مافي دوا كان مدعوم اصلا يا ناس .. ومافي محروقات كانت مدعومه ياشعب .. ومافي اي سلعه كانت مدعومه اصلا .. الدعم الحكومي او نظام الضمان الاجتماعي الكان مسماة زمان (التموين) ده وقفتو حكومة تجار الدين ديل من اوائل التسعينات .. الدوا وكل السلع اتلغي الدعم منها من السنين الاولي لحكم الانقاذ . لمن الاسلامين المجرمين ديل سنو قانون السوق الحر .. البحصل في السودان اسي ده ياهو البحصل من ما جو الكيزان ديل .. ياها زيادة الاسعار بس .. ما عندها مسمي غير كده زيادة الاسعار عشان هم طماعين وعشان عايزننا ندفع ليهم تمن رفاهيتم واجازات اولادم في جزر هاواي وجزر المالديف وماليزيا . وتمن الرصاص البقتلو بيهو اهلنا في دارفور والنيل الازرق وجمبال النوبه .. بس .. اما اسم الدلع لزيادة الاسعار (رفع الدعم) فده بدو يرددوهو عشان يغشونا بيهو او بلغة الشباب (يطلسونا) من سنة 2011 في يناير .. والسبب طبعا عشان كان وقتها في الربيع العربي مدور فكانو خايفين يزيدو الاسعار عديل كده زي ماكانو بعملوها كل فتره من 89 .. فعشان كده دلعو الزيادات باسم رفع الدعم .. ومن الوقت داك اي زياده اسعار بقو يسموها كده .. في 2010 يونيو وفي 2013 سبتمر .. واسي في اكتوبر ونوفمبر 2016 .. والقصه ما حتقيف علي كده حيستمرو لسه ولسه ولسه.. الدليل علي انو البحصل ده ما رفع دعم مثلا لو مسكنا موضوع المحروقات وزيادتا والدوا والزياده الجنونيه بتاعتو .. حنثبت انو مافي دعم اترفع اصلا كالاتي .. .. اولا البترول سعر البرميل عالميا 45.55 دولار وسعر تصفيتو 10 دولار .. لو ضربناها بسعر البنك الختوهو اسي معناها 55.55×15.8 دي بتساوي 877.69 جنيه سوداني . والبرميل فيهو 159 لتر . موزعه كالاتي 1 . بنزين 74 لتر × 6.17 سعر اللتر =456.78 جنيه 2 . ديزل 35 لتر ×4.11 سعر اللتر =143.85 جنيه 3 . غاز 14 لتر × 10 سعر اللتر = 140 جنيه 4 . وقود طائرات 15 لتر × 100.89 سعر اللتر = 1513.85 جنيه .. وباختصار المتبقي من البرميل هو عباره عن 7 لتر فحم بترولي .. 5 لتر زيت وقود .. 5 لتر اسفلت ..2 لتر شحوم .. 2 لتر مواد اخري .. وكل هذه الاشياء تباع بمبلغ 1000 جنيه .. واذا جمعنا كل هذه المبالغ نجد ان برميل النفط (سواء كان مستور او منتج محلي) الذي يكلف الحكومه 877.69 جنيه يباع لنا الان ب 3254.43 جنيه .. فاين الدعم الذي رفع هنا ؟؟ ان الحكومه تربح في شعبها اربعه اضعاف سعر البرميل ربح صاااافي . (وبرضو تجو تقولو لي رفع الدعم !!) .. اما الدواء وما ادراك ما الدواء والدعم الوهي الذي يبحث عن اعادته هذه الايام بعض الناس عبر هاشتاقات او غيرها فهو غير موجود اصلا ولم يكن موجود منذ مجيء الانقاذ .. وكل الذي حصل الان ان الحكومه حررت سعر الصرف للدولار ورفعت سعر الدولار في البنك من 6 الي 15.8 جنيه .. وشركات الدواء كانت وفق سندات في هذه البنوك تستطيع استيراد الدواء بسعر البنك وهذا كان وفق قانون سعر الصرف الرسمي وليس دعما للدواء .. والان الذي حدث هو ان الشركات اصبحت تشتري الدولار عادي بالسعر الجديد وبهذا ارتفع سعر الدواء وتضاعف شأنه شان كل السلع التي تتضاعف وفق زيادة سعر الدولار لاننا ببساطه لسنا دوله منتجه بل حكومتنا المبجله دمرت كل وسائل انتاجنا التي كانت تدر لنا الدولار وتحولنا بامر المجرم البشير وعصابته الي دوله تعتمد علي السلع المستوره في كل مناحي حياتها وهذه السلع المستوره بالضروره تحتاج للدولار لاستيرادها والدولار (ماااافي) وهذا هو مربط الفرس .. بس ليس الا .. يعني القصه لا رفع دعم لا بطيخ .. .. القصه جشع وطمع من الحكومه التي تعودت عصابتها علي مستوي معين من رغد العيش وبعد ان ذهب بترول الجنوب وقلت موارد البلد بافعالهم وسياساتهم الرعناء الماسونيه المدمره ( قبلو علي جيوبنا نحن المساكين ديل بس) واصبحو كل ما (يفلسو) يزيدو سعر السلع ويقولو جزافا وايهاما لنا (رفع الدعم) تجميلا لصوره الحكومه بس ونحن المساكين ديل تنطلي علينا الخدعه ونصدق ونحتج علي ( رفع الدعم ) الوهمي وتجي الحكومه تقول لينا ما عندي قروش(ادعمكم من وين ؟؟!)والاقتصاد منهار .. وتظهر وكانها مسكينه مغلوبه علي امرها وطوالي يطلعو المطبلاتيه ويقولو اصلو الغلاء عالمي وامريكا حاظرانا والكفار مستهدفننا عشان دينا . وجهاز الامن يبث هاشتاق ..#ارفعو_الحظر_عن_الواء ..وغيرا من الهاشتاقات البتطالب باعادة الدعم (الوهمي) للتاكيد علي ان الحظر الامريكي هو سبب غلاء الدواء ونحن طوالي بكل غباء ننساق ونروج لهاشتاقات دي .. وتضيع ثورتنا شمار في مرقه .. لا والف لا ياخي .. يا ناس اوعو ارجوكم اوعو يا ناس .. ابوس يدكم ما تبقو لقمه لينه في افواه المجرمين ديل .. الا قد بلغت اللهم فشهد .. .. بوشي [email protected]
