يا اخوانا ما تفتكروا انو النساء في الشرق هم المسيطرات على رجالهم الحكام وذوى النفوذ، زي جيهان السادات وسوزان مبارك وليلى الطرابلسي «حاكمة قرطاج» زوجة بن على. وعندنا في السودان منظمة W.H.O “منظمة الازواج الضعفاء”. الحكام الامريكان زي بوش وبيل كلنتون مزرزرين برضو!. واليكم ما جاء في وكالات الانباء من لندن عن بوش وكلنتون، ان ندوة كانت على الهواء شارك فيها جورج بوش الرئيس الامريكي السابق وبيل كلنتون الرئيس الامريكى الاسبق: ان جورج بوش الذي تحكم بمقدرات العالم ثمانية سنوات وبعد تسليمه للحكم لأوباما اصبحت مهامه الحالية تقتصر على تنفيذ اوامر زوجته “لورا” والتى طلبت منه التنظيف وراء كلب العائلة “بارنى” في الحى السكنى “بدلاس”. بوش قال بعظمة لسانه امام 6 الف شخص في الندوة في تورنتو ان سعادته شايل كيس نايلون وماشي يلتقط في “مؤاخذة الكلب” صاحبنا بوش بدل يشاكل مرته مشى اشتكى لامه “باربرا” وقال لناس الندوة انه منذ ان ترك الحكم قاعد ساي وشكرهم لأنهم أعطوه فرصة علشان يعمل حاجة!. بيل كلنتون الرئيس الاسبق شارك ايضاً في الندوة: وصرح انه لم يكن خائفاً من خيانة زوجته عندما كان رئيس وان تحديه الجديد الآن هو الصمت والخوف من ان يقول كلام “يجلط” فيه لأن زوجته بقت وزيرة خارجية امريكا. مذيع ساخر قال بعد الندوة بساعتين ان الرئيسين ما قالوا حاجة مفيدة، كما خرجت مظاهرات من مئات الاشخاص احتجاجاً وحمل المتظاهرون احذية لرشق الرئيسين على الطريقة الزيدية العراقية كما حملوا صورة بوش وكتبوا عليها “مذنب” ومجرم حرب وطالبوا بارسال بوش وديك تشيني الى لاهاى للمحكمة. كلينتون طلع عضو منظمة W.H.O (Weak Husbands Organization ) منظمة الازواج الضعفاء ولاذ بالصمت وقال خشمى عندى “يا ولد يا حمش”. علمت الجاسوسة الحسناء ان “أوكامبو” العامل رامبو برضو طلع برجف من الست الولية ويسلمها الماهية وبورق الملوخية وما بيخلى مشوار للعشية “ما قلتو نوبة”. هدايا الحلقة: 1. كان رجل يتمشى في حديقة في نيويورك، فجأة رأى كلب يهجم على فتاة صغيرة قام جرى للكلب ودخل في عراك معه حتى قتله وأنقذ الطفلة. في رجل شرطة كان براقب في الحدث قام مشى على الراجل وقال ليه انت بالجد بطل، بكرة حتقرأ الخبر في الجريدة تحت عنوان «رجل شجاع من نيويورك ينقذ حياة طفلة صغيرة من كلب هائج» الراجل قال ليه لكن انا من نيويورك، الشرطي: اذن سيكون الخبر «رجل امريكي شجاع انقذ حياة طفلة من كلب هائج» الراجل قال ليه لكن انا ما امريكي، الشرطي قال ليه: اذن من تكون؟ قال ليه انا عربي!. في اليوم التالى ظهر الخبر في الجريدة على النحو التالى «متطرف اسلامي يقتل كلب امريكي برئ»!!. 2. الشافع قال لأمه صحي ياماما انا مولود من بيضة؟ الام اتخلعت: ده سؤال شنو منو القال ليك كده؟ الشافع: كل ما امشي لبتاع الدكان بيسألنى كيف حالك يا كتكوت!!. 3. صاحب خيال جنه كورة امه وابوه عيانين، امه اتوفت، بعد كم شهر قاعد مع صحبانه في الشارع سمع اخوانه بيبكوا ويسكلوا قال لي اصحابه الظاهر الحاج درن!!. 4. صعيدى دخل حمام افرنجى ساق معاه مترجم!!. 5. طالب دخل الامتحان وهو ما مذاكر كتب في الورقة انا ما ذاكرته علشان امى كانت عيانة لمن مشى يجيب النتيجة لقى مكتوب عليها ساقط والف سلامة على الحاجة!!. 6. جزار مشى يخطب ابو العروس قال ليه عايز مهر 50 مليون جنيه الجزار قال ليه: حسبت الكيلو بكم؟!. 7. واحد رمى يمين الطلاق على زوجته “زاقت منه”. 8. ايرانى تزوج يابانية جابو ولد سموه آية الله سوزوكي!!. 9. واحد قتل نسيبته – المتحرى قال ليه اسمك منو؟ قال ليه اكتب فاعل خير!!. 10. الشافع قال لامه بتضربينى ليه اصلوا انا بابا؟. 11. واحدة قالت لجارتها شفتى المصيبة رسلت راجلى يجيب ملوخية ضربه دفار قتله قالت ليها سجمى وعملتى شنو؟ قالت ليها ابداً عملت أم رقيقة!. 12. واحد قال لصاحبه المشكلة البينك وبين مرتك انتهت على شنو؟ قال ليه كيف الولية اجرست وركعت على رجليها قال ليه لما ركعت قالت ليك شنو؟ قال ليه قالت لي انت لو راجل اطلع من تحت السرير يا جبان!!. 13. الولد سأل ابوه قال ليه صحى الحب اعمى؟ رد عليه عاين لأمك حتعرف الاجابة!. خاتمة: قالوا سيدى بي سيدو والتعملوا بي ايدك يغلب اجاويدك، عرفنا ان وريق الخضرة وفرمها هو لغة عالمية، والله نسوانا فيهم هوده وريق الخضرة ممكن لكن قش الحوش وعمل بامبس للكلب دي كتيرة يا امريكا!.