* بسم الله ما شاء الله ولدنا الحضري وولدنا سيدا في مطار القاهرة آخر أحضان وآخر انبساط والحضري يسأل سيدا: كيف حالك يا باشا وكيف عامل مع الوضع الجيد وسيدا يقول ليه: الحمد لله آخر انبساط. * طبعاً الراجل ما داير يقول ليهو خلعت من زريبة العيش وجيت للناس البقدروني.. برضك البرنس راجل حساس وبقدّر ناس الهلال وقال أنا ما بنسى السنين القضيتا مع الهلال * لكن النصيحة ليك يا الله هيثم في المريخ يختلف عن هيثم في الهلال والزول المغالطني يرجع لي صور هيثم في الجرايد عندما كان في الهلال وصورو في المريخ * في الهلال صورو كلها حزين وزهجان وزي الميت ليهو زول لكن في المريخ صورو كلها ابتسامة وكلها فرحة وهيثم ذاتو رجع تمانية تسعة سنوات لي ورا وكأنو عمرو 18 سنة * كانت غلطة من الأول.. فالراجل مريخابي وأسألوا أبو شيبة لمن مشوا ليهو في البيت وفاوضوا جاب ليهم عصير منقة.. وجاب ليهم بطيخة بعد داك. * لكن صلّح غلطتو وجا للمريخ وجا للناس البقدروا فعلاً وهيثم والحضري في مطار القاهرة حاجة تاني. * وإعلام الهلال صدّع راسنا.. انتظروا المشاكل بين الحضري وهيثم ووجود الحضري وهيثم قنبلة موقوتة وفعلاً قنبلة انفجرت * وهيثم والحضري فوتوا على إعلام الهلال الفرصة.. آخر عناق وآخر ضحكات وآخر انسجام * طبعاً إعلام الهلال لا يمكن أن يكون قلبو على المريخ يعني بحذّر فينا من هيثم والحضري داير مصلحة المريخ !! لكن خايف ونقول لصديقنا شجرابي: أرجى الراجيك في أول قمة. * المرة دي ما بنقبل بهدفين وتلاتة لازم هزيمة تاريخية.. أول حاجة ولدنا هيثم يجيب قوون واحد وولدنا علاء الدين يجيب قوون وولدنا الباشا يجيب قوون برضو وديل كلهم كانوا في الهليل.. أما ولدنا كلتشي فإنه في حاجة لهدفين هذه المرة وبذلك تكتمل الصورة ونسحق الزبون بالخماسية. * معسكر المريخ ناجح والتجارب الودية تجعله أكثر نجاحاً.. أقول ليك يا الكوكي لا ترخي وحتى إذا خسر المريخ في التجارب الودية لا عليك فالصفوة تعرف أن التجارب الودية ليست قياساً وأن المريخ ذهب إلى تونس من أجل المكاسب الفنية. * قالوا ليك الهلال لاعب مع فريق سانت جورج الإثيوبي والجماعة ديل ماعندهم لاعب.. 18 لاعب اختارهم المدرب لمنتخب إثيوبيا يعني ناس الهلال ديل حا يلعبوا مع منو في مباراة اليوم؟ * لو قلنا الصف التاني دا صف سينما.. سانت جورج أصلو عندو كم لاعب؟ 50 لاعب؟ بالكتير عندو 25 لاعب أو 30 ولمن يختار منهم المدرب الصفوة 18 لاعب ما فضل فيهم شي. * وبعد دا الهلال إذا فاز حايقول ليك قدم محاضرة كروية وسانت جورج حايتم التشكيلة بالشباب وعمال الاستاد وفرق بين معسكر سوسة وبين معسكر إثيوبيا والجميع سيشاهد الفرق عندما يبدأ الموسم وفي أول مباراة قمة * سنستمتع وسنردد عبارة: جيب من جوة يا معز كثيراً في هذا العام وأي هلالابي عندو مشاكل في المصران أو يعاني من ضغط أو سكري ننصحه بالوصفة التالية: إما أن تتحول إلى المريخ مع هيثم وعلاء الدين أو تترك تشجيع الكرة والهلال لأنو الزبون في الموسم المقبل لن يصمد أمام سيدا وسيدو والأسطورة والظاهرة والأباتشي والسد العالي والسهم الأحمر ورامبو.
