شعر : صديق ضرار [email protected] كتبت العام 1994 م . وأنا الآن أنشر غسيلهم الفل وبقيت براكا حدا الأسد . . الشعب قصدك كله جد أفيال تخاف قحة شبل . . وانت بتعوعى قصد أسد جعلوك إمام والصولجان . . موصول بإيدك ومنعقد سنو الشريعة مضللين . . يفتى الترابى ويجتهد قانون حماية المفسدين . . لا ليه حجة ولا سند محروس بأمن المجرمين . . ومنو البنازع وينتقد قلنا ليك إتنازل أمان . . نصحوك وقالوا كلام حسد ملوا ليكا راسك بالهوس . . ومشيت تبرطع فى البلد جريت حريمنا من البيوت . . لدفاعك الشعبى النكد ماختيت عجوزة ولا مريض . . أو طفل يادابو اتولد فضفضت جيشنا المنضبط . . سخّرتو للكيزان عضد تسريح معاش ، أو إغتيال . . ضباتنا أصبحوا بالعدد وصبرنا ، أيوب استجار . . شادّين حبلنا من المسد لاكين لقينا الملتحين . . خمّوا القليل الاتوجد نآكل وتزرعوا صاغرين . . حكمك تشدّ الما شهد تعروا ونكون متلبسين . . مما صنعتوا ومما ورد تيفودك الضارى المخيف . . فيروسه سارح فى الكبد وأنيميا من عدم الرغيف . . وملاريا نيران فى الجسد وتقول كمان شدّوا الحزام . . وينا البطون الدايرة شد ما جسومنا نحلت لى عضام . . داخرينا لى ود اللحد وجنيهنا داك اللكان دهب . . الأهيف أب فقرة وزرد خفّض قواه من الغضب . . من قت زكاته جمل حمد فى جنوبنا يا دابو السلام . . تمت شروطه وانعقد طبّيت ورافع الانقسام . . أوصدت بابه الى الأبد كنا البناوى اللاجئين . . سودانا رغم المر صمد الليلة نحنا مشردين . . فى كل دولة تلاقى فرد كترت مدايح السائلين . . ظهرت عمم ما ليها حد ودقن فى فاسق لا ركع . . لى ربه مرة ولا سجد وجباة ضرايبك فى السفارة . . أفندية فى التمرين جدد لابسين ملافح أمهاتم . . الزى موحد ومتحد مافيش كلام غير الدفع . . وتقول سلام ما بتلقى رد نفخة أباطرة ورا الطيق . . أهلا ومرحب يا عمد إلزامنا بالتحويل سخيف . . فى قراره مهما السوق سود ما كفاية تلزمنا بضريبة . . وحق زكاة ورسوم تهد إضافة المولود مئات . . توثيق مئاتك ويا مدد توكيل بشى وسؤال بشى . . وفضى جيبك دون تعد وفرضت باب لتبرعات . . حوت الغريب من كل بند الشرطة فى الخرطوم جياع . . والترعة نشفت فى الرهد وكمان تقول قد اكتفينا . . وانت بتطارد فينا طرد بقفا الريال بتسيل ريالتك . . وتملا خشمك بالزبد شركت ليه بكل وسيلة . . وقلت عاشقه ومافى ند صدرت زيتنا وبعت سكر . . قصبه أخضر ، ما اتحصد والمتخلف الضاربه الحصار . . وتحت الشمش شقيان يكد لو جاكا يستخرج وثيقة . . " شباك تلاتة " تقوله سد الزول معرض للقبض . . قانون صريح شادد شدد خلينا كدى بس بالعقل . . كيفن يسد وانت بتقد بقر الحلب فى الاغتراب . . للثورة اكتر من سند ومال الشهيد يا محسنين . . ما برضه ملوال قد شهد ملوال أخوى وكمان ألير . . والمانقو زمبيرى الخلد من دمّى دمّه ومن عضاى . . وقلبنا من بدرى اتحد والمستشهدين هنا فى الشمال . . الراحوا سمبلة أو عمد والراحوا فى التعذيب شمار . . والطالب البطل الصمد شالوه أمنك فى الفجر . . يومين معاهم بس أخد جابوه جثة وقالوا جندى . . أكان بنضف فى فرِد جرحوا أمه فى عز حشاها . . وبطن أمه بطرانة بتلد لو كتلوا بالتعذيب محمد . . مليون محمد بتولد روحه حلت فى سمانا . . وجرحه نوّر فى البلد أصبح مزار كل العذارى . . قبره فتّح حقل ورد كل القبيلة بقت قبيلته . . وسمّوا إسمه على الولد وقت لينا نحنا المنقذين . . ألزم حدودك يا ولد محلولة دايما بى رجالها . . ومافى غيرهم ليه يد وتراكا المشيت على اللسد . . والشعب لى خطوك رصد أفيال تخاف قحة شبل . . وانت بتعوعى قصد أسد واتحدى د . . لو تمس . . شعراى من لبد اللسد خنزير عديل مشى للأسد . . واب لبدة ليه لبد لبد وكلاب تجهز فى الحنوط . . وتقرا الوصية على الولد خنزير حمار مشى للأسد . . خنزير بليد مشى للأسد وزرافة ماسكة فى يد خروف . . وعبلانج براقص فى قرد * * * معليش فى حاجات كدا ربما غير مفهومة للجيل ونعتذر إنه ما خلينا ليهم وطن معافى لأنه وجدنا وطن معافى من اللى قبلنا لكن برضه نطلب منهم أن يجعلوه وطن معافى حتى لا نشعر بالأسى والحزن والتقصير وحتى نجده فى باقى أيامنا الفضلت معافى ولا نتحسر ونشعر بذنب أن حاولنا جادين ولم نوفق برغم أننا حتى بعد السن الكبيرة لم نترك سبيلا سواء أكان دفِر واللا حرب ما سكتنا لا أنا ولا كل جيلى ، من فضل منهم ومن قضى نحبه سواء على أيديهم أو بمكائدهم أو بتلويث مناخنا شكرا شباب