الزواج يا بصل يا عسل الزيجة التى تجمع بين الرجل والمرأة تحتاج لتوفيق كبير من الله سبحانه وتعالى، اهلنا بقولوا بيت الزوجية هو شيء مقدر ومكتوب ولأن المرأة من ضلع الرجل هذا الضلع ممكن يكون (جميل ومستقيم) ويجعل حياة الفرد مستقرة وفي سعادة دائمة. اهل الحكمة بقولوا الزواج هو برميل نصفه عسل ونصفه التحت «زفت» والسعداء من يفتحون البرميل بالطريقة الصحيحة فهؤلاء ينعمون بفترة جميلة أما «الشليقين» فهم الذين بالشفقة يفتحون البرميل من قعره فيظهر لهم «الزفت» فيزفت حياتهم ولكيلا يقع هؤلاء في الزفت وعلشان ما «يتجلبطوا» بيه نسمعهم الأغنية الدارفورية التالية والتي بعنوان: «أ» بنيتى حسابك كلام راجل اسمعا: بنيتى حسابك كلام راجل اسمعا انتى حتى عجاج بيتك عنقريبه فرشي وكورة ام قعر تحت سريره جيبى ختى وجارتك «المهوهوه» لى بيتك بيخربي وقالوا وقلنا في لسانك لا تجيبي بنيتى حسابك كلام راجل اسمعا راجل كان ما ناداك لا تمشي تلحقا بلا اذنه لا تمشي لى محل ما جرى فجر كان ولا عنده لى عشية امهلا لا تخلى ينقنق ولى كلامه تسفها المى وساخة في خشم بيت لا تكشحا اوعى تقوى راسك بكرة يقولوا طلقا نصائح عظيمة وقالب ظريف نلخصها للحناكيش: 1. اسمعى كلام راجلك 2. نظفى البيت والسرير 3. اهتمى بتغذيته 4. ما تسمعى كلام النسناسات والقوالات 5. ما تبقى خفيفة خليك تقيلة 6. ما تضايقيه بالمطالب الفورية 7. ما تسفهى كلامه 8. لو ما سمعتى كلامه وقويتى راسك حتطلقى حتطلقى نقول لناس دارفور: يا أخوانا أوع لى كلام اوكامبو تسمعا. «ب» حوار سنة العسل وسنة البصل: تم هذا الحوار في الايام الاولى من شهر العسل بين الزوج وزوجته: الزوج: يا سلام اخيراً تحقق الحلم. الزوجة: عاوزنى ابعد عنك؟ الزوج: لا اوع تقولى الكلام ده مرة تانية الزوجة: انت بتحبنى؟ الزوج: اكيد الزوجة: طيب ممكن تفكر تبعد عنى؟ الزوج: طبعاً لا الزوجة: طيب ممكن تشترى لى غويشات؟ الزوج: طبعاً وعلى يدينك الاتنين الزوجة: طيب تعتقد انك ممكن تضربني في يوم من الايام؟ الزوج: لا طبعاً انا مش من النوع ده من الرجال الزوجة: ممكن اثق فيك؟ الزوج: ايوه الزوجة: يا حبيبي بعد سنة من الزواج جرى هناك حوار آخر، إقرأ من جديد من تحت لى فوق!. هدايا الحلقة: 1. طالب مسحلب زميله قال ليه المثابرة تولد النجاح قال لى زميله اول مرة اعرف انه «المثابرة» بقت داية!. 2. المرأة قالت لى راجلها بتحب فينى شنو؟ وجهى الزى القمر ولا قوامى الممشوق؟ الراجل عاين ليها من تحت لى فوق وقال ليها بحب فيك روح الدعابة!. 3. المرأة الغنية سألت خدامتها الجديدة قالت ليها انتى بتحبى الكدايس؟ الخدامة قالت ليها ما تشيلى همى انا ممكن آكل اى حاجة!. 4. الشاب قال لى خطيبته الانتهازية انا ما زى عمر عندى عربية همر ولا بيتنا عمارة ثلاثة طوابق ولا بقضى اجازتى في لندن لكنى بحبك، قالت ليه انا برضو بحبك لكن كدى احكى لى اكتر عن عمر صاحبك!. 5. واحد بلع ليه موس جرحت مشاعره!. 6. ولد رباطاب بيشرب في سيجارة شاف ابوه جاى كتم دخان السيجارة ابوه بتكلم معاه الدخان جا طالع قال ليه ده شنو؟ الولد قال ليه ده تسالى، ابوه قال ليه طيب انت قاعد تقلى فيه ولا شنو؟!. 7. ثلاثة من اصحاب الخيال قالوا عايزين يحاكوا صوت المطر: الاول قال انا الرعد «دل دل دل» الثانى: قال انا المطر «طق طق طق» الثالث: كسلان شال المراتب وجرى دخل الاوضة!. 8. واحد رجافة مشى لى صاحبه دق الباب فتحت ليه اخت صاحبه جميلة جداً قال ليها صلاح في؟ قالت لا والله مرق قال ليها كويس كان جاء اقول ليه جاهو منو؟!. 9. واحد من اهل الخيال جنه موبايلات زوجته جابت طفل اخرس وداه الدكتور قال ليه نزل ليه نغمات!. 10. ثلاثة رباطاب مشوا يوم الوقفة للترزى يجيبوا منه جلاليب العيد لما قاسوها لقوها كلها قصيرة قاموا يداعوا فيه: الاول: قال ليه اريتك بالقصر اليخليك ماشى وطاقيتك جارة في الواطة. الثانى: قال ليه اريتك بالقصر اليخليك تتشابى للفنجان. الثالث: قال ليه اريتك بالقصر اليخليك قاعد في البرش وكرعيك مدلدلات!. خاتمة: ارجو ان تكون ايامكم كلها عسل في عسل وما تقرفوا من البصل لانه معقم جيد وفي اياديكم ان تجعلوا من عش الزوجية «منحل» دائم.
