رسامو الكاريكاتير عادة يتخصصون في السخرية من الرؤساء والحكام والملوك ويتناولون بالنقد عثرات الحكومات في الدولة، ويصطدمون بالسلطة ويقادون الى المحاكم ويدخلون السجون ويقفون الى جانب المعارضة ويظهرون نقاط ضعف المسؤولين، لكن تجربة الكاريكاتيرست وطبيبة الاسنان د. نجوى يحيى تجربة مختلفة فهي موالية لنظام الانقاذ وتعمل في الزميلة «الرائد» الصحيفة التي تساند المؤتمر الوطني قلباً وقالباً. فكان لوجود ريشتها بعد جديد يراها البعض كسير تلج للاسلاميين ويراها البعض طابورا خامسا بكاريكاتيراتها التي تتناول احياناً بعض مشاكل المواطنين التي يتسبب فيها الوطنيون.. جلسنا اليها لتذكر لنا عن تجربتها وعلاقتها مع ناس «الشجرة». ٭ نجوى بطاقة تعارف؟ - انا نجوى يحيي الحسين محمد من مواليد الولاية الشمالية مروي «شايقية» تخرجت في كلية طب الاسنان جامعة الخرطوم حالياً طالبة دكتوراة في المجلس القومي للتخصصات الطبية متزوجة من الباشمهندس مجاهد بلال وام لمروة وعلي وهبة. ٭ كيف بتقدري توفقي بين الريشة والمشرط؟ - كنت متفرغة تماما للرسم لكن الآن لانشغالي بالتدريب العملي اعود ظهراً من المستشفى لمطالعة الجرائد بالصحيفة واخراج الكاريكاتير. ٭ بديتي متين ترسمي في الجرايد؟ - البداية الجادة كانت في جريدتي السياسية الخاصة بكلية الطب اسمها «كاريكاتوز» كنت برسم باسمي المستعار «عيوشة» لان الحياة السياسية في الجامعة فيها مشادات ساخنة وعنف طلابي، وكنت متخصصة في السخرية من اليساريين وكانوا بعلقوها ناس معانا في الكلية بالليل. وما عرفوني لاني كنت مشهورة فقط بكتابة الشعر في شكل رباعيات ادخلتها الآن في كاريكاتيرات بصفحة الضو والرتينة يوم الجمعة ب «الرائد». ٭ رسوماتك بتشبهك ولا مختلفة عنك؟ - توجه الرسام ما بنفصل عن شخصيتو الكاريكاتيرات السودانية بنجد اختلافات في التوجهات السياسية انا اسلامية ماسكة الامانة الاجتماعية معاى ناس يساريين وناس وسط وكلنا نلتقي في قالب الكاريكاتير الساخر. ٭ رسامة كاريكاتير كوزة دا يعني انك بتكسري تلج للحكومة؟ - ما كسير تلج كاريكاتيرات كلها موجهة لضرب المعارضة ما غزل مباشر في الحكومة. ٭ يعني ممكن وانت في «الرائد» تسخري من مسؤول وطني؟ - حصل ورسمت كاريكاتيرات عن مسؤولين آخرها في قطوعات المياه والكهرباء وازمة سد مروي حتى ان احدهم اتصل وقال «الشيوعية» المشغلنها معاكم دي منو؟، وانا اسلامية لكن برضو بنتقد نقاط الضعف. ٭ كيف مع مقعد الرقيب؟ - احياناً كاريكاتيراتي ما بترى النور وزمان ايام الرقابة وهسع بعد الرقابة الذاتية ومرات بزعل لما ما يتنشر عمل تعبت فيه وبقيت اعمل كاريكاتير احتياطي خوفا من المصادرة والرقيب الخارجي ممكن مرات تزوغ منو لكن مسؤولية رئيس التحرير بتعرض لمساءلة. ٭ لو جابوا ليك فكرة كاريكاتير جاهزة بترسميها؟ - لا ما في املاء بدوني الحرية الكاملة في عرض رأيي واي رسام ما بؤمن بي فكرتو الخاصة بظهر ضعفو في شغلو ولو حاولت اجامل القارئ الذكي اللماح بعرف انو دا شغل املاء، ولو حاولت اجاري موجة انو رسام الكاريكاتير لازم يكون معارض برضو شغلي بطلع ضعيف. ٭ من الطرائف المرت بيك في «الرائد»؟ - اثناء المشاورات بين مكاوي مدير الكهرباء ووحدة سد مروي رسمت مكاوي ماسك طبلة وبغني خصخصوني ولا تحرموني وصادف تاني يوم طلع قرار الاقالة الجماعة قالوا لي انت السبب. ٭ الاسهل خلع الضرس ولا رسم الكاريكاتير؟ - الاثنين دايرين حرفنة والكاريكاتير فكرتو اصعب من رسمو وضروري عشان ما يطلع باهت اقتناع الرسام بقناعاته ومبادئ حتى يكون صادق مع القراء. ٭ في البيت انت طبيبة جادة ولا رسامة ساخرة؟ - اسرتنا حاضرة البديهة وصاحبة ردود جاهزة وسريعة وطريفة وانا في البيت كاريكاترست واتقمص شخصية الطبيبة في حال وجود وجع ضرس حاد. ٭ ما بتخافي من كاريكاتيراتك البترسميها وبكون فيها هجوم مباشر على قوى سياسية او شخصيات قيادية؟ - الكاريكاتير لا يختلف عن مقال الرأي مشكلتو بصل سريع وخوفوني ناس كتار وحذروني لكن انا بعمل بقناعات اصيلة لو ما كدا ما ممكن اعرض نفسي للخطر عشان الصحيفة وحتى الجهات التي اهاجمها تدعو لحرية الصحافة. ٭ ما شايفة انك بتبنجي وتخدري الناس بي كراكتيراتك دي؟ - انا ما بتكلم عن اشياء ما حقيقية ولا بوهم الناس بواقع غير موجود، ولا بخدرهم بدليل كاريكاتيراتي الكثيرة في نقد الظواهر السالبة زي انتشار السلاح عند الطلاب ونقص الخدمات وغيرها وانا طلعت من بيت متنوع سياسياً فيه الاسلاميين والاقرب لليسار وفيه السلفيين وفيه لا لهولاء ولا هؤلاء. ٭ رأيك شنو في مواطن ومسؤول للرسام فارس ما شايفة انو عاصر على المسؤولين؟ - عمل جميل وصادق جداً ويعجبني تناولو لمشاكل المحليات. ٭ ونادر جني؟ - من حيث نقاء الصورة المرسومة هو نمرة واحد في الساحة وبعمل تناسق بين توزيع اللون والخطوط هو الآن الدينمو المحرك لجمعية الكاريكاتير ورسوماتو معبرة حتى لو كانت بدون تعليق. ٭ كاروري؟ - عملت معاه ب «الرائد» وهو ايقونة الزمن الجميل وهو مرجع الرساميين الآن ودائماً يحدثنا عن تاريخ الكاريكاتير في السودان ورسوماتو الاولى في الستينيات بمنطقة مروي وميكرفونات الصادق المهدي وبتابع المبدع نزيه. ٭ بتتابعي منو من رسامات الكاريكاتير؟ - الرسامة اماني زين العابدين في الخرطوم هي خريجة كلية الفنون وصاحبة ريشة رشيقة وبتابع د. رنا عامر في الاسطورة وهي في بداياتها الاولى. ٭ الانتخابات بالنسبة ليك موسم الجديد شنو؟ - اكيد هي فرصة للتنافس وح اشتغل على تناقضات المرشحين بالتركيز على الشاكوش والنجمة والشمس. ٭ جمعية رسامي الكاريكاتير محلك سر؟ - كان المفترض قيام جمعية عمومية كبيرة لضم مجموعة كبيرة من الرساميين داخل وخارج السودان وقريباً حتظهر ثمار الجمعية. ٭ في رسم الصادق المهدي بتركزي على شنو؟ - تضخيم الانف واظهر العزبة. ٭ الترابي؟ - الدقن والنضارات والاسنان البارزة. ٭ سلفا كير؟ - البداية من الطاقية. ٭ اسحق احمد فضل الله؟ - النحافة. ٭ شخصة رسمها صعب؟ - ياسر عرمان ما عندو شيء مميز ممكن نركز عليه عشان يتعرف. ٭ والبشير؟ - رسمتو كتير واغلب الكاريكاتيرات كانت بالجلابية والعمة، لكن رسمته بي مزاج ورايقة خاصة ايام اتفاق الدوحة. ٭ بتفكري في شنو مستقبلا؟ - اتمنى اصدار كتاب كاريكاتير باسم الضو والرتينة خلال الايام القادمة.
