النملة الاولى: الدنيا غريبة خلاص..!! النملة التانية: يا اختي ما غريب الا الشيطان.. مالك المحيرك شنو؟ النملة الأولى: هسا في ناس متعلمين ومثقفين الا مفلسين وفقرانين ومقطعين، وعاد واحدين الدراسة دي ما تعبوا فيها، ومع ده المستوى عالي.. غايتو ربنا ده اذا ما اراد ليك العُلا ما في شيتن بنفعك، لا تقول لي الشهادات لا الاخلاق لا الاصل الكريم. النملة التانية: صدقتي ما كذابة. النملة الأولى: ها يا بت ها الحياة بقت مظاهر ساي ده قلناهو لمن صوتنا ده وجعنا عديل. النملة التانية: شفتي ده «بالمناسبة» ما بديهو الا لي زول من أسرة بسيطة يكون هو ذاتو مكافح وصل بالكفاح والنضال اشان النوع ده بيكون عارف مشاكل وهموم العامة. النملة الأولى: هي عاد بعدين بيكون براهو؟ ونسيتي «انا حواليا كتير». النملة التانية: هسا المتعلمين واتخزلوا ديل اتخيلت الواحد فيهم خلاص يكون «اتعقد».. هسا معقولة اذا عندهم طفل بيقروهو. النملة الأولى: المؤمن لا يلدغ من جحر مرتين. النملة التانية: زماااان كنت بشعر بالفخر لامن اسمع استاذ او دكتور والاسماء والمسميات والالقاب الرنانة دي. النملة الاولى: ما مقياس صدقيني.. ما بقت على الالقاب يعني.. المهم المادة.. الزمن ده القروش بقت هي بتحدد الأفضلية.. اذا واحد ساى اتقدم اخطب بت، امها بتسأل عندو شنو؟ أها يعني يقولوا عندو دكتوراة ولا كيف؟ النملة الثانية: وشفتي الغنايات كلهن عندهن عربات خاصة.. والله البنية اذا تمت العلم العربية دي الا تدفع بالشهور في الاقساط لامن شعر رأسها يشيب حتين تجيبها، وبعدها اي زول ما ينبسط منها خليهو الشريف كمان. النملة الأولى: غايتو الله ينجح اي زول وينال مرادو في الدنيا دي. النملة الثانية: انتي قولي الله «يوفق».. «النجاح» سااااهل لاكين التوفيق صعب شديد.