(التيار) الباب البجيب الريح غنية بالعصر مرورو.. اغنية بناتية تراثية.... سمعتها من كل الفنانين الشباب تقريبا.... اكتر من عشرة من مشاهير الغنايين.... كلهم يجو ويوقلو بالعصر مرورو.... ما قدرت احدد الزول الحايم بالعصر دا..زول واحد ..والناس ديل كلهم منشبكين فيهو.... واللا هم مجموعات زيلان لافين بالعصر... ولو كانو مجموعة لافين بالعصر... تكون البلد دي قطع شك مافيها زول قاعد قاعد عند اهلو العصر..علا زولا يكون مرضان.. واللا نايم بعد الغدا.... ايام كان الغدا بالعصر مرورو برضو.....طيب دي غنية قديمة .... والزول البيعنو ليهو دا متعود يمر بالعصر.... يا ربي يكون بتاع شنو دا البيمر العصر؟... بتاع عناقريب؟ ابدا لا وطبعا لا.... بتاع الخُرد؟.. ابدا لا وطبعا لا..... بتاع الموية؟ ابدا لا وطبعا لا.... بتاع الترمس والكبكبي؟.... ابدا لا وطبعا لا.... الزول الشايل الادوية البلدية ويكورك بها داك ... ويكورك...(وجع الضهر...وجع الكرعين.. وجع الاضنين... وجع العيون.. وجع الضرس... الرطوبة... السكري... البواسير.... البواااااااااااااسير.....)..الرسول يا انت منو بالعصر مرورو؟... قالو الدكتور يمر العصر بالعنابر...ويشوف المرضانين خبرهم شنو؟...قالو ضابط يمر على العساكر العصر يهجمهم هجمة السواد....قالو المدرس يجي ماري بالحلة والشفع يشوفوهو وكل واحد فيهم يشيلها جرية علي اهلو....زمن كان المدرس يخوف الما يخاف....الشافع يجري وامو تجري وحبوبتو تجري.... والبلد كلها تجري لما المدرس يكون بالعصر مرورو..... كان المدرس سلطة.....لا تعلو سلطته الا سلطة الشرطة او العمدة في القرى... سلطة لم يشرعها قانون..ولكن... نصبه المجتمع كسلطة قضائية وتنفيذية.. لما يجيبو الشافع للمدرسة لاول مرة ويقولو للناظر (اديناك اللحم وادينا العضم)...وهو تفويض غير منقوص في ان يدق التلميذ ويسوي فيهو الدايرو....وكم من معلم قد دق بدون مبرر واضح معتمدا على فرمان(اللحم والعضم).....بالعصر مررو... ربما يكون الترام.... الغنى ليهو خليل فرح لما كان بيتمنى يمر بالطريق الشاقيهو الترام.... قدلة يا مولاي حافي حالق بالطريق الشاقيهو الترام...وقطعا يكون خليل داير يقدل بالعصر... حسي في الزمن العلينا دا... وقت العصر اتمحق... نصو في زحمة المواصلات والشوارع والنص التاني تصل البيت تملص تتغدا.... مندوب ما ختيت كباية شاي الغدا.. يكون المغرب أذن.... بالعصر مررو قيل انها قيلت في الشيخ ودبدر... عندما كان يمر العصر على الحيران...ولكنني لا اظن ذلك...منو البتقدر الزمن داك تقيف وتتغزل في الشيخ ودبدر؟... علا مجنونة تكون جابوها تتعالج... تتاوق وتقعد تكورك(حبيبي وييييييييين البعصر مرورو)...والشيخ يرد عليها(اسكتي..اسكتي..الله يقطع شيطانك يا المسيخيتة).....سمعتها على احدى القنوات وترددها مجموعة من اساطين فنانات الدلوكة... وكنت حريص على ان اتعرف على الزول الحائم بالعصر دا منو... لقيتو مرة دكتور...مرة عسكري..مرة ضابط... مرةمواطن صالح لابس طاقية في راسو.. وشايل عكازو فوق كتفو... ويقدل..بينما انا مشغول ذات عصر بالكشف عن هوية البعصر مرورو طرق الباب ..فتحت الباب لقيت شاب واقف بين اكياس القمامة القدام خشم الباب في يدو قلم وقال لي(دايرين حق النفايات)...فتيقنت ان البعصر مرورو هو بتاع النفايات!.. قفل الباب:- في حارتنا ديك سادي, سفاح ينتف ريش دجاج الحارة كل صباح ينقرهن.. يطاردهن.. يضاجعهن..ين ويهجرهن.. ولا يتذكر أسماء الصيصان..
