أي هلالابي تلقاه الأيامات دي ماسك في ضهرو. عندي أخوي دخل كورة فيتا الأخيرة في المقصورة أمس ما مشى الشغل. قال ضهرو بوجوعو. اليافطة وقعت. وعملت ليه فليتة. ناس الهلال اتحولوا سريعاً من فيتا لفليتة. الما دخل الكورة ماسك ضهرو. ضهر ما عندك فيه فليتة ما تعد أيامو. الهلال ده التقول لعب مع فليتة كلوب. سيد الفليتة لو ما اطقطق ما برتاح. عشان كده الموضوع ده حا يستمر طويل. وشعار المجموعات هو (ممنوع الوقوف بين لافتتين كنغوليتين). واحد لقي لافتة مكتوب عليها ممنوع الوقوف انبطح وموضوع اللافتتة ده خطير. ربنا يشفي الجرحى. ولازم يكون في تعويض. علشان أي زول تاني عايز يعمل يافطة يعرف إنه في تعويض عليه لو وقعت. مش لو كانت ليها عشرة سنة. لو تمت قرن. أرواح الناس ما ساهلة ولا هينة. أي زول يعلق لافتة ويمشي. البلد بعد المطرة تلقاها كلها لافتات طايرة. أي لافتة واقعة بتوقع معاها حاجة. وده لفت لانتباه أهل اللافتات. البلد فيها شح في اللعيبة اللفت. وكثرة في اللافتات. ونلفت انتباه المعلنيين إنه أي لافتة واقعة بتحملوا مسئوليتها. مش كفاية الهلال يطير. كان اللافتات تطير برضو. على الجرحى التشبث بحقهم. لو أسقط أحدهم اللافتة لتلتلوه في المحاكم. لا تتنازلوا عن حقكم. عفا الله عما سلف هي القطعت خلفنا. أي زول لازم يتشدد في موضوع الحق العام. ما تعوموا الموضوع. عايزين بكرة أي شركة ..مصنع..مدرسة... تراجع لافتاتها. كفاية الفتات البنلقاه منها. ................... قال إيهاب زغبير إنه يريد إخلاء خانته. نفى إيهاب زغبير أنه يريد إخلاء خانته. قالت الجماهير إنها لا تريد إيهاب. لم تنف الجماهير قولها. ................ قالوا إن النابي سيعود من جديد. مفروض كامبوس ما يسافر. أي مدرب يعفوه يكون قاعد في البلد. كورة واحدة وبرجعوا ليه. الفرق ما بين النابي وكامبوس هو (خليفة). واحد يكورك لخليفة. وواحد يكورك من خليفة. إفادات جديدة للعجب لم تخرج من القديم. تحسر على ما مضى. وتحميل المسئولية للغير. لم يعترف بأن مردوده قل. وأنه ضرب الرقم جلى. وهيثم مصطفى يريد الرجعة للهلال كما قالوا. ويغني متين العودة تاني. اشطبوه يا أهل المريخ. العرجا لمراحها. لم يقدم لهم شيئاً وقد كان يتوكأ على موهبته والصبا فهل يقدم شيئاً وهو يتوكأ على عصا. أحرز سيرجيو هدف الهلال الوحيد ولم يسلم. تري لو خرج سليقة ماذا كان سيجري له. اقترح إلباسه رقم 8 . عسى أن يكون مثل سيدي بيه الله عليه. الذي أحرز الهدف الثاني للهلال. لقد أثبتت بعض الدراسات أن سيدي بيه قد أحرز هدفاً ساعة (الكتاحة). ولما لقينا عينيها لقينا الكورة (كتاحة). وللاستاد فتحنا دروب ولقزاز الفيتا جبنا فتاحة. غريبة المطرة صقعتنا وبقولوا عليها (كتاحة). ... برهان تية مية المية. هكذا ستغني جماهير المريخ. فداسي تفلق وتداوي تجيب معاوية تجيب الوالي فداسي ده ما بتعظ أصلو. قالوا إن الذي فلق عمر بخيت هو الذي فلق مساعد الحكم الطريفي. الزول ده نياش خلاص. واحد صاحبنا لسانو فالت.. صاحبي قال ليه مالك ما بتمسك لسانك ده إنت؟ لسانك ده زي البلنتات مع المعز أصلو ما بتمسك. ولا يزال الوضع في الهلال جايطاً. هل أثرت الشيشة في الكيشة. أم أثر الكيشة في الشيشة. بشري سارة تم بنجاح تحويل لقب ديدا لفيتا.
