[email protected] الكثير من القراء (خاصة أبنائي على موقعي بالفيسبوك) يطلبون من العبدلله أن يرفق (بي نفسو شوية) وما (يحرق دمو ساااكت) خاصة وهو زول بتاع (قلب) و(تصلب شرايين) وينسى حكاية (خط هيثرو دى) بإعتبار إنو (المسألة عايرة) وما بقت (على دى) وهنالك الكثير من ملفات الفساد التي تمتلئ بها أدراج الجهات العدلية والتي لم نسمع يوماً واحداً أن أصحابها قد قدموا للعدالة . غير أن العبدلله عندو (فهم تاني) فقصة سرقة هذا الخط الجوي تختلف تماماً عن اي قصة فساد آخر ويكمن الإختلاف الجوهري في إنها وااااضخة وثااابتة وما عاوزه ليها دليل .. يعني مش ذى (التقاوى) واحد يقول ليك (نسبة الإنبات) عالية وواحد يقول ليك (لا منخفضة) والتالت يقول ليك فيها (فطريات) والرابع يقول ليك ما عارف شنو داك ! خط وإتسرق وإتباع .. والجهة التي قامت بشرائه (معروفة) .. قضية ما عاوزة (المحقق كونان) وممكن لأصغر (متحري) أن يكمل تحرياته فيها في أقل من (شهر) بالكتير .. يعني هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى)؟ لكن يبدو أن الجهات الممسكة بملف القضية عندها فهم تاني إذ مرت على الموضوع سنين عددا ولم يبت في الأمر ولم يقدم شذاذ (الأجواء) هؤلاء الذين قاموا (بتنفيذ هذه السرقة) إلى القضاء .. لجان تحقيق تقوم ولجان تحقيق تقعد (تحقيقات برج التجارة العالمي ما أخدت وكت قدر ده) ، هسه الموضوع ده عاوز ليهو سنين عشان (ينعرف؟) هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟ والظريف في الموضوع كل خمسة ستة شهور يقوم مسئول يصرح بأنو (التحقيق لسه ما إنتهى) حتي جاء ذلك اليوم الذي صرح فيه السيد وزير الدولة بالنقل (فيصل حماد) بأن التحقيق قد إكتمل وذلك في خبر نشر بصحيفة الصحافة بتاريخ 17 يونيو الماضي (يعني قبل شهرين ونص) بعنوان (وزير الدولة بوزارة النقل : إكتمال التحقيقات في بيع خط هيثرو) والخبر يقول : (اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيعه) بعد تصريح السيد وزير الدولة بالنقل تنفس العبد لله الصعداء كما شاركة التنفس أفراد الشعب (الفضل) ولسان حال الجميع يقول (أخيراً سوف نسترد خط ناقلنا الوطني) تنبيه : أيها القارئ الكريم (قوم أخد حبوبك وخليك ريلاكس) وتعال (واصل) عشان تقرأ معاي آخر التصريحات وهو للسيد أوشيك محمد أحمد رئيس لجنة النقل بالبرلمان بعدد الأمس (2 سبتمبر)من صحيفة ألوان (يعني بعد شهرين ونص من تصريح الوزير بأنو التحقيقات إنتهت) والذي جاء بعنوان (توقعات بإنتهاء التحقيق حول خط هيثرو خلال أيام) حيث جاء في الخبر ما يلي : ( كشف رئيس لجنة النقل بالبرلمان أوشيك محمد أحمد عن إقتراب الفراغ من التحقيق حول خط هيثرو المفقود ورفض أوشيك الخوض في الحديث حول هذا الخط وقال أن عمل لجنة التحقيق شارف على الإنتهاء وأنه خلال اليومين القادمين ستظهر نتائج التحقيق حول هذا الأمر) ! يعني وزير الدولة بالنقل كان مفتكر التحقيق إنتهي .. والعبدلله إفتكر التحقيق إنتهى .. وإنتو إفتكرتو التحقيق إنتهي .. وأتاريهو التحقيق لسه ما إنتهى ... ده نحنا طلعنا أي كلام يا جدع !! كسرة : سؤال لعلمائنا الأماجد : هل هذه سرقة (حدية) أم أن (ثمن) الخط (أقل من النصاب)؟ كسرة ثابتة : أخبار ملف خط هبثرو العند النائب العام شنو(ووو ووو ووو)؟
