كان معانا فى المدرسة زميل عزيز ذكى جداً جداً فى اى حاجه عدا (القرايه ) ملقب بالبرداح جابو لينا استاذ جديد الله يطراه بالخير مزودها حبتين ... اى حاجه بمواعيد ....الحصه ذاتها لازم تبدأ كيف كده بطريقه معينه وطقوس خاصة ......المساحه بتاعة السبورة بجيبها معاه مابستعمل (الدلقان ) الاسمو ( البشاوره ) ألفى الفصل ده .... الكراس بتاع الماده بتاعتوا لازم يكون مجلد بلون محدد........ المهم باختصار كرهنا النظام ذاتو طوالى سميناهو غردون ( الاسم الوحيد الفى راسنا للخواجات ). اها جا الامتحان ونحن شغالين انتهى الزمن... طوالى صرخ وبأعلى صوته ضع القلم انتهى الزمن .... كل و احد يجيب الورقة بتاعته يسلمني ليها.... قمنا نحن طوالى نسلم الورق بعد شويه بقينا كلنا حوله وجوطه شديده فى الوقت ده (البرداح ) طلع الكتاب عديل مش (بخره ) الكتاب شخصيا وبدا يجاوب مستغل (الكتاحه ) القدامه دى غايتو بكون جاوب على كم سؤال المهم بعد شويه اصبح (البرداح) وأستاذ( غردون ) وجها لوجه فى الفصل وتقدم لتسليم ورقتو مستر( غردون ) طبعا دى فرصته وعلى طول قال ليه بصوت واثق وصريح ... سورى أسف الزمن انتهى ومش حاستلم ورقتك .....طوالى (البرداح ) عاين ليه كده ...قال ليه انت يا استاذ بتعرفنى؟ استاذ غردون قال ليه بتهكم ليه حضرتك فنان (برداح ) قال ليه طيب بتعرف أسمى .... هنا انفجر غردون باشا وبأعلى صوته صرخ ....الله لاعرفك اعرف ليك شنو واعرف اسمك كمان نحن اصحاب ياحيوااان ( البرداح) قال ليه بس ده المطلوب... وعلى طول دخل ورقته بين الاوراق وقام جارى.. انا متأكد انو استاذ غردون بتكون جاتو (جلطه ) وقد يكون حتى اللحظة حائرا اى الاوراق التى أمامه هى ورقة البرداح وسكت شهريار عن الكلام المباح. (والله يابرداح لو كنت هسه فى امريكا كنت اقل حاجه رائد فضاء)