[email protected] تصوموا وتفطروا على خير يا اخى الحمد لله بكرة او بعد بكرة ستطبق العدالة الاجتماعية على الجميع الساكنين في الرياض ولا الساكنين في امبدة او الاسكان الشعبي او المنشية او الضهبانين ذي حلاتنا المهم كلنا انشا الله حنكون صائمين وبعد اذان المغرب فاطرين بس الصيام نفسه عايز تجهيز وقومة وقعدة وكمان الفطور عشان كده احتمال نتفق فقط في ساعات الصيام لا مويه لا اكل وقد نختلف فى النوعية والكم ولكن والحمد لله لأنه دخل الفرد وكما هو معلوم لدى الجميع داخل السودان وخارجه بقى 1800 دولار فتبقى المسالة محلولة ومصاريف رمضان مقدور عليها وممكن أي واحد فينا يعزم اكبر عدد من الصائمين من زمان ومش كده وبس ممكن تعزم ربيع عبد العاطى ذاتو كنوع من التلاحم الجماهيري مع اولياء الله الصالحين الصادقين واولى الامر فينا عرس جماعى يبدو ان مشكلة العوانس والعذابة في طريقها الى الحل النهائي والجذري بعد ان تم تعميم القرار الحكومي التالي (على جميع القيادات والمسئولين في الدولة وجميع ولاة الاقاليم التوجه بالدعاء الى الله في نهاية كل الخطب السياسية لمباركة العرس الجماعي واعطاء كل عريس ما يجود به الخيرين املا في ان يرزقهم الله بالبنين والبنات من اجل زيادة شريحة الصابرين في الارض والحالمين بالعيش الكريم ) وقد قال السيد محمد يوسف كبر حاكم ولاية دارفور والتي تقع غرب الولاياتالمتحدة السودانية السيد في هذا الشان ان الله يحب العبد اللحوح فيا جماعا يلا نسوو دعا حلة ملاح المهم انه والحمد لله فى باقي حبيبة سكر كانت صاراها في الكرتونة المختوتة في الدولاب طلعتو ونفضتو وشربت بيه شاي الصباح وفتشت داخل الدواب ذاته وطلعت توب المرقة الواحد وجرجرت كريعاته قاصده السوق وقفت قدام عم النور الجزار وقالتلو عليك الله ادينى ربع كيلو ومدت القريشات وفجأة قالها عم النور هوى ياخالتى زينب انت لا بتشوفي تلفزيون ولا بتسمعي راديو واظنك ما عندك ثقافة زيادة المحروقات ولا التقشف الإداري والله فريشاتك دي ما يجيبنلك عضمين احسن شوفيلك ربع عدس وخليك مؤازرة الحكومة ,وقبل ما تفوق خالتى زينب من الدهشة وقفت قدامه الكروزر الما خمج ونزل القزار القدامى بكل هدوء قدام خالتى زينب وقال ليها الشيخ من داخل الكندشة اذيك ياخالة كيفك تمام ردت خالتى زينب فى استحياء والله ياوندي الحمد لله فقال ورده ليها السيخ ياخالة اعلمى ان الله هو نصير الصابرين وفراج الكرب وعنده الارزاق وهى لله وما عندنا شيء في هذه الدنيا غير العمل الطيب وبعدها صاح شيخنا بصوت التكبير المعهود اذيك يالنور عليك الله اعمل لي خمسة كيلو ضان واثنين عجالى وشوية كبدة وجزاك اللة خير ياشيخنا , رجعت خالتى زينب والقفة فاضية تتململ بين اصابعها وفضل عقلها يدور ويبحث عن معنى قريب للتقشف يطابق الواقع والحسرة انها فتشت كل الدهاليز ولم تجد العدس ؟ عيسى حياتو يبارك بارك السيد عيسى حياتو تأهل الهلال والمريخ وأهلي شند الى مرحلة المجموعات واشاد بالكرة السودانية وتقدمها خاصة بعد ان كسب المنتخب السوداني لقائه الاخير امام المنتخب الزامبى بطل القارة الافريقية وقد قال حياتو لابد من رفع تقرير مفصل الى الفيفا بهذا التطور الوضح الذى تشهده الكرة السودانية وقد تحصلنا على التقرير وهذا نصه : الى السيد بلاتر رئيس اتحاد كرة القدم الدولي صدقني انا في حيره واقول ليك خلينى انا العالم كله محتار دولة يبلغ دخل الفرد فيها 1800 دولار ويتأهل منها ثلاثة فرق الى دوري المجموعات في الكاف وتهزم بطل افريقيا كيف يكون فيها مظاهرات هذا غير منطقي تمام كما ان القائمين فيها بالأمر كلهم من الصالحين وخلفاء للصحابة اعذرني يابلاتر قد اكون خرجت من الموضع بس المهم انت كلك نظر حليلك ياصوت الريح البكاتل في الضلمة: قالت : تصدقوا آولاد ... بقيت أبيت الليل أفكر ... في التميرات القدر .... فوق راسا ما شالت سبيط عليها الجرورة الفوق ضهرنا تنزلا تطلق ضهرنا مع الجماعة شن دهانا ؟ دي كم سنة ؟ والحال وقف جف وحلف ما فيهو من نقاط بسيط كان بي وشنا في حش التمور الليلة دوشنا مع اللقيط أي لا حكت دي ولا بقت ما كان قايلين ... في حياتنا بيجينا أقسى من المضى ساعة مروق الإنجليز... قلنا الظلم راح وانقضى تاريهو كمتر قام دقون حلفا وعُشر ... معيوقا نال دمسييس ... ضريسا حسكنيت
