نجمين في السطوع والباقى زي فيرفيارو.. ما فيش اختلاف.. من هسه ساكت طاروا المريخ يفرض حكم القوى على الضعيف ويرسل الهلال خارج دوري الأبطال * الحمد لله آناء الليل وأطراف النهار. * الحمد لله حمداً طيباً مباركاً فيه. * الحمد لله كما ينبغي لجلال وجهه وعظيم سلطانه. * الحمد لله الذي أنعم علينا بنعمة النصر المبين، ومنَّ علينا بالفرح والسرور والحبور. * الحمد لله الذي أكد علو كعبنا، وقوة فرساننا، وأذاقنا حلاوة نصرنا الجميل. * بحمد الله وتوفيقه انتصر المريخ، ووضع الوصيف في مكانه الطبيعي، وأكد صحة الحسابات التي وصفت المجموعة بحرب النجوم. * فاز الزعيم بأقل مجهود. * تألق وانتصر وعبر واقترب من التأهل إلى ربع نهائي دوري الأبطال. * أدى الأحمر مباراة كبيرة، كان بطلها الأول الفارس محمد عبد الرحمن، الذي جندل فريقه السابق بصاروخين ناريين، سجلهما على مدار الشوطين. * الأول من خارج الصندوق، والثاني لا مسبوق ولا ملحوق! * ضربتان من نار، أحالتا الوصيف إلى دمار! * الحاضر يكلم الغائب/ مكسيم يحدث أوتارا: الغربال مزق الهلال! * يا الرشيد ويا خالد عز الدين.. شفتوا القونين كيف حلوين؟ * أب زرد قبض!! * أدى المريخ مباراة كبيرة على مدار الشوطين، وأفلح في تحريك النتيجة مبكراً! * مهمة ترويض الهلال اكتملت في أقل من ثماني دقائق! * ذلك الإنجاز يحسب لدفاع الهلال هذه المرة، لأن الزعيم سبق له أن أأجهز على الوصيف بأمر العقرب خلال أربع دقائق فقط في قمة دعم الطلاب! * في الحالتين المحجوز مضروب، ومسجل الهدف لم يحتفل! * جديد لقاء الأمس أن المريخ حقق انتصاره الباهر وهو منقوص من أبرز لاعبيه. * فقد هدافه الأول بكري المدينة بسبب الإصابة، وغاب معه العجب الصغير، واحتجب التكت وفاز بسهولة ويسر على الهلال المتكمل! * لو أحسن رماة الأحمر ترجمة الفرص العديدة التي صنعوها إلى أهداف لتضاعفت الغلة، ولنال الهلال هزيمة تسير بذكرها الركبان! * ست فرص مضمونة ضاعت إما بالتسرع في التسديد أو عناد الحظ أو استبسال مكسيم! * والمحصلة هدفان مع الرأفة والهلال خارج البطولة! * طار فوق حي المطار! * كالعادة ركب التونسية برفقة الكوكي! * وكان الدرس قاسي اترصد! * وكانت الليلة حمراء بلون الدم! * انتصر الزعيم عنوةً واقتداراً ورد على المتطاولين بصاروخين من نار! * بكل الحسابات المريخ على مرمى حجر من التأهل، والهلال برة الأبطال! * الزعيم عبر بمن حضر! * حليل العشرة ما بتهون.. علي الناس البعزوها! * التحية لفرسان الزعيم فرداً فرداً. * التحية تبدأ من جمال الفال، ولا تنتهي بالغربال. * التهنئة لغرزة الذي أدار المعمعة بحنكة الكبار، وأذاق الهلال كأس الحنظل. * والتحية لكل فرسان الزعيم، ولقائد المسيرة جمال. * التحية للقطاع الرياضي والمجلس ولزلزال الملاعب الذي أحال ليل البقعة على نهار. * التهاني بالأطنان لمحبي الزعيم في كل مكان. * البداية بالشاعر المريخ المبدع (بيكو): (انتصر الاسد.. الليلة زاد مقدارو * نقرش (للخفيف).. ببساطة هسع طارو * معروف آب زرد.. ما في البعيق أقدارو * مين جاب (الهلال).. الليلة جووه اوكارو؟ * زعيم أفريقيا واحد.. والشفوت.. انصارو * جلاد الفرق.. والكأس مؤكد.. كارو * المريخ فريق.. ثوارو.. هم احرارو * قاطر للفرق.. من خلفو عربات سارو * الابطال زمان.. قالولنا نحن.. اسيادو * وفي الإعلام كمان.. قالو اكملو.. استعدادو * معروف الزعيم.. شايل المكارم.. ذادو * قلنالكم قبيل.. اختو الزعيم وأولادو * ديل زي الجحيم.. غارزيتو بي افكارو * والجمهور عجيب شاعل لهيبو شرارو * معروف الزعيم وكتين يزيد اصرارو * ينقر (للهلال) بي فنو سلكو وطارو * انضرب (الهلال).. الليلة ناسو إحتارو * من رجم الزعيم الزاد كسح ..إعصارو * مريخ الوطن.. الساس رفيق إعمارو * حالف باليمين.. يسعد جميع انصارو * نجمين في السطوع والباقى زي فيرفيارو * ما فيش اختلاف.. من هسه ساكت طاروا * معروف الأسد.. بضرب وصيفو وجارو * بعد المبدع بيكو نعرج على الملهم فاروق أبو حوة، الذي ترنم قائلاً: * (انضرب الوصيف.. ضرباً غتيت بطال * اتنين في الشمال.. بالغت يا الغربال!! * في القلعه الفخار.. ما شفنا أي هلال * باي باي يا وصيف.. فارقت للأبطال * سواها الزعيم .. برق المحاص الشال * بهدل للوصيف.. لفاهو عمه و شال * غربال الخصوم.. اللي الشباك نشال * فسح للدفاع.. عداهو بالمارشال * تعرفوا يا شفوت.. كيفن تسروا البال * بارود الكماج.. الما بتماثلو نبال * فرسان الثبات.. راكزين تكنو جبال * تعرضوا في الوغي .. للركزة و الشبال * قاطر للفرق.. قصر الزمن أو طال * يا قطر الشمال.. الما بتهاب أعطال * يا دهب الخلا.. ما بتوزنك أرطال * عاشميق النزال.. سيفك بجز الطال). * آخر الحقائق * أنجزنا المهمة، وأكملنا الغربلة! * غربال ده وللا مش غربال يا ناس الهلال؟ * مرة أخرى رميناهم بفلذات أكبادهم! * صرعناهم بأسهمهم! * قالوا معاق، قلنا حراق! * قالوا مضروب، قلنا موهوب! * قالوا معطوب، قلنا فرق من جابسون وشيبوب! * النبال في الشباك يا غربال! * ضحينا بالهلال في إجازة عيد الفطر! * الغربلة نااااعمة، والكسرة طاعمة! * بالغت يا غربال.. معقول القونين في الزاوية الشمال؟ * تنويع مافي؟ * تعددية في الزوايا الهلالية ما عندك؟ * التعدد حصل، ومسلسل الضرب اكتمل! * الأول مشحون (كارقو)، والتاني صحبة راكب! * قال ليك اتثنين هلالاب قاعدين في شارع النيل وخاتين قدامهم غربال والليل كلو يغربلو، أقصد يحسبو! * لو الفرافير غلبت النجم، والغربال انضرب من الليتوال! * لو مكسيم ضبط أوتارو والمريخ غلب النجم في ديارو! * لو الموزمبيقي غلب الهلال.. والمريخ ما غربل الهلال! * كل الحسابات لقوها فارقة معاهم! * قدر ما حسبوها أبت تلفق! * نحن حسبتنا ساااهلة وبسيطة! * تفاصيلها على النحو التالي: واحد.. واتنين! * بس خلاص! * نحن انتهينا.. وانتو طرتوا!! * طرتوا في خطوتين.. عشان خفيفين ولفيفين!! * شفتوا حسبتنا ساهلة كيف؟ * لا فيها باقي مباريات هلال، لا فيها نصوص لوائح أبطال! * واحد جكسا والتاني غربال.. وطار الهلال! * مسعولين من الغربال، أقصد من الهلال، أقصد من الخير، التجميد خبرو شنو؟ * ومبادرة الكاردينال وصلت وين؟ * صحي ولدكم جمدكم؟ * أولادكم ذوقهم عالي لكن، كل مرة يغلبوكم ويختاروا (تجميد) الاحتفال!! * راعي حرماني وأخشى عامل التونسية!! * الهلال في آخر تلاتة مباريات قمة مع الزعيم انضرب مرتين، واستقبلت شباكه خمسة اهداف! * دحين الهلال ذاتو ما بقى غربال؟ * لو العقرب حضر كان أجزوا ليكم! * مبسوط ياخي أيه أعمل؟ * مبسوووووط مبسوووط يا جنا! * مبسوط وميدو سوى الفوت يا جنا!! * القونين ياخي كيف حلوين! * واحد (جكسا في خط ستة)! * والتاني (سواقة غربال من جنب استاد الهلال)! * ميدو يا ثقيل، طيرت الصواميل!! * عايزين نتابع برنامج ما يطلبه المغربلون في قناة الهلال!! * ممكن نطلب تعرضوا لينا القون التاني؟ * انفرنقوا! * سيرة وانفتحت! * ملاح ورق وانفرك! * الليلة الصدمة علي شديدة! * القون الأول من أم شديدة! * قالوا مكسيم بقى زول حميدتي.. وحالف ما يطلع من المقر! * القط كايس التجميد.. أمانة الضرب عليهو ما شديد! * خالد عز الدين قال هدف الغربال الأول غلط، لأنو فيهو ريحة فساد! * قال القون ما محسوب لأنو أسامة عطا المنان ما جابو في ميزانية 2017!! * لو عايزننا نسحب القون، أقنعوا المدهش يسحب الاستقالة!! * والكلام يا أسياد.. في مانشيت الأسياد! * يا ربي الليلة مانشيتهم حا يكتبوا فيهو شنو؟ * ده ما الهلال.. ده لعب العيال وضرب الغربال! * تلك إذن قسمة ضيزى! * ضيزى وليست كما كتبها حميدتي! * لو ناس حميدتي قعدوا في المقر للحول معتصم حا يقول للفيفا مرقوا! * مرقوا وكمان طاروا! * علي قول الحبيب هيثم صديق: أول مرة (الاتنين) تجي الجمعة! * لو ما عجبكم طلعوا مكسيم ودخلوا جمعة! * يا حلوين.. الليلة الجمعة بكرة الاتنين! * سمعنا بالغربال مخرم! * لكن غراب (يخرِّم) ده يطرشنا بيهو إلا عندكم! * الغربال غربل الهلال يا اولاد الحلال! * الغربلة ناااعمة والضربة طاااعمة! * علي قول الحبيب زهير: (جناي البريدو وأحضر جديدو وأحننو في إيدو يا الله حضرني)! * جناي يا ميدو.. يا الله حضرني! * قونك تزيدو.. يا الله حضرني! * مريخنا بنريدو.. يا الله حضرني. * في القلعة يوم عيدو.. يا الله حضرني! * قلناهو ونعيدو.. يا الله حضرني! * يوم نلقى المهلهل يا الله حضرني.. أنا سيدي بي سيدو يا الله حضرني! * مزقنا شباكهم فحطموا مقاعدنا! * رفع شباب أولتراس الكورفاسود لافتة تحيي ذكرى طبيب الهلال الراحل فجاء الرد بالتدمير! * فرق يا إبراهيم! * وضرب يا ميدو! * (حاشاك من فتات.. تأكل بايدك رص.. والرقبة التجيك.. دايما مصيرها القص.. يا غالي المقام ما بيكفي فيك النص.. عاشقاك الحروف فيك انت ما بتتوص). * خبر الأمس: جوز ما يخسر! * خبر اليوم: الصفر الما بنقدر!! * آخر خبر: يا غربالاب مسعولين من الخير: الليلة حا تشجعوا النجم وللا الفرافير؟