كدي النقعد ونتحكر بدون ما نفرز الأجناس وتحصل فتنة بين الناس ويوسع جرحنا ويكبر ** كدي النقعد ونتحكر نشوف الشي اللساسية منو السوداني بالميلاد ومتسلسل أباً عن جد يكون من حقو والأولاد مواطن وعندو جنسية ويتعامل تعامل ندو ياخد حقو بالأكتر ** نجيب متر الأصالة قياس نقيس بالملي كل الناس عشان الجنسو سوداني دا صاحب حق مع سيد الجلد والراس ** كدي النقعد ونتحكر شمالاً نبدا من حلفا ولي آخر حدود نمولي وشرقاً غادي من دوكة وغرباً لي جبال تقلي الدينكاوي والشلكاوي والفوراوي والنوباوي والحلفاوي والهلباوي والبطحاني والجعلي ** نأتر في القبيلة الزول نفلفل جنسو سنة للحول ونفرز ياتو خاتي القول من الكضاب وبتشكر ** وشان نتلم أخو وود عم ما بنقدر نعيش ما لم نقيف بالمهلة نتفكر في البلد إن بقت بلدين بعد ما إتسالمت إيدين تعود من تاني تتنكر ونحن صفانا يتعكر ** منو الفتح الفتن أبواب هبش بالفرقة جرحاً طاب كشف الفينا كان مستور والطاوينو جوة حجاب ويا ساتر بقينا نفور ونخلق للكجار أسباب سنين وسنين وندردر ** كدي النقعد ونتحكر وفوق الواطة نرمي الساس وتبرد حرة الأنفاس وننسى الفات ونبعد عننا الآفات ونتحصن من الوسواس وبشويش بس نكافي الشر ** كدي النقعد ونتحكر وما نسمح لأياً كان في أي زمان وأي مكان يخش بيناتنا يتوكر ونرجع تاني نتفكر بالمعروف وبالإحسان بتتحدد مطالبنا ومنو المطلوب وطالبنا وما بنهضم حقوق إنسان إذا وقعنا في ميثاق لأنو وثاق ونقطع تاني أي لسان كان قلل وكان كتر ** ونعرف كيف نعيش أخوان وهمنا وحدة السودان بيتنا الفيهو نتحكر ونتفاكر ونتفكر عطبرة