الدموع التى تسيل من المآقى عند الحزن وعند الفرح من نعم الله على الانسان لأنها تخفف وتريح المشاعر، وهى كما يقولون سلاح المرأة على الرجل. ونزولها عند الرجال ليس عيباً وهي تعبر عن رقة القلب ورسولنا الكريم صلى الله عليه وسلم عندما توفى ابنه ابراهيم قال: (ان القلب ليحزن، وان العين لتدمع، وانا لفراقك يا ابراهيم لمحزونون). السودانيون الحنان (بكايين) بدرجة كبيرة والنسوان جنهم البكا بوصفه عند عزيز لديهم زي: الليلة يا عشاى ويا عشا البايتات ومقنع الكاشفات. سنفرد هذه الحلقة للبكاء والدموع التى جاءت في الغناء السودانى مع تعليق على ما يجرى في مجتمعنا السودانى: 1 سيد خليفة غنى: امسى مضى بين التحسر والأنين ووسادتي بللتها بالدموع والدمع السخين. «تتبلل كيف مع مخدات السفنجة الجديدة». 2 كابلى في اغنية الحقيبة: دمعة الشوق كبي حكم حبي ارعى نجم الليل «مهداة للمريخاب بعد غلب الهلال الاخير». 3 رائعة زيدان: لا هماك عذابنا لا دموعنا وشقانا نهديك المشاعر وتخون الامانة 4 الطيب عبدالله: والدموع السايلة منى ياما سالت وحرقتنى «استغاثة من حبيب لناس الحريق». 5 الاغنية الشعبية: دموعى سالت والمنام ابى لى العجب حبيبي. 6 صلاح بن البادية: انت لو داير بكاى الف اهلاً يا دموع. «واحدة بتقطع في بصل». 7 صلاح بن البادية: ما بتشكى في دربك قلوب ما بتذرف الدمعات مقل. 8 ابراهيم ادريس ود المقرن: شوف دموع عينى سايلة في خدى «واحد في مظاهرة للبوليس بعد البمبان». 9 خليل اسماعيل: كم سهرت الليل وكم سالت دموعى. «واحد بكاى». 10 الجابرى: بس دموعك لما فاضت ضيعت صبرى الشوية. «واحد قلبه رهيف». 11 وردى: دموع الحسرة في عيني اخفيها ونار الشوق اقول الصبر يطفيها. 12 ابراهيم عوض: خايف الايام تغريك تنسى دموعى وتنسى حنانى. «جماهير الهلال لهيثم طمبل وهو يغادر لجنوب افريقيا». 13 عثمان حسين: عشقتك وقالوا لى تعشق وايامك ربيع تقضى ليلاتك مسهد وابتساماتك دموع. 14 ابن البادية: نيرانها زفراتى الحرى برغم الادمع ومقرها المهج الجريحة بين تلك الاضلع. 15 هاشم ميرغني: لولا نارى من دموعى كنت غرقت ولولا دموعى من نارى كنت حرقت. «رجل مطافئ لحبيبته». 16 وردى: يا شوق مالك دعنى أما كفاك عذابي لقد شربت دموعى أما سئمت شرابي «واحد مشوكش». 17 وردي: اعتذارك ما بفيدك ودموعك ما بتعيدك العملتو كان بايدك. «دلالة على وشك الشطب». 18 النعام آدم: يا عيون ابكى دمع الدم الزمان بفراقنا حكم «موظف للماهية وهو يوزعها للديانة في نفس اليوم». 19 عثمان حسين: يا عيونى اسكبي دمع الحنين لو يفيد الدمع او يجدى الانين. «واحد من منكوبي السيول والامطار بعد فقد منزله». 20 كابلي: كم دمعة سالت فوق خدود الشمعة ضوت للعيون الفى السهر مجتمعة. «واحد من غرفة التحكم بالادارة المركزية». هدايا الحلقة: 1 عجوز عايزة تدخل حلة اللبن الثلاجة ما لقت ليها مكان، صنقرت وشربتها!. 2 صعيدى مكلف بتفجير نفسه بين الاسرائيليين قبل يوم عمل بروفة وسط اهله!. 3 الاستاذ بعلم التلاميذ الطرح: افرض معايا في جيبي 5 جنيه وقع منهم 2 جنيه يبقى كم في جيبي؟ التلميذ: يبقى في جيبك خرم!. 4 البت سألت أمها قالت ليها انتى ابوى بعرف بعوم قالت ليها بتسألى ليه قالت ليها لأنى سمعت ابوي بقول للشغالة انا غرقان في حبك!. 5 واحد من الصعيد جاب في كشف النظر 6/6 قال لصاحبه انا كان ممكن اجيب اكثر من كده لو ما الدكتور لخبطني. 6 صعيدى كل يوم يدعو ربنا يلد ولد، بعد 15 سنة اكتشف انه لازم يتزوج بالاول. 7 واحدة حنكوشها سألوها ما معنى بيت البكا؟ قالت ليهم بارتى حزين بوزعوا فيه قهوة «دايت». 8 عجوز شافت ابليس قالت ليه اعوذ بالله منك ومن شكلك، قال ليها يعنى انتى هيفاء وهبى!. 9 سكران كلو ما يمشى البيت بقيف قدام المرايا يعاين ويقول: انا كبرت جداً وشعرى بقى ابيض، كلو مرة ابوه بقول ليه انا كم مرة اقول ليك ما تقيف تتأمل في صورة جدك!. 10 صعيدى قال لأبوه عايز اخد نوكيا، ابوه قال ليه حرم ما تاخد الا بت عمك!. 11 واحد اصلع ولدوا ليه ولد سماه شعراوي!. 12 واحدة قالت لراجلها: الحق امى جاها تسمم، قال ليها امكن بلعت ريقها!. خاتمة: سوف نشارك بهذه الدموع في كتاب «جينيس للأرقام القياسية، وأنا متأكد حنفوز لانه ما اعتقد في شعب بكى واشتكى وذرف الدموع في الحب زينا. مع تحياتي،،،
