+ النملة الاولى: مالك حزينة كدا يا اختي..؟!!! - النملة الثانية: اشان حاجات كتيرة اهمها الناس ديل بقوا بحبو المظاهر شديد ... الرسول مش لاحظتي الحاجة دي ؟! هسع في الاغاني دي الغنايات .. اقصد الفنانات يشكرن في الزول العندو القروش والمسكين دا ولاااا واحدة بتغني ليهو ... مثلا اسمعي دي بتقول شنو؟! يسافر لي باريس.. يبقى لي غني.. يبقي لي لبيس زي.. .. وديك بتغني تقول: يبقى مستشار ويصرف بالدولار .. ويمشي لي المطار.. + النملة الاولى: البنيات زماااااان كانن بغنن لي الاساتذة والمعلمين.. اها هسع بقن مع المادة ودايرات القرش براهو.. - النملة الثانية: صدقتي يا بت امي.. اشان كده انا قررته خلاص اشتغل فنانه هابطه .. + النملة الاولى: كيف يعني...؟!! - النملة الثانية: اصلو غناء الايام دي موسيقى ساكت ما بتفهمني ليهو كلمات ... اها انا اشتغل غنايه للعامة.. يعني ما اغني واشكر العندو القرش براهو... اشكر الناس كلها... + النملة الاولى: إلا الكلمات تلقيها وين؟! - النملة الثانية: يا اختي اسهل حاجة الكلمات دي... مع الجبجبة.. ما في زول شغال بي .. كلمات ومعاني كلمات زمنا دا ... هسع مثلا دي اغنية: الزول القاهو وين.... الزول القاهو وين حليلو يا يمه انا.... العاطل ليهو سنين وييين (جب جب جب)..! برضو ممكن الاغنية تكون الفول... الفول... الفول.. غيرو ما بدور... انا زولي المفلس بعيش معاك مستور (ايوووووي ... الما عاجبو يسكن المنشية) + النملة الاولى: وااو .. فعلا حا تكوني مغنية استثنائية... يا بختك.. تاني اتخيلته انك تتغيري وتبقي غنيانة .. إلا عاد بعدين ما تنسلخي .. اتذكرينا معاك ... - النملة الثانية: اها استأذن اشان عندي بروفات... قال ليا انتظرررري اديني بس مُده ان شاء الله نتدين الساكن امبده ... وييين جب جب جب + النملة الاولى: إلا.. إلا.. الكلمات هابطه - النملة الثانية: ما اكثر من البنسمع فوقو دا...!