يا اخى انت بتحقق مع قصيدة وبتمنع سفر قصيدة كيف يحبك الشعب الشاعر الذى أحترمه (نزار قبانى)، والمقصود بالتحقيق والمنع من السفر ليس الأنسان الشفيف الخلوق المهذب المؤدب الراقى (أزهرى محمد على) وأنما قصيدته المحرقه المؤلمه (خمسة سنين كمان لى شنو) وأخواتها. سلم نفسك يا حجاج وخلى الكلام النى .. فكل طاغية من قبلك قال نفس الكلام وأنه الشعب معاهو ومأيدو .. 99 و 9 من عشرة في الميه .. قالها صدام رحمه الله وقالها القذافى – من أنتم - رحمه الله وقالها (مبارك) – خليهم يتسلوا – وقالها (مرسى) – هى لله – زي بتاعتكم التى لا تذهب أبعد من الشفاه ولا تخرج من القلب. كدى جرب سلم نفسك شوف منو البسأل فيك .. ومنو الما بقول ليك قشة ما تعتر ليك؟ وياتو شعب الأنت بتكذب وتقول هو المنعك من تسلم نفسك .. يا خى خلى الكلام (النى) .. أهورو كنياتا رئيس كينيا ما قال الشعب منعو لأنه الشعب ما بيتعرف رايو الا عبر استفتاء نزيه .. اهورو حزبو قال ليهو ما تمشى (لاهاى) ما قالت هئية علماء (السلطان)، وقالوا ليهو من حقك تجاوب (المحققين) من خلال (كونفرنس)، لكن (اهورو) الراجل ترك وصيتو وقال ليهم لا .. انا ماشى بى روحى من أجل وطنى وشعبى اواجه وكان (رهيفة التنقد). يا تو شعب يا (الحجاج) البحبك ولى شنو يمنعك من تسليم نفسك فهل أحب شعب العراق (الحجاج)؟ لى شنو الشعب يحبك ويا توشعب البحبك يا (فرعون) هل تقصد اهل الشهداء (مجدى وجرجس واركنجلو) وديل كم الف ولا كم مليون فقد بكى شعب السودان كله لأعدامهم، ما عدا قلة من المغرر بهم والمخدوعين وناس السكر والزيت وناس (هى لله) الذين يقصدون، هى للقصور العاليه وشقق دبى الفخمه وبنوك ماليزيا. ياتو شعب البحبك لمن يمنعك تسافر يا حجاج .. وهل تقصد اهل شهداء رمضان (أرجل) من انتموا للمؤسسة العسكرية وديل كم الف بل كم مليون؟ ولا بتقصد أهل شهداء دارفور بمئات الآلاف ولا زال الدم نازف وبجرى وانت يا الحجاج و(كلاب) سلطتك رافضين المسار الواحد لحل كآفة مشاكل السودان لأنكم ما ناس حل .. اها وديلك كم مليون ودارفور مساحتها أكبر من فرنسا. ولا بتقصد أهالى شهداء المناصير والبجا والنوبة والنيل الأزرق وديل كم مليون؟ ومن قبل لن ننسى الجرح اللسه لم يندمل .. جنوبنا الحبيب .. ولن نرتاح الا تغور يا سفاح و تذهب الى مزبلة التاريخ ونصيغ علاقة جديدة يرتضيها الشعبان لمصلحة الشعبين .. فالسودان الجديد رؤية وجدت لتبقى. منو الخائف عليك من أهل السودان حتى يمنعك السفر غير الأرزقية والمصلحجية والمأجورين والمهووسين؟ هل تقصد المزارعين القلت مشروعهم فاشل يا رئيس الفشل والفساد هم المنعوك من السفر (للاهاى)، وهل مشروع بعيش عليهو الملايين فاشل حتى لو لم يحقق ربح؟ والمزارعين تربية شيوعيين أم الشيوعيين تربية مزارعين؟ يا اخى أنت ما بتخجل وأنت قريت وين .. كيف تسئ لحزب قائم وموجود قبل يلدوك .. اها كلما البلد غلبتكم رجعت لى ده كافر وده ملحد وده مرتد؟ ارسوا ليكم على بر ديمقراطية ولا نظام (ملالى)؟ سمعتك يا الحجاج بتتكلم مع البجا وبتقول ليهم يا ريت تبطلوا (التمباك) .. (الله أكبر) .. ويا ريت تبطلوا شراب القهوة (الله أكبر) .. غايتو جنس عوارة .. أها (الفياجرا) كيف؟ تاج السر حسين - [email protected]