دعونا نسأل هل هناك رابط بين النشال والاسهال والاستهبال «مجموعة الشفوت العالمية» في موقعها على الانترنت المحلى «بسوق القش» عملت دراسة اجتماعية واستبيانات وخرجت باجابات لهذا التساؤل: 1. النشال: هو نوع من الحرامية خفيفى اليد، النوع الذي ينشل الكحل من العين، يعنى ينشلك لمن تآمن، ونجدهم في اماكن الزحام وشعارهم «الزحمة فيها الرحمة». # في البص يزنقك وينشلك وكذلك في السوق.. واسهل انواع النشل عندهم من جيوب الجلاليب، ويستعملون في ذلك امواس الحلاقة بطريقة فنانة.. يشرط جيب الجلابية ويخليك «تلف صينية» وكذلك في الجوامع وخصوصاً في العقودات الكبيرة، ويركزون على الاوراق النقدية ذات الفئات العالية والموبايلات الغالية، أما «3310» يقولوا ليك دا حق «مشاطات» وما عنده سعر في السوق والحرامية يكثرون في الاعراس الفخمة التى يذهبون اليها بدون عزومة طبعاً بعد نزول اسعار الاحذية والمراكيب قلت سرقت الاحذية في الجوامع فقط بقت مركزة على مراكيب النمر الجديدة التى يزيد سعرها على المئآتى جنيه وبمناسبة المراكيب الراجل قال لبتاع الاحذية الذي رفع سعر المركوب قال ليه عايز تغشنى «نحن اولاد المراكيب». # بتاع المراكيب المتجول في سوق امدرمان كان مالى القفة مراكيب وشايل واحد عينة في يده قام سلم على المرحوم احمد داؤد ولوح له بالمركوب الذي بيده قام احمد داؤد ملص مركوبه ولوح به ورد عليه بتحية احسن منها. 2. الاسهال: الاسهال بدون مؤاخذة هو الاضطرابات المعوية التى يصاحبها الم ومغص واخراج متكرر للفضلات ولو زاد عن حده «يصبح كوليرا عديل» زي ما قالوا الاسهال المائي هو اسم الدلع ل»الكوليرا» الاسهال يفقد جسم الانسان السوائل واذا لم تعوض بدربات ومضادات حيوية يلحقوك «الدورية» وزمان كان يضعوا الشخص الذي عنده اسهال في الكرينتينة حتى لا تصل العدوى للآخرين. # وايام الكوليرا زمان الراجل كان خايف من الكوليرا وشعر ب «كركبة» في بطنه وهو شايل الابريق وماشي ال WC ويقول يا الله القوي يا الله القوي تجيبه قوي. «ولما اسهل» قال امانة ما كِتل راجل. # المرأة ذهبت للدكتور قالت ليه عندى يادكتور امساك ليه شهرين ما راح الدكتور قال ليها نصيحتى ليك الايام دي امسكي في الامساك قوي. 3. الاستهبال: ظهرت مجموعات احترفت الاستهبال في جمع الفلوس.. وهنالك من يظهر امام الاجزخانات لاكمال حق الدواء للطفل الوهمى وآخرون امام طلمبات البنزين وآخرون امام محلات بيع الاجمالى ودكاكين الحلويات.. والنوع الاخطر المجموعة التى تجمع التبرعات للمدارس والمستشفيات والمساجد باوراق مزورة. # وهناك مجموعة في بكاسي ومعهم واحد ملبسنو سروال وعراقى وادوه سبحة لالوب كبيرة يجيك واحد منهم يقول ليك سلم على شيخ فلان او الخليفة فلان.. ونحن جاينك اتوسمنا فيك الخير وبقيت القصص الممجوجة.. طبعاً هناك حالات حقيقة لكن بنعرفها كيف؟. هدايا الحلقة: 1. واحد من اهل المزاج لفة ليه سيجارتين وقام ختاهم تحت الزير علشان يرطبه جا الديك فرتق السيجاير واكل الحشوة صاحبنا اداه علقة وحبسه في القفص، في القفص كان في ديك آخر قام سأله قال ليه سرقة ولا شكلة ولا سياسة؟ قال ليه لا مخدرات!!. 2. واحد غبى عايز يغرق صاحبه في البحر قام خرم ليه المايو!!. 3. ارهابي غبى حاول يفرقع مبنى وضع القنبلة في الدور الاول واستخبا في الدور الثاني!!. 4. بقرة قاعدة تبكي علشان قالوا لراجلها تور!!. 5. واحد لاقى صاحبه جاري في الشارع سأله مالك؟ قال ليه نسيبتي اشتريت ليها نص كيلو سمك اكلته ني اصيبت بشلل نصفى قال ليه انت ماشي تجيب ليها الدكتور؟ قال ليه لا ماشي اجيب ليها نص الكيلو الثانى!!. 6. واحدة من اهل العوض راجلها اشترى ليها علبة كريم تانى يوم حشت بيها سندوتشات للاولاد للمدرسة!!. 7. واحد صينى اتزوج واحدة يابانية ولدوا انسان آلى!!. 8. جعلى بهزر مع مرته رماها من الدور الخامس، طلعت وقالت ليه والله تانى ما العب معاك!!. 9. البت قالت لامها راجلى اتأخر خايفة يكون متزوج واحدة تانية قالت ليها اتفاءلى يمكن داسته عربية!!. 10. واحد زوجته جات لقته بيقرأ في كتاب «الرجل سيد المنزل» قالت ليه انت لسع بتقرأ في الكتب الخيالية دي؟. 11. واحد صاحب خيال يوم عرسه بعد المعازيم مشوا دخل البيت لقى العروس قاعدة قال والله انا كنت متأكد الناس الكتار ديل حينسوا زول!!. 12. واحد مسطول لقى واحد عنده شامة فوق لى عينه قال ليه دي عين ولا غين؟. 13. واحد من اصحاب الخيال امه صحته قالت ليه قوم يا ولد الشمس طلعت قال ليها دخليها واقفلى الباب وراك!!. خاتمة: # والرابط بين الاسهال والاستهبال والنشال في كل هذه الحالات انك تفقد حاجة مع انه فاقد الشئ لا يعطيه في الاسهال العدوى والفيروسي يمكن يفقدك صحتك ولو بقت «لعبة خشنة» يمكن يفقدك روحك ? والنشال يمكن يفقدك قروشك او موبايلاك.. وفي مرات مستندات مهمة لا تعوض اذا نشل شنطتك. والاستهبال يفقد المجتمع قيماً وكبرياءً وعزة نفس كنا نعتز بها في مجتمعنا. الله يكفيكم شر النشال والاسهال والاستهبال.. وكشف الحال.