كل الحُزن مكبوت جُوانا يا كيزان رغم الألم صابرين سنوات من الحِرمان رغم المرض صابرين جوانا نلقى أمان بس كل البلد خربت وإتفكك السودان كل الخُلوق جاعت وإتقسمت كيمان ضاع الأمل بالجد صبحت بلادنا هواان والليلة يانا خلاص ناساً رجال عصيان ***** صابرين نحاحِي الطير من عيشنا ما يخربْ بس جانا الجراد كابِسْ أكل العقاب ونَهبْ ما إنتوا الجراد والطير والله جد وأكعبْ ماكلين حقوق الناس بالدِيِن تنهبوا نهبْ ضاع الأمل يا كوز وأصبحنا نتعجبْ بس نحن بعد اليوم حالفين عليكم تبْ وين تجري يا الكضاب نلفاك زي الضبْ ***** كم من السنوات غير في العذاب حُرْقتنا بالدين والشريعة إشتريتوا وبعتوا في سمعتنا شيكتوا الوطن بالدين وبقينا فوق ورطتنا نترجى رزق اليوم شادين بصل حَلتنا فتة وشمار بالتوم تَسكِتْ صراخ طفلتنا مريومة ما بتتيتم مريومة بت حارتنا بس انتوا بكرة يتامى وحرّم ده قول جارتنا ***** جاري وأبوي وأخوي قالوا الصبر لمتين عشرين سنة وعدت فُتناه الصبر حدين رغم الوجع صابرين كان متنا كان حيين إلا الحرامي تِغا سرااااااق كمان ولعين يسرق يشيل بالكوم ومعاه كم واحدين ساعين دقون الخَمْ ويسووا كل الشين ملعونة فيك يا كوز ملعون تجارة الدين ...أبوناجي...