نحن نعتير ان الاعلان الذي اطلقه المهندس عبدالله مسار رئيس لجنه النقل والاتصالات بالمجلس الوطني عن سودانير في الايام الماضيه مستفز ولن نسكت عليه. فرغم قناعتنا بان الرجل (زول حقاني), الا انه في هذا الموضوع اصبح كالمتحري الذي ذهب الي منزل مسروق ومدمر, وقبل ان يستوثق من شكوكه بخصوص الفعل والفاعل , كتب في يومية تحرياته ان المنزل مسروق ومدمر. ياخ انته بتمثل المجلس الوطني يعني زول غريقه, بس رايك في القضيه ان الاداره الحاليه غير مسؤوله عن خط هيثرو, وسودانير تمتلك طائره واحده صالحه للطيران وان الطائرات الباركه في باحه مطار الخرطوم تحتاج لي 10 مليون دولار لصيانتها؟ كدي نبتدي واحده واحده. اولا نحنا بنعتبر موضوع خط هيثرو دا تشتيت للكوره ساكت, وانو الاعلام قد اعطي هذا الملف اهميه اكثر من الازم علي حساب ملفات اخري هي التي اهدرت اموال الشركه كملف لجنه ايجار الطائرات وملف جماعات التمكين مثلا والتي تستنزف الاموال بشكل يومي. فنحن نعرف وطوب الارض يعرف ان المدير الحالي لا ذنب له في بيع الخط ولكنه مسئول مسئوليه مباشره عن كوارث اخري بداناها بفضيحه محطه ابوظبي وسننهايها بمحطة ابوظبي ايضا لانها المحطه التي كانت تعتبر منجم ذهب للشركه منذ القرن الماضي. اما بيع الخط فمسئول منه بصوره مباشره او غير مباشره الاداره الحاليه لانها كانت موجوده حينئذ كمدراء ادارات ومجلس اداره بما فيهم وزاره النقل. فعدم رضاءنا عن اعلانكم يتمثل في فشلكم باطلاعنا علي من هو بالتحديد الذي باع الخط, وبي كم, وقبض كم. فالمتحري لا ينفي التهمه عن شخص دون توجيهها الي شخص او جهه اخري يري انها ربما ارتكبت الجرم. وقد كنا نمني النفس ان يدخل سيادته الي دهاليز الشركه ويتجول في ارشيفها ليطلعنا علي صفحة الاسرار الموجود فيها اسماء المجرمين الحقيقيين للغز الخط الذي حير الراي العام قاطبه. فياسيادة النائب المحترم (الخط الخط الرد الرد). ثانيا, وجود طائره واحده صالحه للطيران معلومه قديمه ارجو ان لا يتوقع سيادته ان نفغر فاهنا دهشه عند سماعها. فقد كنا سنندهش اذا اخبرنا عن لماذا تمتلك سودانير طائره واحده عامله, ولماذا اصبحت البقيه هالكه. هل الاسباب فنيه او لسوء الاستعمال ام لاستهتار القائمين علي امرها؟ وقد قرانا جميعا في التقرير الفضيحه الذي كتبه الصحفي عثمان ميرغني منذ شهور عن تشليح بعض الاسبيرات من الطائرات الذي يعتبرها سيادته هالكه وبيعها الي شركات محليه منافسه. هل ذلك ماجعلها هالكه؟ فليخبرنا بذلك. واخيرا, دا كلو كوم وحكايه احتياج الطائرات المتعطله لي مبلغ 10 مليون دولار كوم تاني. عايز طبعا يرفع ضغطنا ويدفع القروش دي. غايتو شوف سيادتك , في اي لحظه نسمع انك دفعت من اموال الشعب الغلبان القروش دي لاداره سودانير حانشكيك لله سبحانه وتعالي وسنقوم بالدعاءعليك وعلي مجلسك ليل نهار. 10 مليون دولار عشان يشترو اسبيرات؟ ياخ انته جادي ولا ماعارف الناس ديل؟ ديل فيهم ناس يسرقو الكحل من العين. اول حاجه نحنا نشك في انو الاحتياج اصلا لي 10 مليون. ونشك في لسته الاسبيرات الكتبوها ليك. ومتاكدين انو بعض الاسبيرات دي موجوده في مخازن الهندسه. ونشك كمان في الاسبيرات الحيجيبوها ذاتها ممكن تكون ضاربه ولا صناعه صينيه درجه رابعه. وبنشك وبشده في الناس القالو ليك حايجيبوهم يصلحو الطيارات دي ممكن يكونو (كوموفلاش) ساي. وبدون شك نحنا متاكدين ال10 مليون دي علي الاقل حايطلعو منها بي 3 مليون لي نفسهم. متقول لي امام مسجد ولا مؤتمر وطني. مافي زول هسع في الاداره الحاليه تستامنو علي قروش كاش. كدي في الاول فرتق لجنه ايجار الطيارات وانقل امام المسجد والعشره الكرام الحولو الي مساجد تانيه في الدوله وجيب ناس جداد للاداره عشان علي الاقل العاملين يرتاحو من الكابوس العايشنو دا. قلنا ليكم قبل كده جيبو د شمبول او كابتن وداعه او كابتن عبده عزالدين لانهم ديل بقدرو علي اللوبي الخنق الشركه وبفهمو كويس في الاتفاقيات. برضو المدير الحالي لازم تستبعدو لانو مابفهم في شغل الطيارات يقوم يجيب ليكم مكنات كهربتا 110 بدل 220 يلحق الطيارات امات طه وتبقي زي الطياره الماليزيه. تطير مانعرفا مشت وين. ونحنا بي صراحه الفينا مكفينا. الحكومه في الفتره السابقه عملت منتدي في مجلس الوزراء وكونت لجنه برئاسة د نافع ونشطت لجنة النقل في المجلس الوطني برئاسه مسار عشان تصلح الحال. والحال سيظل كما هو لانو الناس ياهم الناس والمدير مافاهم حاجه وعشان يفهم داير سنين مع (الحبرتجيه) ديل ونحنا مابنقدر نستني كلها فضل لينا كم سنه ونتكل. وبصراحه دايرين نموت مطمئنين علي سودانير الخيرا علينا كتير فهي العلمتنا وربت اولادنا. جيبو د شمبول ومعاهو كابتن وداعه وكابتن عبده عزالدين وهم بجيبو الناس المالعب, وتعالو نتفاهم بعد سنه. [email protected]