حوالي الساعة 11 ليلا مساء امس وبحي الديم .. كان عادل يجلس امام منزلهم بحي الديم مع بعض اصدقاءه .. وتزامن في تلك اللحظة مرور دورية من ناس النظام العام .. وقفوا العربية وكان عادل يتكلم في التلفون وانتظروه وبدت أسئلة غريبة له ( انت سكران ؟- قال لا ما سكران انا بتكلم في التلفون وما بسكر ابدا وبدوا في الضرب ضربوا عادل واتلمواالجيران وناس البيت وطلعت عوضية اخته من البيت مع امها يشوفوا الحاصل! تحركت عربية النظام وسط سخط الجيران وناس الشارع وبعد شوية جات عربية دورية تانية وبدت تطلق النار على الناس الاتلموا وسقطت عوضية شهيدة عوضية ماتت يا ناس عوضية مرقت تشوف اخوها كتلوها ناس النظام العام هسه الناس رجعوا من المقابر!!! إنتهى الخبر الحزين ( منقول من موقع سودانيز ) ما حدث مسؤلية الدولة كلها ، وكفاية الصمت , الصمت الدمر بلد بحالها ، الصمت الإستباح حرمات البيوت وقتل الأبرياء، الصمت الخلاهم يطلعوا في رؤوس كل الناس ويدوسوا على كرامة الشعب كلو، الصمت الخلاهم متأكدين إنه البلد دي حقتهم براااااااهم يقدلوا فيها وينهبوا ويغتصبوا ويقتلوا من طرف زولا واحد بسألهم مافي! الصمت الخلاهم بعدما كانوا بسرقوا بالدس ويقتلوا في الخفاء. كلوا بقى عيانا بيانا وعينك يا شعب, ولا على كيفك . وكراعك في رقبتك تقبل بي حكمنا وجبروتنا ولا تلحس كوعك !!! ده الصمت !! الليلة قتلوا عوضية قدام بيتها بي بندقية عسكري أمن هلفوت ما بخاف ربه , روح بريئة راحت في لمح البصر غدر وخيانة , وهذا العسكري وراه ضهر قوي ، وراه ثعالب مكارة ووراه رأس حية من تحت تبن ، وراه جيش اوباش يتحكم في كل الشعب ، وكل ما رفعتوا رأسكم هو فأسكم ، وده كلو بسبب الصمت والسكات على الظلم والغدر والجبروت من حكومة وضعت حجر اساسها في ضهر الشعب ، واصبحت تدوس عليه وعلى كرامته كل يوم، وتقتات من دمه وعرق جبينه ومن قوت عياله ، عايشة ومستمتعة بي حق الغلابة ، بي حق صحتهم وعلاجهم .. شوكتها وعينها قوت من صمته وخنوعه وهوانه !!! ماذا تتوقعون ايها الشعب الممكون وصامت من هؤلاء البشر عديمي المروءة والآخلاق ؟؟؟ واصلوا صمتكم والجاي اعظم وافظع ,, حسبي الله ونعم الوكيل متاوقة دم عوضية في رقبة اي سوداني حر ، وعوضية هي ام واخت كل سوداني قلبه حار جيبوا تارا يا رجال الحارة ، ولا دقوا النقارة وخلوا الحريم تمرق والرجال تضارا !!! .... يمهل ولا يهمل
