جاهزين خلقه كضاب البقول عبّونا ما بهدونا ناس باقان وسلفا وبونا الفرقه البين طباعنا بعيده شاسع بونا فكّانا الله من ديل البراهن أبونا ٭٭٭ برمنو الحفر الليهن قبيل حفار قلت الانفصال قايلنا نحن أنفار بدل ما تكون رئيس لي كل خير وفار شهّيت ناسك البصله التقبض الفار ٭٭٭ قول لي سلفا يا ما تجيك رجال وسرايا في ارض الجنوب ما بتترفع لك رايه دخلت حربنا خاسر لا فهم لا درايه بدل ما تخودا كان تكسي المعاك عرايا ٭٭٭ كم كم بالتفاوض أعزه مننا راحو؟؟ ولو تتفاوضو في قبورن آ برتاحو ولو تضيعو النصر بعد استلام مفتاحو أكتلوه الرخم وكتين كسرتو جناحو ٭٭٭ قول لي كرتي على الصلح أصلو لا تتجارو ما دام النجوس فرتك دليلن وحارو خلو كمال برا لا من يتم مشوارو سمح دق الحديد ساعة المروق من نارو ٭٭٭ قول لي سلفا كير قول لي جميع طابورو تلقو النار مولعه وين قصدتو تزورو نفرح بي لقا اليوم الطرابا صقورو موت العنقريب زي خالد آ بندورو ٭٭٭ تقال عند الطمع عند الفزع خفينا ناركن يا العلوج كم كم وكم طفينا من دم الجهاد لا الليلة ما جفينا ومن غردون جياع لا الليله ما اتكفينا ٭٭٭ نحن الجيشنا ما ورثنا اصلو شماته بيعرف حسمة المعركه التفح داناتا لي جنساً ما بينساق الا بالخراته الصاع ما بنردو اتنين نردو تلاته ٭٭ نحن تملي فوق ضهر العواتي شديدنا واليوم الكعب بفرح قلوبنا يزيدنا قواتنا المسلحه بيها مالين إيدنا ما بنتكيف اما كان عدونا نديدنا ٭٭٭ نحن الجيشنا لي يوم الكريهة جرارق هجليج أندلس وكمال بقالن طارق آدم سوا فعلاً للعوايد خارق وعادل للخصيم طاعون ولهبا حارق ٭٭٭ الجيش كلو ألويه لي حماك منطلقه والارض قايمة من اطرافا دانه وطلقه سكران الكلبات فيها شن داير يلقى بنتم المشاط يا عزه فوق الفلقه ٭٭٭ بعد ما بقيتو في عب اليهود تنجحرو اليبشر عقيدكم بالحراب في نحرو زحفاً عتم الضي في سماهو وبحرو وكتاً بدري بمرقلك بيانات دحرو ٭٭٭ قبيل شايلنكن متل الصغار بندلع وما أظن تقدروها وكت تهب وتولع وكت أوقدتو نارا بديتو في البتضلع نخليكم مقوت الفوق فروعو مصلع ٭٭٭ عرمان والحلو وعقار ملوك النادي لا يوم النشور يعتبرو لينا اعادي بنسمح بالتفاوض والكلام الهادي بعد كاودا ارتكاز والعين تلاحظ غادي ٭٭٭ في درب الهدايه مسكنا ما طشينا في هجليج ضهر مثل الاسود خشينا إن ما وصلنا كاودا وللعميل كشينا أعرفي آ السمحه من الفينه ما اتفشينا ٭٭٭ قول لي سلفا هجليج نحن يانا درقتو لو مكن مي كان ب فرحه منو مرقتو رفضك للسلام اليوم تعرفو فرقتو يوم نتلاقى الحشاش بيملا شبكتو