لظروف قاهرة لم اتمكن من مشاهدة حلقتي الاربعاء والخميس المنصرمين ونشوف ما حدث في حلقة السبت لن اتحدث عن البطالة العطالة السياسية والمتبطلين السياسين حيث ان المنابر الورقية والاسفيرية ملأى بها ويكفي اننا دخلنا موسوعة جينيس للارقام القياسية في عدد التنفيذيين في بلد شحيح الموارد وشخصي الضعيف قبل كده في حوش بكري كتبت الاتي [QUOTE]الاتحاد العام للوزراء السودانيين وانا افكر في الحال المايل للسودان ( كيلو الطماطم بي 30 ريال) وكيف ممكن انو الحال ينعدل ، اكتشفت الحقيقة الكانت غايبة علي الا و هي انو كل سنة تتخرج دفعة يشوفوا منو الكان عضو لجنة تنفيذية في الاتحاد العام للطلاب السودانيين طوالي يغزوهو وزير ولائي او وزير دولة . اما المخضرمين فديل طوالي وزراء تحت الكشافات او مستشارين في القصر الجمهوري . يعني عشان تضمن مستقبلك الوظيفي اول ما تدخل الجامعة تووووووووووووووش ادخل الاتحاد واللجنة التنفيذية ، تتخرج بي هنا ، تتوزر بي هنا لا لجنة اختيار لا اسئلة تعسفية المهم لازم في الاول عشان نعدل الحال نعمل اتحادات فرعية لانو حسب الولايات حيكون عندنا 25 اتحاد فرعي بالاضافة للاتحاد العام في المركز وبكدة بالاسليب المعروف يكون الاتحاد ضمن الدورة القادمة براااااااااااااحة ، ولو ما فازو في الاتنخابات كعادتهم يعملو اتحاد موازي ويسموه الاتحاد العام للوزراء السودانيين بس المرة دي حيحصل كالاتي 1- الجنوب حيعمل اتحاد وزرا لوحده 2- الشرق والفشقة حيتحدو مع الحبشة 3- اتحاد دارفور حيتقسم لي 3 اتحاد حينضم مع ليبيا عند منطقة عوينات واتحاد حيمشي لي تشاد واتحاد حيبقى حايص 4- النوبة وحلايب حيتحدو مع مصر اها اتحاد الوسط والجزيرة حيبقى ده الوحيد بتاع الاتحاد العام للوزراء السودانيين وككل عام وانت بخير[/QUOTE] وقبلها كتبت الاتحاد العام للوزراء السودانيين يرفع مذكرة للسيد رئيس الجمهورية [QUOTE]رفع الاتحاد العام للوزراء السودانيين مذكرة احتجاج للسيد رئيس الجمهورية بعد ان صرح سيادته بانه سوف ينظر للدستوريين الماعندهم شغلة وييستغني عنهم لتعيين الاطباء وقد برر الاتحاد العام للوزراء بان هؤلاء الدستوريين في مهام جهادية مقدسة حيث انهم ومنذ ان كانو بالاتحاد العام للطلاب السودانيين ما عندهم شغلة سوى القيام بالمهام الجهادية وتمرير الحسابات والدخول في السوق لمنفعة الاتحاد العام للطلاب والان لمنفعة الاتحاد العام للوزراء ولانها لله فانهم ياملون من السيد رئيس الجمهورية عدم اتخاذ اي اجراء اما بخصوص تعيين الاطباء فقد اقترح الاتحاد العام وضع دمغة على المعاملات تسمى دمغة طبيب يكون عائدها لصالح مرتبات الاطباء وفي الختام شكر الاتحاد العام رئيس الجمهورية واعلنو انهم عضد للانقاذ زنقة زنقة وحارة حارة [/QUOTE] الاغرب من كده انو هذه الطفيليات بعد ان مصت ما تبقى من مال الشعب السوداني ليتها استثمرته في الداخل وقللت من نسبة العطالة ولكنهم حولو كل مالهم المكتسب الى خارج السودان في البنوك الاسيوية يعني ميته وخراب ديار لكن عجبتني ايمانك بنظرية المؤامرة لاني بتفق معاك بس انت ما حتقدر تقول المتآمر منو المتآمر على الشعب السوداني يا حسين هو الحركة الاسلامية ومن شياعها من الانتهازيين والمتسلقين وغاسلي الاموال اي ثالوث الشر لان هذا التدهور بدأ منذ يوم 30/6/89 حيث بدأنا نتدحرج للاسفل بسرعة الصاروخ والانقاذ هي التي اجبرت الكوادر للهروب من جحيمهم ولصالح من يتامرون لصالح اسرائيل شئت ام ابيت تخريمة هزيمة 67 الناصرية توجت بانتصار اكتوبر الساداتي بالجيش العربي الناصري والسلام عليكم ورحمة الله [email protected]
