مثل إنقاذي "نأكل مما نزرع!! " حكمة اليوم: لن نزل ولا نهان ولن نطيع الأمريكان .. "تفاهمات جديدة بين الخرطوم وواشنطن للتطبيع" (1) اجتماع مطول مع الرئيس ونائبه يعيد المتعافي للوزارة !! لسان النائب يقول للبشير رجع لي حبيب الغائب ليهو شهور !! عارف الشلغة من غير المتعافي ما ماشه ... تمشي كيف الراجل البضحك برا شغلة مافي .. هي شئ غطس حجر الزراعة في السودان ده غير المجاملات دي مافي .. شئ غطس مشروع الجزيرة غير الإنقاذ دي مافي .. يعني اسي المتعافي رجع .. حترجع العافية للزراعة .. المشكلة يا أخوانا مافي المتعافي ولا زيد وعبيد المشكلة في سياسات الحكومة من رئيسا لأخر زول .. ومشكلة الشعب السوداني ما مع البشير ولا غيرووو .. المشكلة مع نظام كامل ومؤسسات إجتماعية وإقتصادية وأمنية وعسكرية .. يعني القصة ما قصة وزير رجع وزير زعل .. هو السياسة من ما يتعاملوا معاها بالعواطف دي تبقى ونسة ساكت.. (2) غيابك طال... جعفر الميرغني.. طبيعي ولا حردان؟! البلد دي ما تقدر تفهم ماشه كيف .. اسي عليك عينة الزول ده البزعلوا شنو .. انا لو في محلو ما بزعل لانو أرتضيت أني أكون جزء من اللعبة المسخ دي واشارك الحكومة وابقا مستشار رئيس، البلد دي أزمتا دائماً قياداتها يتلاعبوا بأسم الشعب، لصالح مصالحهم الشخصية . الزعلان كلموا اليقع الخزان .. والخزان كان عربات الجيش ! (3) نيابة الثراء الحرام تحقق في بلاغات استغلال نفوذ!!! دي خطوة كويسة لكن اي تحقيق في البلد دي بطلع فشوش لما يصطدم بالجماعة الكبار ! ومافي داعي لذكر الأسماء .. لانو الثراء الحرام بقا واضح في الكروش الحائمة دي.. ولا داير إثبات ولا داير جوطة .. يعني الواحد يعينو معتمد بكره تجي تلقا بقا حاجة تانية مالي ليهو جلابية التقول شوال قطن، وديك يا الفشخرة .. حتى موقعوا الإجتماعي بتغيير من زول هلفوت ساي لي زول مسؤل وده كلو من خير الحكومة دي .. يلبسوا على حساب الشعب ويشبعوا على حسابو .. وكروشهم تكبر على حساب المساكين وأموالهم التي تجلب كضرائب وزكاة ونفايات ومرور وووو القصة ما عندها نهاية . غايتو الجرائد تكتب والشكر لحماد .. لافي محاسبة ولا مال عام برجع يعني الحكاية ونسة ساااااكت. (4) المالية: اكتفاء ذاتي من البترول العام 2014م!!! الكذاب حصلوهو سنة 2014م .. بالله البترول ده من التسعينات طالع ما أكتفينا منو دايرين نكتفي منو في سنتين يعني !! قولوا كلام يتصدق ياخي .. جالون البنزين بي 30 جنيه وبرضو تقول لي حنكتفي منو؟؟ العبرة ليست بالإكتفاء ولكن سعرو حيكون كم .. زمان البشير قال في خطاب جماهيري أنو البترول طلع والشعب السوداني كلو حيركب عربات .. طلع البترول والشعب السوداني ركب التونسية .. وبقا يتكلم براهو في الشارع الجاز غالي والغاز غالي والبنزين غالي .. ومن وحي ده بقينا نغنين " غالي علي يا يمة غالي علي حبيبي" (5) الأمطار تحدث أضرارًا بمحلية أم روابة : عدد الأسر التي تضررت بمنطقة الغبشة المحطة بلغ (232 ) أسرة الي جانب 8 فصول بالمدارس الثانوية بنين وبنات وانهيار سور المدرسة الثانوية بنات وسبعة فصول وسور مدرسة البنات الأساسية وانهيار جزئي في المراكز الصحية،بينما بلغ عدد الأسر المتضررة بمنطقة الغبشة بدين( 269) وبمنطقة السقاية( 286 ) أسرة الي جانب ثمانية فصول وأربعة مكاتب . حتى المنازل بقت ما راضية تعيش في زمن الإنقاذ .. والإنسان يغالب هذه الظروف بالصبر على هؤلاء إلى متى يصل الناس أن تغيير الأوضاع شئ حتمي !! لأن الوقت لا ينتظر . (6) العمال بمناطق التعدين بالبطانة بعملون في بيئة سيئة تفتقر لأبسط مقومات السلامة وإنعدام الخدمات الصحية بالرغم من أن السلطات تتحصل رسوم تطلق عليها رسوم خدمات . جدير بالذكر فقد أدى إنهيار بئر " منجم صغير" إلى إصابة ما لايقل عن 5 حمال وفاة واحد !! انتو موت لي موت ما تجوا تموتوا دواس مع الحكومة دي .. اقل حاجة هنا في فرصة أنك تمشي الحوادث وحاجات من هذا القبيل .. (7) اتجاه بالبرلمان لتشكيل لجنة فنية لفحص كل الطائرات بالسودان!! ده برلمان شغال بنظرية أعمل شنو في ريدك أكتر من العاملوا .. بعد ما تحصل الكارثة يجبو عشان ما يبرروا الكارثة يشكلوا لجنة واللجنة تنبثق منها لجان فرعية والقصة تبوظ وتخستك.. هو بالله السودان فضل فيهو طائرات .. عن تفحصوها.. عليكم الله أفحصوا عقولكم دي ياخي .. شفوها شغال ولا متعطلة ولا لا يمكن الوصول إليها، غايتو لو فيها كبده كانت فكرة أحسن من كده ياخي .. ثمن عامود : بعد سقوط طائرة تلودي .. أعتقد بأن مطار الخرطوم سوف يصبح مطاراً للطير وليس للطائرات .. فالمطار لم يتبقى منه شئ سوى الأسلاك الشائكة .. آخر العامود: الشقة المفروشة في موسم العيد بقيمة (120) جنيه لليوم .. بالإضافة إلى فاتورة الكهرباء .. يعني حتحصل حوالي (150) جنيه من غير أكل ولا شراب ولا اي حاجة .. بينما في مدينة أسمراء إقامة يوم كامل في فندق متوسط بما يعادل (50) شاملة لوجبة الفطور .. كل العرسان في السودان يذهبون إلى أسمراء لقضاء شهر العسل .. ده الكلام ولا بلاش يوم في السودان يساوي ثلاثة ايام في أسمراء الساحرة .
