# يقول رسولنا الكريم صلى الله عليه وسلم تبسمك في وجه اخيك صدقة، يعنى الابتسام والمقابلة الحسنة تعد حسنة والحسنة بعشرة امثالها، اذن الاسلام يحض على ان تقابل الناس هاشاً باشاً والعكس التجهم والتكشير ومقابلة الناس بوش مصرور زي البونية «مذموم» كما ان التبسم لا يكلفك كثير عناء ويقول اهل العلم ان التكشير وصرة الوجه تحتاج من الانسان الى استعمال عضلات اكثر ومجهود اكبر. # أهلنا الكبار يقولوا ليك بليلة مباشر ولا ضبيحة مكاشر اى المقابلة اللطيفة هي في حد ذاتها اكرام شنو يعنى زول تصر ليه وشك وتضبح ليه خروف؟ كما يقولوا قرداً يسليك ولا غزالاً يغمك. والمصريون يقولون لك اضحك تضحك الدنيا معك ابك تبكي وحدك. # وجاء في السيرة ان الرسول صلى الله عليه وسلم يستحسن من يدخل السرور على الناس وجاء تبسم سيدنا سليمان في سورة النمل «وحشر لسليمان جنوده من الجن والانس والطير فهم يوزعون * حتى اذا اتوا على وادي النمل قالت نملة يا ايها النمل اخلوا مساكنكم لا يحطمنكم سليمان وجنوده وهم لا يشعرون * فتبسم ضاحكاً من قولها وقال ربي اوزعنى ان اشكر نعمتك التى انعمت علي وعلى والدي وان اعمل صالحاً ترضاه وادخلنى برحمتك في عبادك الصالحين» صدق الله العظيم. فوائد الضحك والابتسام: 1. يحد من ارتفاع ضغط الدم وامراض القلب. 2. يفيد مرض التهاب الشعب الهوائية وازمات الربو عن طريق نسبة الاوكسجين في الدم. 3. يقوى جهاز المناعة ووسائل الدفاع الطبيعية الموجودة في الجسم. 4. يقلل من الشخير لانه يساعد على عدم ارتخاء عضلات الحنجرة. 5. يزيد من مرونة اوعية القلب. 6. يقوي عضلات البطن. 7. يخرجك من دائرة الروتين ويجدد الطاقة. 8. يوازن بين كيمياء التوتر والضغط. 9. يرفع من مستوى ادائك العضلي ويجعلك تفكر بشفافية. 10. تتلألأ عيناك عندما تضحك وتصبح اكثر وسامة. هدايا الحلقة: 1. خمسة بخلاء دخلوا محل مرطبات طلبوا كباية عصير و 5 شفاطات. 2. فار طموحه في المستقبل يكون «ماوس كمبيوتر». 3. خروف عايز ينتحر طلع الشارع يائس وقف بتاع تاكسي وقال للسائق اقرب سلخانة يا اسطى. 4. واحد جنه كورة ارسل لحبيبته هذه الرسالة «كان هدفى في الحياة ان اكسب حبك ولما تحقق الهدف طلع «اوف سايد»». 5. البت قالت لامها ماذا اعمل مع زوجي كلما اعمل ليه اكل يرميه للكلب امها قالت ليها والكلب المسكين ذنبه شنو؟. 6. واحد قال لصاحبه داير اعمل مفاجأة لزوجتى في عيد زواجنا، قال ليه: حتعمل شنو؟ قال ليه حأوديها الصين، قال ليه: في عيد زواجكم ال25 حتوديها الصين اما في عيد زواجكم ال50 حتعمل شنو؟ قال ليه حأمش أجيبها. 7. واحدة سألت راجلها قالت ليه: انت بتحب المرة الجميلة ولا الذكية؟ قال ليها: لا هذه ولا تلك.. انا بحبك انت!. 8. جزار مشى يخطب ابو العروس قال ليه انا عايز مهر خمسين مليون قال ليه انت حسبت الكيلو بي كم؟. 9. واحدة شينة جداً جاها عفريت وقال ليها اتمنى طلب احققه ليك قالت ليه عايزة كل الرجال يقعوا فيني قال ليها خلاص بكرة حأقلبك بلاعة «هاك المانهول ده». 10. ديك ودجاجة مروا بمحل شواية دجاج الديك قال للدجاجة دا مصير اي واحدة ما بتسمع كلام راجلها اقصد ديكها. 11. الراجل قال للطبيب الزهجان من مرته في طريقة الواحد يعيش بيها حياة اطول؟ الطبيب قال ليه اتزوج الراجل قال ليه وهل دا حيساعدنى؟ الطبيب قال ليه لا لكن ما حتفكر في اطالة حياتك. 12. الراجل قال لى مرته: انتى لازم تعرفى انو كلمتى في البيت زي ساعة «بج بن» قامت حمرت ليه قال ليها يعنى لا بتقدم لا بتأخر. 13. الزوجة: انت دايماً شايل صورتى معاك كمان بتشيلها المكتب ليه؟ الزوج لما تصادفنى مشكلة مهما كانت معقدة اعاين لى صورتك الاقيها اتحلت طوالى الزوجة: شايف انا مهمة بالنسبة ليك كيف؟ الزوج ايوه لما اعاين لى صورتك اقول في نفسى معقول في مشكلة تكون اكبر من المصيبة دي؟. 14. الزوجة قالت لى زوجها: بتحب فينى شنو؟ وجهى الجميل ولا قوامي المتناسق؟ قال بحب روح الدعابة فيك!. 15. جعلى لقى خاتم سليمان دعكو العفريت جاته تسلخات!. خاتمة: # الابتسام والضحك بمقدار معقول مطلوب اما الاكثار من الضحك فيوقعنا امام القول المأثور «كثرة الضحك تميت القلوب» اللهم اجعلنا من الذين يدخلون السرور على الناس والذين يألفون ويؤلفون ولا تجعل في قلوبنا غلاً للذين آمنوا انك نعم المولى ونعم المصير. مع تحياتى،،،
