فاهمة ذكية ما بتعرف تقول ده محال لو تطلب عيونها سريع تجيب في الحال رؤوفة حنينة تعرف كيف تستر الحال ٭٭٭٭ لوعتي القلوب الديما تترجالك وليك يدعو الجميع من المرض الجالك كنت صبورة والمقدور دوام في بالك ومن حسن الختام الجنة في استقبالك ٭٭٭٭ ابكن يا بنات عزن رجال الحوبة في الجود والكرم بالفطرة ما مغصوبة لي بيوت الكرام حتما تكون منسوبة وضمن الصالحات غير شك تكون محسوبة ٭٭٭٭ دارك للجميع زادك يفيض لي جارنا يا نور العيون بعدك فقدنا حنانا النوم والصبر ما صاروا من انصارنا والنوح والعويل لوع صغارنا وكبارنا ٭٭٭٭ كنت السلوى يوم والدنا فارق دارنا بالقلب الحنون ساقت خطاك مشوارنا يا بت الرجال البيك كبر مقدارنا اقدار الزمن دايماً تشيل اخيارنا ٭٭٭٭ (اشراقة) اشتهت لو تلحقك تقفاك وفي دار الخلود الحالة ما بتخفاك كل الناس تجلك ومافي زول جافاك نرجو المولى بالرحمات سريع يلفاك ٭٭٭٭ مافيش حاجة قاسية على الكريم يا امي وين القى الصبر يا الكنت تفرجي همي بعدك طال عذابي وزاد شقايا وغمي ما بيجدي الصبر لو يبقى خالي وعمي ٭٭٭٭ بشوف يا ام (سلمى) بعدك كل شيء متغير جميع من عاشرك بات في ذهول متحير خيار الناس دوام محسود وعمرو قصير وحكم المولى نافذ في الكبير وصغير ٭٭٭٭ علينا الكون ظلام يا ام (عصام) و(رشيد) واسمك لينا كان اعذب نغم ونشيد في كل الامور رأيك دوام هو سديد والناس اجمعين بالطيبة بيك بتشيد ٭٭٭٭ من رمضان يهل نظرك يكون في العيد والناس منو تشكو وزمنو لسه بعيد وجهك منطرح بالفرحة يبقى سعيد تتمني الكريم لصيامو تاني يعيد ٭٭٭٭ ناس (سامية) و(سهام) ردحن عليك شديد امسوا حيارى فاقدين قبلتك في الليد (الهام) صابرة محتسبة ولجاما حديد ومن بعدك (سناء) قبلانة حكم السيد ٭٭٭٭ في دار الخلود المولى يسعد حالك بعد نجمك افل ترك الظلام الحالك رضوان في الجنان واقف لاستقبالك زافاك الملائكة بعيدة من نار مالك ابنك الحزين أحمد شمس الدين عبدالله جبل اولياء / الحلة الجديدة