[email protected] كدي النسألكم من الخير .. ما حدن فيكم خابر شيئ عن الطيب إبراهيم محمد خير المعروف ب: الطيب سيخة .. الراجل ما لقى العافية من يومات فلت بجلدو من وقعة الطيارة بتاعة الزبير و أروك طون .. عايزاكم تركزوا معاي في الإحتمالات:- 1. لأنو الراجل كان شاهد عيان و كان طلّع المستورة بتتلخبط الكيمان خصوصا إنو موت الزبير لحدة الليلة دي فيها حاجات كدي ما واضحة و أنحنا ديل كرأي عام .. يموت نائب رئيسنا و ما يملكونا أية معلومة .. يا جماعة الإنقاذ كم بقينا في عيونكم ضان برضو شوية شوية علينا و بيني و بينكم إنتو الدفنتو داك هو و لاّ (حاجة) تانية؟ أصلي أنا قابلت واحد الشبه الناطق من الزبير .. بس ده لا بودي و لا بجيب... يعني ما منو خطر.. جنّو يدندن بعابر طريق لأبو اللمين. 2. يكون لمن صراع الديناصورات بدأ جوة (زريبة) النخبة .. كل ديناصور حبّ يلعب بجوكرو (يعنى الورقة الرابحة) و الطيب سيخة القايل نفسو ديناصور كشف ورقتو فغطسو حجرو بحبة خلتو يمسح أية حاجة متعلقة ب( إنقاذ – طيارة – الزبير – مؤامرة – تصفية – العرّاب (العراب دي دهن ما واضحة و ما داير ليها فهامة) و ينشّط بدل العبارات دي حاجات زي (أنا دايرسَلَطة بدل أنا داير سُلطة و سرير بدل وزير يعني يا جماعة الخير كان لقيتو ليكم واحد لسانو فالت بكلمة سلطة و سرير .. اعرفو طوالي إنو ده الطيب سيخة و ما تعتمدو على ملامحو لأنو ما بقى منها حاجة و بدل السيخة بكون شيلوهو ايسكريم). بس الله يستر ما يكونو أدوه الحبة ديك .. الحبة اللي زول لمن يبلعا بتبقيهو عميان طرشان بكمان. 3. يكون لقى جزاء سنمار (الناس الكبار أشرحو للناس الصغار منو يبقى سنمار ده).. طبعا بعدما قتل زميلو بولاد في تمرد دارفور لأنه الجماعة معتبرنو (دسبوزل) يعنى إستخدام مرة واحدة لغرض محدد ثم يرمى و في حالة الطيب سيخة دي .. ممنوع حتى يعملو ليهو (ريسايكل) (يعني إعادة تصنيع) .. سبحان الله .. شنو البشتنة الشافا الراجل الكان ليهو شنة و رنة يومات كان وزير للخدمة العامة و زياراتو (المفاجعة) ديك 4. يكون مرضان شديد و مسكين ما لاقي حق العلاج .. طيب في الحالة دي ما توضحو لينا عشان نعمل حق اللزوم (يعني كَشِف) و كلمة كشف ذاتها عندها تلاتة معاني المعنى الأول كشف الدكتور و ده أنا ما قاصداهو و المعنى التاني معناه الرقيص بالكتفين و الرقبة وسط دائرة الشلة و طبعا ده برضو أنا ما قاصداهو – يعني كيفن نرقص ليهو و هو عيان؟ ما بتجي؟ ما ممكن.. مش كده؟ المعنى العايزاهو يعنى نعمل ليهو تبرعات عشان يقدر يقابل نفقات القطن و الشاش و الحقن و يدفع بالمرة فواتير الكهرباء و الموية .. ما هو ده الواجب برضو.. معقولة بس نقصر؟ الجيران حيقولو شنو؟ و انحنا كرامتنا ذاتها ما بتسمح نشوف لينا وزير تعبان .. و المسامح كريم. 5. عاملين ليهو إقامة جبرية و قاطعين منو الإتصالات .. لا يزور و لا يُزار و حاجاتو بتاعة الضرورات اليومية الدايرها برسلوها ليهو (ديليفري) عن طريق ماسورة كبيرة من النوع البودي لكن ما بجيب. 6. يكون في إجتماع من الإجتماعات استفزوه و طلع ليهم سيختو فرفدو .. لكن كم عملتها إنت الغلطان يا الطيب الياريتني أقدر أقول ليك يا أخوي .. حكاية السيخ و المرق العنقريب و قالب الطوب دي كلها إنتهت من زمان و بعدين الإعلام ما حيقدر يهضما.. حسع فيه أساليب تانية معاصرة .. آي هي تقدر رخوانة شوية لكنها فعالة .. تقدر تقول زي تكتلات سرية .. أو تحفر لخصومك تحت تحت .. أو تلبسهم قضايا ما يعرفو راسها من قعرها و القائمة طويلة. 7. يكون زعلوه و قام حِرِد أية حاجة. 8. يكون طلق السياسة طلاق تلاتة و نزل بيزنس بالتقيل و مرطب آخر طرطيبة و كابي زوغة شديدة من الإعلام و الفضوليين. لحدت هنا أنا كملت الإحتمالات بتاعتي .. في إنتظار احتمالاتكم و برضو عشمانة تجيبو لينا طاري الراجل الطشا أقصد الطششو. حاجة قبل الأخيرة .. كده أسالوا لي عن واحد برضو كان اسمو .. اسمو .. اسمو .. اسمو يا ربي .. غايتو كما خانتني الذاكرة اسمو حاجة كده إبراهومة إيدام نايل عشان نلم الجهود و تفتيشنا ما ينبهل. حاجة أخيرة أسأل الله ببركة رمضان ربنا يدينا الصحة و العافية و يقبل صومنا و صلاتنا و يغفر لينا و يتوب علينا و يشوفنا وجهو الكريم و ينعم علينا بشوفة النبي في الجنة يا منان يا رحيم .. ربنا يغفر لوالدينا و لوالد والدينا و يسدد ديونا و يفرج همومنا و يشفي عليلنا و يدينا الأمن و الأمان و يشيل لينا ناس الإنقاذ كلهم و يبدلهم بآخرين سمحين صادقين أمينين وطنيين عادلين حقانيين .. اللهم آمين يا رب العزة
