سودارس : الكوميديان محمد موسى .. لحست الفنجان.. وحاكيت حبوباتي.. وهلالابي وبريد جمال الوالي

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

الكوميديان محمد موسى .. لحست الفنجان.. وحاكيت حبوباتي.. وهلالابي وبريد جمال الوالي

الاحداث نشر في الراكوبة يوم 06 - 10 - 2010

ضيفنا الكوميديان محمد موسى زرع الابتسامة على شفاه السودانيين من خلال النكتة الخفيفة.. واشتهر على كافة ربوع السودان بقولته الشهيرة «أهل العوض الجابو الباقة» اخترناه في هذه الدردشة الخفيفة على أخيرة صحيفة «الأحداث» لنطّلع على جوانب أخرى من حياته خلافاً للنكتة.
إنت أهلك من وين يا عربي؟
أنا من ولاية النيل الأبيض، من قرية اسمها ود النجومي تقع في شرق النيل، وتحازي مدينة شبشة، وهي قرية جميلة ترقد على ضفاف النيل الأبيض وتسكنها قبيلة العوضاب.
محطات مهمة في حياتك؟
معهد التربية - بخت الرضا، وفرقة تيراب الكوميديا.
محمد صديق عازب ولّا متزوّج؟
متزوج وأب لبنتين «رتاج وريناد».
اتزوجت عن حب ولّا زواج عرب ساكت؟
اتزوجت من خلال قناعات ، ونحن ما بنحب لأننا عرب متعقدين شديد، وبنتزوج بالقناعة، والمحنّة وسترة الحال، وبنتزوج كمان المرأة البتكرم ضيوفك، ولا علاقة لنا بأعياد الفلانتاين.
إنت في البيت نيرفز ولا لطيف زي نكاتك دي؟
أنا في البيت لطيف جدا، لكن عندي حدود وخطوط حمراء لا أسمح بتجاوزها، وأنا زي بقية أهلي في القرية، الحاجات الما برضوها أنا برضو ما برضاها.
وكيف تتعامل مع بناتك؟
أتعامل معهن بكل لطافة، وبتي الكبيرة مؤلّفة وحفّيظة، وبتألف مرات حاجات من راسها، وبيتنا عموما بعمّوا الفرح والمرح والحياة الجميلة، وما بزعل من حاجة إلا تجي حاجة كبيرة كده ممكن تزعلني.
هل تسمح للبنات بقضاء أوقات ممتعة بالخارج؟
عندي برمجة خاصة للترفيه لبناتي، واطلع بيهم كل نهاية أسبوع للترويح عنهن.
حصل دقيت بناتك يا محمد؟
أي بت دقيتها مرة واحدة، لكن بناتي لسة بتذكروا الدقة دي، لكن البنيات ديل لطيفات خالص وحبوبات لأبعد الحدود.
هل أنت ديموقراطي أم ديكتاوري داخل المنزل؟
أنا ديموقراطي خالص لأبعد الحدود، ولا يمكن أن أرفض شيء إلا الشيء الذي يتنافى مع الذوق العام.
إنت يا محمد متصالح مع نفسك ولّا ما متصالح؟
أنا متصالح مع نفسي.. وبحاسبها حساب عسير على الصغيرة والكبيرة ، ورقيب عليها شديد.
إنت هلالابي ولا مريخابي؟
أنا هلالابي بريد جمال الوالي ولاعبي المفضل فيصل العجب.
ما هي الوجبات المفضلة لديك؟
أنا بحب فتة الفول لأنها ما بتغلّط علي لأني زول مريض وعندي مصران وحوامض، لكن ما أكضب عليك بحب الشية مع الشلة.
حصل جاتك رسائل إعجاب في موبايلك من البنات؟
ممكن يضربوا لي، وبتعامل في حدود الإعجاب، وإجابتي لا تعني أنني بخاف من زوجتي، ومرتي غيورة لكن ما شديد خالص.
حصل أخدت ليك شاكوش قوي من إحدى البنات؟
ما حصل أخدت شاكوش، وشغل الحب ده ما عندنا وهو عيب عديل كده في الحلّة.
وصّف لي يا محمد علاقتك بالمطبخ ومساعدة المدام؟
أنا ما بغسل العدة، لكن ممكن ألبّس البنات وأعمل شاي اللبن، ولمن زوجتي تكون في الوضوع بعمل ليها مديدة الحلبة، والشوربة، لأني بفتكر بخدم في جناي، لكن الناس برضو ما بتريح، والناس تقول ليك الراجل ده البحشروا مع النسوان ديل شنو.
ما هي علاقتك بالرياضة؟
كنت بلعب كورة لكن ما موفق فيها، ولكني متابع جيد للرياضية، وزوجتي بتتابع المسلسلات لذلك تحدث المشادات في البيت، لأني بستمتع بالدوري الإنجليزي والإسباني وبتابع كمان قناة الجزيرة.
هل لديك علاقة بالسياسة؟
ليست لديّ علاقة بالسياسة، لكن بصوّت للزول الوطني الذي يخدم السودان ويقدم الخير لشعبه، وبرضو نتعذب لعذابو ونفرح لفرحو.
ما هو مشروبك المفضل؟
أفضل عصير القريب فروت، والسفن أب، والموية الصافية.
ما هي علاقتك بالحبوبة؟
أنا ود حبوبة، وربتني حبوبتي، وأمتع أيام حياتي كانت مع الحبوبة، والحبوبات ديل كانوا بتلموا وبرموا الودع في قرية ود النجومي، وبحضر دق الزار، وكنت بلحس الفنجان وبحاكي حبوباتي.
ما هي أفضل الأغاني المفضلة عند محمد موسى؟
كل من يغنّي باللهجة السودانية، وأستمع لمحمد وردي وابن البادية وحسين شندي.
ما حصل قطعت رصيد وقلت لي زول حوّل بكم جنيه كده؟
ما قلت لي زول حول رصيد قبل كده، وموبايلي خط وظروفي اتصلحت كتير.
ما هي علاقة محمد موسى بالمدائح؟
أنا اتربيت في قرية ود النجومي، وأهل تلك القرية ديل يا صوفية، يا أنصار سنة، وأنا اتربيت في بيت صوفي، وجدي أبو أمي اسمو «المقدم» وهي رتبة عند الصوفية، وكنت بدق النوبة.
كلمة أخيرة؟
رغم بعدي عن السياسة ولكن لا أستطيع أن أرسم خريطة السودان دون التي اعتدنا على رسمها أيام المراحل الدراسية الأولى.
حاوره/ بهرام عبد المنعم

انقر هنا لقراءة الخبر من مصدره.