الزمن هو عمر الانسان ساعات واياما وشهورا وسنين لذا كان الرسول صلى الله عليه وسلم يوصى بالاستفادة من العمر المحدود والزمن الموقوت للاستعداد ليوم الميعاد. كان صلى الله عليه وسلم وصحبه يحرصون على الصلاة في اوقاتها وسائر العبادات والمعاملات. ان الزمن والوقت والاجل واللحظة والساعة اسماء لها رباطها الوثيق بالانسان منذ نشأته وخروجه للدنيا الى يوم وفاته. اذاً فلابد من قياس الزمن وصحبته والاستفادة منه. يقول الاستاذ عبد الحميد محمد حمد في كتابه (الزمن في القرآن) يقف الزمن في مقدمة علامات ومعالم الحضارة الانسانية، اذ هو تاريخ وميقات ووعاء يضيق ويتسع فيه عمر الفرد والجماعة والامة والبشرية بأجمعها فيستوعب الاحداث ويوثق لها فينسجم مع الواقع الحاضر ويحفظ الماضي ويخطط للمستقبل وتبقى نفثات الامم تاريخاً وثقافةً وعلماً، وعليه كان من المفروض ان تكون الامة المسلمة اكثر التزاماً بالزمن وان يكون المسلم عنواناً صادقاًً للاخلاق والالتزام بالزمن وليس مقولة «مواعيده مضبوطة زي الخواجات». 1/ يا زمن وقف شوية واهدى لى لحظات هنية وبعدها شيل باقى عمرى وشيل شبابي وشيل عينى «ابراهيم عوض». المريخاب منتظرين الهلال يتعطل. 2/ من زمان انا كنت عارف الزمن لى ما بسيبك ورغم ريدى كنت حاسس انى زي الماحبيبك «هاشم ميرغني». واحد بيخاطب في الماهية. 3/ اقابلك في زمن ماشي وزمن جاي وزمن لسع اشوف الماضي فيك باكر اريت باكر يكون هسع «وردي» طالب منتظر النتيجة. 4/ بالله يا الطير المهاجر للوطن زمن الخريف تطير ما تضيع زمن «وردي» حكم كورة راجع بعد غربة. 5/ لا زمنى ابتسم ولا فارقت هم اصل الريد قسم مقسوم لى الم «عبد المنعم الخالدي». 6/ يا زمن جيب كل احزانك تعال جيب المحن «الجابرى». 7/ اصلو طبعك يا زمن لا راضي انت تغيره ولانحن راضين بالمحن «ابن البادية». 8/ زمنى الخائن ما بدور ليه شهود ظلمك باين. «حقيبة». 9/ الزمان زمانك اهدي لي من فضلك نظرة من رمانك. «حقيبة». شماسي بيخاطب في فكهاني. هدايا الحلقة: 1/ شافع بليد في المدرسة صحى بالليل شاف حرامي بيسرق لمن جاء طالع الشافع قال ليه يا تسرق «شنطة المدرسة» يا اكورك اصحي الناس. 2/ واحد عنده حبس بول مسفرنه مصر للعلاج ومعاه مرته بعد الاقلاع الكابتن قال للركاب «انا لله وانا اليه راجعون حدث عطل في واحد من محركات الطيارة وسنحاول الهبوط الاضطرارى» بقوا واحدين يتشهدوا وواحدين يقرأوا في يس والماحافظ قرأ طلع البدر علينا في اثناء هذه اللحظات زوجة الرجل قعدت تزغرد، الجماعة قالوا ليها نحن بين السماء والارض وراجينا موت تقومى تزغردي؟ قالت ليهم الراجل ليه شهور ما بال هسع الحمد لله بوله ما وقف!. 3/ واحد من اصحاب الخيال كتب خطاب لحبيبته قال ليها «قلت للقمر تسمح توصل سلامي لحبيبتي وما تتأخر. القمر قال ليه «سواق ابوك انا». 4/ صحفى سأل مليونير مين السبب في نجاحك كمليونير؟ قال ليه زوجتي. الصحفى فعلاً وراء كل رجل عظيم امرأة. حالتك كانت كيف قبل الزواج؟ قال ليه كنت ملياردير!. 5/ جعلى بلعب ولده الصغير «بنقذ فيه» جدعوا في بيت الجيران. 6/ واحد مكسر دخل المستشفى الممرضة سألته هل انت متزوج؟ قال ليها لا دا حادث عربية!. 7/ حبشي اسلم قالوا ليه لما تجي تاكل قول بسم الله علشان الشيطان ما ياكل معاك. المرة الاولى نسى، المرة الثانية نسى، المرة الثالثة لما جا ياكل طلع ليه الشيطان دموعه جارية قال ليه يا زول عليك الله تاني لمن تجى تاكل قول بسم الله، ياخي هردت مصارينا بالشطة بتاعتك دي!. «هاك الزغني وشطة الحبش دي». 8/ صاحب خيال مشى للدكتور وقال ليه «يا دكتور انا انتهيت وحالتى صعبة» الدكتور قال ليه خير ان شاء الله ما تخاف هدئ نفسك، صاحب الخيال قال ليه شفت حلم انى اكلت 15 كيلو لحمة شية، الدكتور قال ليه بزعل يا بن العم انا دكتور باطني مش مفسر احلام. صاحب الخيال عارف انك طبيب بس المشكلة يا دكتور لما صحيت الصباح ما لقيت المخدة!. 9/ واحد مشى للطبيب النفسي قال ليه انا كلما انوم بحس انه في واحد نائم تحت السرير انزل تحت السرير احس بيه فوق السرير. قال ليه علاجك سهل 20 جلسة الجلسة ب 200 جنيه عمك مفلس ما رجع للدكتور بعد شهرين لاقاه صدفة سأله انت ما جيت ليه؟ قال ليه انا حليت المشكلة براى وب 10 جنيه بس يا دكتور. الدكتور قال ليه كيف؟ قال ليه نشرت كرعين السرير وبقى لا فوق لا تحت!.
