المرحوم الحاج عبد الرحمن شاخور هو المرحوم الهرم الحاج عبد الرحمن حسن الشاذلي المشهور بحاج شاخور وهو يعتبر ابو ظرفاء ام درمان من مواليد مدينة ام درمان ودنوباوي حوالى عام 1912م لعب لفريق المريخ العظيم في خانة الجناح الايمن ، تقلب في المناصب الادارية وكان من اشهر امناء الخزينة ، ترأس المريخ مرة واحدة تحت الحاح واصرار اهل المريخ وكانت فترته مليئة بالانجازات . يحب ان يشارك في امور المريخ من خارج المجالس ترأس »لجنة البرش« . كان الاب الروحي للاعبين والمشجعين على حد السواء قال عنه اللاعب الفذ كمال عبد الوهاب يكفي ان تكون هناك شخصية مثل شاخور لتحريضنا على الانتصارات . عند بداية الاندية وعندما خصصت الارض للمريخ وكان يدفع من ماله ويستدين المواد لحين سداد المجلس .. لانه لعب الكرة بالمريخ ويعرف اسرارها وخباياها ويعرف لغة التخاطب مع اللاعبين كان من انجح الاداريين .كان رحمه الله يستمد ظرافته من ذكائه الحاد وحسن تصرفه وسرعة بديهته نحكي عنه هذه القصص والحكاوي : 1 في لقاء تلفزيوني على الهواء كان يستمع للمذيع فريد عبد الوهاب وهو يستضيف الفنان المبدع محمد ميرغني تغني محمد ميرغني باغنية »ارجوك يا نسيم روح ليه« وطرب شاخور الذي كان يحب الحقيبة ويتمتع بصوت جميل باداء محمد ميرغني واشاد به ، وعندما علم بهلالية محمد ميرغني في نفس اللقاء تحول 180 درجة وقال للحاضرين ده غنا ده شوف الزول ده صاري وشه وبيرفس كيف ؟ 2 كان تاجر عيش مشهور وبما انه انصاري ومن ودنوباوي كان السيد الصديق المهدي يكلفه ببيع انتاج العيش ويتحدث معه بالتلفون كثيرا استلمنا كم ووردنا للبنك كم وظنت حكومة عبود بعد مراقبة تلفونه انه يمول المعارضة فاعتقل مع الزعماء الازهري وعبد الخالق والمحجوب ومبارك زروق وارسلوا لجوبا حفيده نهاد شاخور . قال عندما اعتقل بواسطة الكومر والبوليس كان منزعج جدا وبعد ذهبوا لمنزل عبد الله خليل فوجده لابس ومحضر شنطة »هاندباك« قال زي الماشي تمرين كوره ، في المعتقل الزعيم الازهري قال ليه انت ما عندك ذنب ولكن طالما جيت معانا تناضل معانا علشان نقلب الحكومة هو طبعا باله في المريخ قال ليه نقلبها »باكورد« فعلم الازهري ان فكره كوره وبعيد عن السياسة 3 ذهب المريخ في رحلة رياضية بدعوة من نادي النصر ورئيسه الامير عبد الرحمن بن سعود وشاخور رئيس البعثة ومولانا احمد حسب الرسول من الاتحاد ومعلوم الغيرة بين نادي النصر والهلال السعودي الامير عبد الرحمن رفض ان يلعب المريخ مع الهلال السعودي ووافق المريخ علي ذلك وانبسط الامير واخذ البعثة وعلي رأسها شاخور وذهب بهم الي المسجد الذي شيده وقال لشاخور شايف ما في هلال في المئذنة فقط شعار النصر وخزنها شاخور وعند العودة وعندما ارادوا بناء مسجد المريخ قال ليهم عايزين فتوى لوضع الهلال على المئذنة اذا كان لا بد من ذلك نلغي فكرة بناء الجامع . 4 طلب منه ناس النادي دعم لاعب العاب القوى وقتها المرحوم حسن جبريل لانه رفع 150 كيلو جرام قال ليهم والله لو رفع النادي ما بدخلها في الهلال لن ادعمه . وكذلك عندما عبر كيجاب المانش قال ليهم ما بهز شبكة الهلال ما عنده طريقة وعندما هزم السباح ممدوح مصطفى من الهلال كيجاب سباح المريخ واعتذر كيجاب بانه عضه كلب قال ليهم وهو زعلان اصله سبح في البحر ولا في السلخانة . 