المصطلحات العصرية كثرت الأيام دي ويستعملها الشباب صغار وكبار وخصوصاً أولاد الجامعات، كما يستعملها الكبار بصورة محدودة خصوصاً في الاسم الحركي للولية، وبما أنها تقع في دائرة الشفتنة رأينا أنه لابد من شرحها للناس «الغُشماء» والكيشة حتى يأمنوا شر مستعمليها، قديماً قيل إذا أردت أن تأمن شر قوم تعلم لغتهم. أ- الإسم الحركي للولية: وزعت استبياناً على نخبة منتقاة من منظمة Weak Husbands Organization (W.H.O) وهي منظمة الأزواج الضعفاء وكانت الحصيلة من تسمياتهم لزوجاتهم كالآتي: المعارضة، الحكومة، الحاكم العام، وزير الداخلية، أم المعارك، القوات الغازية، وما خفي أعظم. ب- غسيل الأموال: غسيل الأموال في المصطلح الاقتصادي معناه أن هناك فلوساً آتية من مخدرات أو بيع أسلحة أو عبر طرق غير شرعية ويسعى أصحابها لإكسابها الشرعية وذلك بإدخالها في الدورة الاقتصادية عن طريق المصارف أو شراء مؤسسات ناجحة وبيعها بعد فترة قصيرة وتعرف بالإنجليزي Money laundering ولكن المقرمين عندنا عرّفوا غسيل الأموال في السودان بعملية تفتيش الزوجة لجيوب بناطلين أو جلاليب زوجها قبل رميها في الغسالة او إعطاء الملابس «لود اليومية» او إرسالها للغسال او الغسيل الجاف الDry Clean. ج- من قاموس الحناكيش: 1- (مدردق ومشتت) معناها ماشي او مفارق. 2- رافع القزاز، مشخت لينا، واقف بعيد، اصطلاحات تقال للشخص الذي لا يسأل عن الآخر. 3- جر لي سلك، (اضرب تلفون). 4- (ضربت السماء جير ولا النجوم مناكير) معناها ما عملت اى حاجة شاذة. 5- عامل عمر إحساس معناها متحسس او محرج او خجول. 6- دقس معناها اتمقلب. 7- ورقه زايد، جنريتر، لاطش، طافي بلكات، فكت منه، معناها عنده مس من الجنون. 8- معزومين كلاكلة عجيبة يعنى معزومين أكلة ظريفة. 9- حزب الأمة بتاعه صعب يعنى أمه صعبة التعامل. د- مصطلحات ناس قُدام: زرة كديس في تكل عزباء، العزباء هي المرأة المطلقة التي أعطيت باقي حسابها، اى طلقوها بالتلاتة وما فيها رقشة لعرس تاني، وقد تكون معلمة أحالوها للصالح العام ولم يجددوا لها وتعيش على معاشها الشهري الذي تصرفه بعد معاناة وتلتلة، العزباء بعد ان صرفت المعاش توكلت على الله واشترت كيلو لحمة ضاني و»سبكت حلة» وقالت على بال الحلة ما تبرد تمشي الجيران لعشرة ونسة وقفلت «التكل» اى المطبخ، لكن نست الشباك فاتح.. جا كديس وقضى على الحلة عن بكرة أبيها، وجات صاحبتنا العزباء ممنية النفس بأكلة شهية، ولكن لقت الكديس بقرمش في باقي العظام، قامت قفلت الباب والشباك وشالت ليه عكاز وعينك ما تشوف إلا النور. هدايا الحلقة: 1- واحد باله طويل الترزي قصره ليه!. 2- نجار مرته تغسل في الهدوم وهو ينشرهم!. 3- واحد شخصيته مهزوزة الطبيب النفساني ركب ليه أريل!. 4- الولد سأل أبوه: لمن اتزوجت الجاب ليك الشيلة منو؟ قال ليه جدك، والجاب اوضة النوم منو؟ قال ليه جدك، طيب أمي جابت ليك شنو؟ قال ليه جابت لى الضغط!. 5- الراجل سأل بنته هل نجحت في امتحان قيادة السيارات؟ قالت ليه ما عارفه لسه لأن الزول الامتحني لا زال في الإنعاش!. 6- واحد مشى الطبيب النفساني قال ليه كل ما اشرب شاي عيني توجعنى، الدكتور عمل ليه شاي وشربه ليه وعينه ما وجعته، الدكتور قال ليه شايف العلاج ده بسيط كيف؟ كل ما تشرب شاي طلع الملعقة من الكباية!. 7- واحد صحى من النوم نص الليل على صراخ الجيران، خرج وسألهم فقالوا له في تسمم في كل خزانات المياه، رجع البيت سألته زوجته في شنو؟ قال ليها مافي حاجة اشربي ليك موية ونومي!. 8- اتصل الراجل بزوجته من المكتب وقال ليها انا جاي على البيت سخنى الموية بسرعة وقفل التلفون، صاحبه في العمل سمعه قال ليه دي الرجالة ولا بلاش شكلك فارض شخصيتك في البيت تمام؟ رد عليه بقى عايزني اغسل العدة بي موية باردة؟!. 9- واحد غبي مفتاح عربيته راح منه، الميكانيكي فتحها ليه بي سلكة «طفاشة» تاني يوم عمل نسخة من الطفاشة!. 10- الأول: الليلة قريت كتير عن التدخين، الثاني: وماذا قررت ان تفعل؟ الأول: قررت الإقلاع عن القراءة. 11- الزبون لسيد المطعم أهنئكم على نظافة مطعمكم، الجرسون وكيف عرفت ذلك؟ الزبون: لان الأكل كله صابون!. 12- واحد دخل مطعم أعلن عن تخفيضات هائلة، الزبون قال للجرسون: أين التخفيض الذي تتحدثون عنه؟ الجرسون: التخفيض في كمية الأكل وليس السعر يا سيد!. 13- الزوجة قالت لزوجها الليلة لاقيت واحد ثقيل وما عنده أدب من اتقابلنا بدأ يسيء إليّ ويهددني، الزوج قال ليها مستغرباً: أين التقيت بهذا الرجل؟ الزوجة: صدفة صدمته بالعربية في الطريق!. 14- واحدة غنية وفشارة قالت لجارتها الرباطابية امبارح المطرة غسلت لينا السيراميك والحيط، الرباطابية قالت ليها البراق ما كواه ليكم!. خاتمة: المصطلحات وعرفناها وحنعمل على التعامل معها النسوان أمات يدين تقال نعمل معاهم شنو؟ مع تحياتي أحمد دولة
