(فيتا) وخراب (هلال) ..!! * وأنقذت العاصفة الترابية الوصايفة أمس من هزيمة ثقيلة بإستاد الخرطوم، بعد أن بان الهلال أمام فريق (فيتا كلوب) الكنغولي على حقيقته وظهر مقصوص الأطراف ومتباعد الخطوط وضعيف المردود ..!! * فقد الهلال أمس جهود لاعبه بويا ومدربه البرازيلي كامبوس ..!! * غاب بويا للإيقاف بينما وقف كامبوس على الخط كالغائب تماماً، وبدأ المباراة تائهاً ليختمها مرتعداً وخائفاً ..!! * الجنسية البرازيلية وحدها ليست مؤهلاً للتدريب ولكن من ينصح الوصايفة الذين أعادوا (كمبسة) فازداد الألم وتضاعفت (المغصة) ..!! * كمبسة دا بدخلكم مدرسة ..! * النتيجة العادلة هي خروج الوصايفة مهزومين برباعية الا أن (الغبار) أنقذ الهلال ..!! * لأول مرة ينجح (الغبار) في علاج (أزمة) حادة ..! * رغم الهنات وعدم التركيز وضعف خط الدفاع الا أن اداء فيتا كلوب لا (غبار) عليه ..!! * عاد سيف ماسأوي فعادت ضربات الجزاء بصحبته ..!! * ضربة الجزاء التي يرتكبها سيف أصبحت مضمونة حتى ولو لم يشارك ..!! * طالما ان سيف بجي شايل البلنتي في جيبو ..(تاني فتشوا جيوبو قبل ما يدخل الملعب)..! * يا جماعة من المفترض (سيف دا إذا قلبو على الفريق يقوم باداء ضريبة الهلال من الكنبة)..!! * انتو وين سيمبو ؟؟ ..(نحنا بنسأل لانو مصلحة الهلال بتهمنا) ..!! * ميزة جمعة الوحيدة أنه موفق في صد ضربات الجزاء لذا فأن (كمبسة) قرر عدم إشراكه أمس ..!! * الجهد الذي يبذله كمبسة في تدريب المشجعين و(شحدتهم) على الهتاف لو بذل نصفه مع اللاعبين لما نام الوصايفة أمس بالحسرة ..!! * المحترف البرازيلي سيرجو أحرز أول أهدافه ولكن ذلك لا ينفي حقيقة أنه دفعة اتوفيستر ..!! * ناس المريخ زعلانين قالوا المدرب الألماني أتوفيستر (كبير في السن) مع أن سيرجو (دفعة فيستر) لا يزال يواصل مشواره بالميادين ..!! * بحسابات منطق التنافس فأن الوصايفة أصبح صعودهم شبه مستحيل مع أننا نخاف عليهم من لقاء الزمالك بالخرطوم أكثر من خوفنا من مباراتي مازيمبي وفيتا بالكنغو ..(ولا مستحيل مع كامبوس) ..!! * انتو كامبوس دا الجابو ليكم تاني منو ..(ما تقولوا مؤامرة من الأرباب عشان ما تظلموا ناس الفاضل التوم)..!! * عنوان مقال الرشيد علي عمر أمس (فيتا كلوب بتقول الروب) ..لكن وريتونا (القال الروب منو)..!! * ناس فيتا كلوب ما بعرفوا (قولة الروب) ..! * انتو فاضين من موضوع هيثم مصطفى عشان تغلبوا ..(ركزوا مع لعيبتكم اللابسين الشعار وسيبكم من الخلوا الهلال)..! * قلتوا ليِّ هيثم تاني ما بلبس شعار المريخ ..(طيب شعار المريخ خلوا ..اللبسو شعار الهلال عملوا شنو ) ..؟ * دا كلو كوم ومباريات الكنغو كوم تاني ..!! * بعد كدا يا الرشيد ما مهم تتأهلوا المهم تنستروا ..و(السترة والفضيحة في ما تبقى من مباريات) ..!! * كامبوس دا متعود علي الفضائح ..(عشان كدا يا خليفة حقو تحسم الموضوع دا)..! * هاليفا هاليفا هاليفا ..(كمبسة دا يوم بكتل ليهو مشجع)..! * يا خليفة ..لو دا فريقكم الله يعينكم ..!! * الاتحاد (جر ساعة التسجيلات) للوصايفة في النهاية جابوا سيرجو ..(هسه زي سيرجو دا يا ناس الهلال داير ليهو شفقة وإستعجال) ..! * الشفقة تطير ..و(الهلال كذلك) ..!! * إتشفقي ..!! نقش أخير * يا نسيم و(غبار) ..ويا خليفة دا ما الهلال دا لعب عيال .