ديل شباب شارع الحوادث يا وطن .. أجمل زهورك .. وبالدليل ديل خلّوا ( قِبْلِي ) العافية يقدل وفي شرايينك يشيل ولو يوزنوهم بالدهب يلقوا العيار بالحيل تقيل ديل نفحة من أجدادنا من سوداننا في الزمن الجميل ( أم قسمة) صارت تاني (عازة) وفي هواها .. هم ( الخليل) قالوا البيان بس بالعمل لا بالضجيج .. لا بالرقيص . . ولا بالعويل ينبوع أمل غمر السراب قال ليك مِزاجك سلسبيل أجمل شبابك يا وطن أهديم الشكر الجزيل دي القطرة أول كل غيث والخطوة أول كل ميل ترجم رسالتك يا وطن لي كل زول عامل حِميل فالقصة ما قصة شباب شنقوا المحال بالمستحيل القصة نرغب للحياة فالفجر أخِر كل ليل والقصة نكنس للفساد نكويهو بي نار الغسيل والقصة تصحيح المسار من تاجر البشر العميل من حامل القلم البلم من نافخ الكير الدغيل من فتنة الدجل المسيخ يا تاجر الدين البخيل يا مدفع السجم الرماد كن لينا ك.. (الماظ) (الفضيل ) (أم قِسمة) قصَّت للشريط ويا (وطني) أرحل وإستقيل القصة بالعربي البسيط انو البلد فيها البديل القصة (بالهندي) البسيط انو البلد فيها البديل القصة بالعربي البسيط انو البلد فيها البديل ضياء الدين مدثر رجب برلين/مايو/2015 [email protected]