5 وعندما ضربت الطائرات الليبية الاذاعة ومنزل الصادق المهدي قال الطيارات دي ما شافت استاد الهلال رمت قنبلة في السنتر مش كانت ريحتنا . 6 علم ان ابن اخيه الدنقل اصبح هلاليا فارسل اليه وسأله هل انت صحي هلالابي فقال له نعم وهنا قال شاخور طيب ما احسن تبقى كافر فد مرة . 7 في الحكومة الائتلافية بين حزب الامة والاتحادي الديمقراطي وبقية الاحزاب رفعت الحكومة سعر السكر وخرجت مظاهرات الطلاب مستنكرة الزيادة واخرج الاتحاد الديمقراطي بيانا يرفض الزيادة بالتضامن مع الطلاب وهنا قال شاخور »ناس الاتحادي ديل لاعبين في فريقنا ويشوتوا في قونا« . 8 عندما خاض الهلال في عام 1987م المعارك الافريقية في كاس افريقيا وكلما يهزم فريق يذهب المريخاب شفقانين ويقولوا لي شاخور الهلال ده لو جاب كاس افريقيا وهو بالطبع احسن من كاسنا ما حيخلونا نقعد في البلد يقول لهم اصبروا . اجتاز الهلال يوفنتوس وكانون ياوندي وهم يقول لهم اصبروا ولما وصل في النهائي مع الاهلي المصري قال ليهم »الهلال يا دوب طار ما حيقدر على المصريين ديل ربنا سبحانه وتعالى لما رسل موسى لم يقدر عليهم وطلب دعمه باخيه هارون يعني رسولين وعصايه ما قدروا عليهم يقدر عليهم الهلال« وفعلا جاء لاراش الحكم وكان ما كان. 9 المريخ كان لاعب مع فريق اجنبي وكان جالس معاه واحد هلالابي مجامل تمنى ان يهزم المريخ الفريق الاجنبي فقال له انت ما هلالابي كدي خلينا نسأل اخونا بدر عبد الخالق الداخل علينا ده . بدر عبد الخالق قال لي عايز رأيي ولا امنيتي قال ليه امنيتك بدر قال ليه اتمنى ان احضر للماتش متأخر 5 دقايق القي المريخ ماخد خمسة وكمال عبد الوهاب وبشارة طلعوهم معوقين . 10 زاره صديق بالمنزل ولاحظ انه لابس شبشب لبني قال ليه »لابس شبشب كحلي يا شاخور« قال ليه »اي لكن عافصه«. 11 فريق ودنوباوي لعب ضد المريخ وهزمه واحد صفر وكان وقتها ود نوباوي مزاحم الزهرة في الهبوط للدرجة الثانية ومعروف ان معتصم ابو جميل زهراوي ، ابو جميل حرش مشجعين قاموا بمظاهرة حتى منزل شاخور وهي تردد »النجمة تحت الجزمة« وخرج اليهم شاخور وعاد وقال للجماعة الغريبة كلهم لابسين سفنجات وواحدين حفايه . شدد شاخور على الفريق وهزم ودنوباوي في الدورة الثانية هزيمة كبيرة نزل بعدها للدرجة الثانية وبقيت الزهرة بالدرجة الاولى . 12 توفيق دكه يرحمه الله تسجل بالمريخ وكانوا لا يلعبونه ولا يوضع في الاحتياطي فاحتج وطالب بشطبه من شاخور . شاخور قال ليه : ادينا كداراتنا وامشي عوقت لينا لاعبينا بي كرعيك الشتر ديل. لحن الختام هذا الرجل العظيم ودعته جماهير المريخ قبل وفاته في مهرجان بالاستاد ادخل العربة وطافت به في الاستاد وهو يلوح للجماهير والجماهير تلوح له والدموع تنهمر لهذا المشهد من الجميع وتوفى بعدها بمدة بسيطة وظلت صورته محفورة في اذهان الرياضيين مريخاب واهلة وكل الوان الطيف الرياضي .. الا رحمه الله واسكنه فسيح جناته .