عرف بحر الدين إدريس أبو قردة وزير الصحة الاتحادي في الفترة الاخيرة بالدور الذي كان يقوم به ابان قيادته للعمل المسلح في دارفور ، حيث شارك في ميلاد حركة العدل والمساواة بقيادة خليل ابراهيم فى العام 2000 ، وتقلد الامانة العامة للحركة فى العام 2004 ثم قفز ليصبح نائبا لرئيسها فى العام 2005 ثم قاد انشقاقا تمخض عنه اعلانه لحركة جديدة باسم العدل والمساواة القيادة الجماعية ثم شارك فى تأسيس الجبهة المتحدة للمقاومة واختير هو لقياداتها حتى العام 2010، حتى تم الاعلان عن حركة التحرير والعدالة ليصبح هو امينها العام ،وارتبط اسم ابوقردة باحداث ومواقف مميزة احتلت موقعها فى صدارة المشهد الاعلامي طيلة السنوات الماضية، وفى مقدمتها محاكمته فى الجنائية الدولية في لاهاي ، والتوقيع على اتفاق سلام دارفور مع الحكومة فى العاصمة القطرية الدوحة وللبحث عن الوجه الآخر في شخصية المقاتل الدارفوري ابو قردة جلست اليه الصحافة في ونسة خفيفة وظريفة بمكتبه العامر بوزارة الصحة لاجترار الماضي الجميل والوقوف على اسرار خاصة تنشر لأول مره حول ذكريات الطفولة والنشأة الاولى في شمال دارفور. وتناولت الونسة الاسرة الكبيرة والصغيرة والرياضة والفنون واجاب ابو قردة على اسئلة الصحافة بكل عفوية ورحابة صدر . {أهلاً وسهلاً سعادة الوزير وتحية الصحة والعافية وسعيدين بهذه الجلسة والونسة وكيف الحال والاحوال؟ -مرحب ب (الصحافة) وتحياتنا عبركم الى كل ابناء الشعب السوداني داخل وخارج الوطن {نسأل أولاً: عن اسم (بحر) هل هو من الاسماء الشائعة في دارفور؟ -هو اسم متداول كثيراً خاصة عند اهلنا الزغاوة لكن الغريب ان اسم (بحر) ماكان يذكر الا نادرا {كان منو؟ -كان اسمي (صندل) ونحن عادة في دارفور اي زول يكون عندو اسمين واحد اسم العائلة والثاني اسم الكتاب وعندنا عادة الفكي يطلق اسما للمولود حسب يوم الميلاد ويعتقد ان هناك سرا في اسماء معينة تضع حسب ايام الاسبوع من السبت للجمعة. {ولماذا اختفى اسم صندل وسار بحر؟ -لانه تم تسجيل اسم بحر في المدرسة و(أبو قردة)؟ -كانت جدتي عندها اولاد ذكور فقط وكانت تتمنى ان تلد بنتاً ولكن جدي جاؤه ولد واطلق عليه اسم كتاب عبد الله ولكن جدتي سمته بي كلام الزغاوة (اوبي قردو) وسار اللقب اسما . {الوالد من وين؟ -من منطقة الطينة وتوفى وأنا صغير عام 1967م بعد ان اصابه مرض في العيون وسافر مع ود عمي للعلاج في الابيض وتوفى في الرهد ودفن هناك وحتى وقت قريب كنت اتذكر ابن عمي وهو يطلب مني الذهاب الى الرهد حتى يوصف لي مكان قبر الوالد. {والوالدة؟ -من منطقة باسو وهي تبعد 12 كيلو شرق الطينة. {هل الوالد كان متزوجا من اربع حسب طبيعة الاهل في دارفور؟ -نعم تزوج اربع نساء وله عدد من البنين والبنات الزوجة الاولى في البيت الكبير ولد منها بنتين والزوجة الثانية انجبت خمس بنات وولد ووالدتي كانت الزوجة الثالثة انجبت ستة اولاد وبنت والزوجة الاخيرة انجبت ولدا وبنتا وحتى وقت قريب كنت لا اميز بين اخواني واخواتي اولاد او بنات ابوي من زوجاته الثلاث وعشنا في بيت واحد وحوش واسع في جو من المحبة والمحنة ودا حال كل بيوت دارفور كانت ولا تظل العلاقة جيدة ليس فقط في اطار الاسرة الصغيرة ولكن حتى بين الجيران توجد علاقة قوية ومبنية على الحب والاحترام {انت الابن البكر؟ -لا انا آخر العنقود او (كركومي) في بيتنا الصغير شقيقي الاكبر اسمه علي وبعده آدم بخيت وهو معلم عمل بالتدريس منذ عام 1972م في مدارس جنوب دارفور ونزل المعاش هذا العام وهو الآن في نيالا وبعده اخوي آدم سليك وتوفي وهو صغير وبعده صديق وهو الآن بمعسكرات اللاجئين وبعده شقيقتي اندا واسمها اشواق لان والدتي كانت محتاجة لبنت بعد اربعة اولاد وبعدها شقيقي آدم بشير ثم انا. {متين ووين كان ميلادك؟ 1/1/1963 وطبعا زمان اي شخص يولد خارج المستشفى وبدون سجلات يكتب له 1/1 وليس له شهادة الميلاد وانا ولدت في قرية (نانا) وهي تقع بين (الطينة) و(الطنطباى) في الحدود مع تشاد. {حدثنا عن الطينة من ناحية طبيعة وسكان؟ -هي منطقة رملية تتخللها قيزان متنوعة وبها بعض الجبال المتفرعة وبها وادٍ كبير اسمه وادي الطينة يشق الحدود السودانية والتشادية المشتركة ويمشي شمالاً حتى وادي هور وينتهي في قيزان، تعد من اغنى المناطق الرعوية وهي مشهورة بالحشائش المغذية للحيوان وسكان الطينة هم الزغاوة ومن الطرائف ان واحدة من حبوباتنا جات السوق ووجدت شخص ينتمي الي احدى القبائل العربية في سوق الطينة وتحدثت معه برطانة الزغاوة فقال لها الناس انه لا يعرف لغة الزغاوة فقالت معقولة يا اخوانا في زول في الدنيا دي ما بعرف رطانة الزغاوة. {اهم انواع المحاصيل الزراعية والحيوانات في الطينة؟ -عندنا زراعة تقليدية مطرية في زمن الخريف اهمها الدخن اضافة لبعض الخضروات مثل البامية والطماطم، وعندنا كثير من الجمال والضأن والبقر والاغنام، واذكر انه في بيتنا كان في «12» جملا كنت مسؤولا عنها وبشحن فيها العيش في شكل قافلة في سنوات الجفاف حيث يذهب اهلنا الى المناطق المجاورة خاصة منطقة جبل مون ودار مساليت ودار قمر لاحضار الدخن ، واذكر من الطرائف اني ذهبت مع شقيقي الى وادي باري لاحضار الدخن وهناك اول مرة في حياتي اشوف «المنقة» وما زلت حتى اليوم اتذكر طعمها اللذيذ والمختلف وشكلها العجيب ونحن في الطينة ما عندنا جناين لذا ما اكلت المنقة تاني الا بعد مشيت المدرسة في منطقة باسا ودخلت جنينة صديق عبد الله الغنية بالمنقة والليمون واليوسفي ونحن بنفتخر بوجود كمية مهولة من اللبن وكنا بنسقيه للحمير والحصين وندفق الباقي في مجرى في الارض وزمان كان عيب الواحد يمشي السوق عشان يبيع لبن واصلاً ما كان في زول بشتري لبن لانه موجود عند أي شخص في المنطقة والفائض مدفق. {ايام الطفولة الاولى كنت طفلا هادئا ولا متمردا؟ -كنت اظن انني كنت طفل هادئ لكن اهلنا بقولوا كنت عنيد جداً ومتمرد وما بسمع الكلام واصر على رأيي وانا من صغير حوالي خمس سنوات اتعلمت السرحة وكنت بطلع براي في عز الليل ارعى البهائم وكنت انا في الظلام الدامس بسمع صوت زئير الاسد وبشوف المرفعين او البعشوم بجواري وما بخاف ، والسرحة علمتني الكثير من امور الحياة وربما اثرت في شخصيتي قوياً وتحملت المسؤولية مبكراً وكنت اطلع بالليل براي مسافة «5 كيلو» عشان اصل بئر الموية واسقي البهائم وارجع اديها الاكل واحافظ عليها من الاختلاط ببهائم اخرى او السرقة والضياع وغيرها. {والدراسة؟ -دخلت الابتدائية كبيراً حوالي 8 سنوات تقريبا ودرست ثلاث سنوات في منطقة «باسو«» لكن اخوي الكبير كان شغال معلم في منطقة زالنجي وساقني معه قريت سنة واحدة بس سنة رابعة بعدها طلب مني امشي اقرأ في الفاشر واقيم مع اخواني اولاد ابوي في الفاشر. {ليه؟ -كنت في زالنجي بتاع مشاكل وكنت متعلقا بركوب العجلات بكمل كل مصاريف المدرسة في ايجار العجلة وعشان اتعلمها كنت كل يوم بجي البيت معوق ومكسر وكترت شكاوى الناس من مشاكلي وخليت القراية وبقيت ساكي العجلات بعدين اخوي كان ساكن في ميز مع زملائه الاساتذة انا كنت ما بسمع كلامهم ولا بترسل ليهم زي ما دايرين واخوي قال لي تمشي مدرسة الفاشر عشان تتعلم الانضباط. {مشيت وانضبطت؟ -مشيت درست في الفاشر الابتدائية الشمالية «ب» سنة خامسة وسادسة لكن بقيت هاوي سينما وكنت ما بفوّت اصلا الفيلم الهندي والكراتيه والكاوبوي في سينما الفاشر، يوم الاربعاء لكن كان بقيف في طريقي مدير مدرستنا الاستاذ العظيم سعيد محمد محمود وهو من ابناء الزيادية ورجل صارم وعمل لينا مذاكرة يومية اجبارية من بعد صلاة المغرب وحتى الساعة العاشرة مساء وكنا نتصرف انا والشلة ونقطع الكهرباء من المدرسة احيانا عشان تقيف المذاكرة ونجري لغاية السينما عشان نحضر الفيلم الهندي قبل المناظر انا والشلة. {بتتذكر منو من ابناء دفعتك في الفاشر الابتدائية؟ -اتذكر محمد ابراهيم فاراي وسموه كدا عشان حجمو صغير وكان بتبادل المركز الاول والثاني مع السماني اما المركز الثالث دائما مقفول لي آدم التوم وكان مستحيل يفتح كتاب او يقرأ لكنه كان ذكي وانا بجي الخامس او السادس ومن دفعتنا ياسر ابن ناظر المدرسة هو الآن في اميركا وفضل إدريس عبد الرحمن ورغم اننا دفعة جنها فوضى وشغب وسينما لكن كنا شطار 96% مننا نجحنا في الابتدائية واقل واحد جاب 148 درجة وانتقلنا مع بعض الى فصل واحد في الفاشر المتوسطة. {في الفاشر المتوسطة احببت شنو غير العجلات والسينما؟ -كرة القدم وكنت العب مهاجم وجناح يمين واتذكر من الاساتذة وقتها استاذ آدم عرفة ومحكر وبدر وكان صارماً جداً وبنعمل ليه الف حساب كان يدرسنا الانجليزي وبحب مادته وبهتم بيها لكن رغم كدا جلدني كتير عشان الفوضى وادقيت شديد اكثر من مرة {واهم المحطات في مدرسة الفاشر الثانوية؟ -تميزت اكثر في مجال كرة القدم وكنت اقود فريق المدرسة ومن اللاعبين المتميزين وحققنا لأول مرة الكاس وغلبنا دارفور الثانوية التي كانت تهزمنا دائما وتسببت انا في هدف الفوز بعد ان استلمت الكرة قبل نصف الميدان (وجريت خمسة لاعبين وواجهت حارس المرمى ولحظة التهديف اعترضني المدافع المشهور علم الدين لاعب فريق اتحاد اولاد الريف بالفاشر ورفعت الكرة عاليا لزميلي (شاد( الذي احرز الهدف وبعدها صفر الحكم واعلن نهاية المباراة واذكر من اللاعبين الخطيرين في فريقنا وقتها ابو بكر امام الدين ومحمد الكبير ومحمد عبد العزيز وعادل (دكتور( ولما غلبنا مدرسة دارفور رقص المدير والاساتذة والطلاب في فرح شديد وكان مديرنا مولانا محمد منصور واذكر من اساتذتنا العظام محمد الامين استاذ اللغة الانجليزية واستاذ الفرنسي احمد (بن جو(. {كنت هلالابي ولا مريخابي؟ -كنت بشجع المريخ ولكن هسه بقيت اشجع اللعبة الحلوة والفريق القومي {هل حاربت السينما في الثانوي؟ -واصلت فيها بس خليت فلم الاربعاء وبقيت اتابع فلم الخميس نسبة لأني كنت ساكن في الداخلية لكن انشغلت وقتها بالحفلات وكنت اساسياً في اي مكان فيه غناء وطرب واحيانا انادي الشلة بنرتب برانا لي حفلة ونعملها حتى لو ما في مناسبة ونحتفل ونهجج حتى الصباح وكنت معجبا بالفنان المشهور سانتو وما بفوّت ليه حفلة {سينما وكورة وغناء بس ما كان عندك اهتمام بالسياسة؟ -الاخوان حاولوا وقتها يستقطبونا انا واصحابي وجابوا لينا كورة جديدة وعملوا لينا فريق رياضي سموه فريق الجهاد واعتقد ان اخوي الكبير آدم كان ليه دور في الاستقطاب والتجنيد فهو اسلامي قديم لكن يبدو ان الاخوان صرفوا النظر عننا وقالوا نحن ناس كورة وحفلات وكفر ووتر ما بننفع معاهم وكان وقتها طريقتهم في الدعوة تقليدية وتصنيفهم للناس ليس عميقا. {ما فكرت تجي الخرطوم ؟ -كنت بسمع عنها كثير قصص وروايات مشوقة من الناس البزوروها وبجونا ومن بعض ابناء الاساتذة ومن ابن مدير مستشفى الفاشر عبد المجيد وهو من اولاد العاصمة وكنا بنزوره في بيتهم عشان نقرا ونراجع المقررات واذكر من الطرائف اننا لقينا حبوبته ام ابوه بتتكلم انجليزي ذي الطلقة وقالت لينا انها خريجة آداب جامعة الخرطوم واذكر اننا اندهشنا من لغتها السليمة لدرجة ان صاحبي موسى اسحق قال لي شوف الحاجة الكبيرة دي بتتكلم انجليزي ذي الخواجات ومن الطرائف وقتها جابوا لينا كسترد بالالوان اخضر واحمر واصفر وكان اول مرة نشوفو لان الكسترد المعروف عندنا لونه واحد. {وبتين اول مرة جيت الخرطوم..؟ -سنة 1982م جيت مع منتخب الكورة من مدرسة الفاشر الثانوية للمشاركة في الدورة المدرسية واذكر سكنا في دار كلية المعلمات في امدرمان وكان في اجازة ولعبنا واتغلبنا ونفضونا من اول مباراة لكنني استفدت من الزيارة وشفت مقرن النيلين والسينما وجامعة الخرطوم والنيل. {امتحنت علمي ولا ادبي؟ -كنت شاطر جدا في الرياضيات والانجليزي والفيزياء وطلب مني استاذ الرياضيات امشي فصل حيان العلمي ورفضت قلت ليهم انا ما داير ابقي مهندس ورغبتي كانت دراسة المساق الادبي والتخصص في اللغات او الاقتصاد ولما جاء امتحان الشهادة السودانية طلعت دعاية ان امتحان التاريخ كشفوه وحصلت دربكة وتشويش وسط شلتنا وقررنا ما نقرأ باقي المقالات ونعتمد على الامتحان المكشوف المزعوم لكن للاسف طلع اشاعة وجبت في مادة التاريخ 52% رغم اني توقعت اجيب فيها فوق لي 80% وجبت في الرياضيات 92% والانجليزي 92%. {درست الجامعة وين؟ -درست في جامعتين اولا درست في معهد الكليات التكنلوجية جامعة السودان في كلية الدراسات التجارية في قسم السكرتارية ونلت درجة الدبلوم اواخر 1988 وسجلت اثناء الدراسة في جامعة النيلين في كلية التجارة وتخرجت ببكلاريوس في ادارة الاعمال عام 1994 وعملت دبلوم عالي في جامعة الخرطوم كلية الدراسات العليا قسم العلوم السياسية وتخرجت بدلوم عالي في العلاقات الدولية وبدات في الماجستير في العلاقات الدولية ولكن قطعته وذهبت الى تشاد. {كيف كان تعاملك مع الطلاب والطالبات وانت جاي من مجتمع محافظ بالذات تعاملك مع الجنس اللطيف؟ -كنت منبط جدا واحاول التعامل مع الطالبات باحترام ولطف ، وكنت مشغول بكرة القدم وبعض القضايا النقابية الطلابية. {كيف كان دخولك لمجال السياسة؟ -بعد الانتفاضة مباشرة ظهرت مرحلة الديمقراطية 1986 وكان للاخوان الاسلاميين نشاط قوي وكبير في الجامعة وطرح فكري راق في اركان النقاش وتم استقطابي واصبحت مسؤول العلاقات الخارجية في رابطة الطلاب ثم اتحاد الطلاب بكلية التجارة في معهد الكليات واتعرفت على اخوان كتار من جامعات الخرطوم والاسلامية وكنا نعقد اجتماعات وندوات ومناشط ونشارك في مناسبات عديدة داخل وخارج السودان {ابرز مشاركة خارجية كانت وين؟ -سنة 1988م، اقيم مؤتمر اتحاد الطلاب العالمي في ليبيا وكان جسم يضم اليساريين في العالم وما تمت دعوة اي اتحاد طلاب من السودان باعتبار ان الاتحادات الطلابية استولى عليها الاسلاميون وحتى ممثل الجبهة الديمقراطية السودانية ربيع السماني شارك بطريقة خاصة واذكر ان القذافي سأل المؤتمرين عن وفد السودان فقالوا له ان بالسودان اتحادات طلابية اسلامية رجعية فغضب جدا وقال ليهم وفد السودان (توّه( يجي وعشان توّه دي جانا السفير الليبي في الخرطوم بنفسه الى دار اتحاد جامعة السودان وقال لرئيس الاتحاد اخونا الدومة عبدالقادر داير ممثل من الجامعة وتم اختياري انا لأني مسؤول العلاقات الخارجية واذكر ان السفير ساقنا بي عربيتو الخاصة انا وممثل طلاب جامعة الخرطوم اسمه عبدالله ممثل طلاب جامعة الاسلامية اسمه محمد عبدالفتاح وطلّع لينا جوازات من وزارة الداخلية في نفس اليوم وسافرنا ليبيا بي طائرة خاصة لحضور المؤتمر وكلو عشان (توّه( القذافي {كيف كانت مشاركتكم كإسلاميين في مؤتمر للشيوعيين؟! -كانت قوية وفاعلة واذكر ان المسؤول عن وفد السودان اسمه مفتاح منصور كان قيادي في اتحاد طلاب ليبيا في مؤتمر الطلاب الليبي و ساقنا زيارة لحضور مؤتمر في احد الاحياء وقال لينا ح تشوفوا الديمقراطية الحقيقية لأنكم في السودان عندكم ممارسة رجعية للديمقراطية وتؤمنون بالاحزاب ومن تحزب خان ولما وصلنا لقينا ذي 60 نفر مجتمعين وقدامهم 5 أنفار في منصة رئيسية وكان في نقاش حول جدوى انشاء مركز صحي باكر وطلب مني الليبي في نهاية اللقاء ان اقدم رأيي حول المؤتمر الذي حضرناه في الحي ونحن في طريقنا للفندق {قلت ليهم شنو؟ -احبطتهم واستفزيتهم قلت ليهم وينا الديمقراطية وهل اللجنة الموجودة في المنصة لجنة معينة او منتخبة وقلت له ماذا تقصد بالمصعدة وليس هناك شئ اسمه تصعيد واما انتخاب او تعيين وقلت ليه مثلا في حشد الحي كان في حاجة عجوز جات اتكلمت وهي ما فاهمة الموضوع وهتفت لثورة الفاتح ومشت كان بدلها تجيبوا اطباء مختصين والليبي زعل جدا واشتكينا وقال لي انت مسكر وانت رجعي ومفروض من الاول ما تشاركوا في المؤتمر لو ما جيتوا بدعوة من القذافي وزعل جدا ولو ما كان جينا بي دعوة خاصة من القذافي ما كان ح يحصل لينا خير وانا وقتها ما كنت ملم بي القمع والبطش والدكتاتورية التي يفرضها نظام القذافي على الشعب. {عملت وين في الحركة الاسلامية بعد التخرج من الجامعة؟ -عملت بعد التخرج في اماكن عديدة بداية من سكرتارية مكتب الفئات ومكاتب الطلاب وعمل الحركات الاسلامية في الخارج والاجهزة التنظيمية الخاصة وعندها تعرفت على كل السياسيين الاسلاميين تقريبا من الاطباء والقانونيين والزراعيين واساتذة الجامعات وغيرهم واتوظفت في شركة التأمين الاسلامية رسميا بمرتب 620 جنيها حوالي 8 شهور وكان نائب مدير الشركة عثمان الهادي الذي عمل وزيرا للتجارة ورئيس لمجلس ادارة شركة شيكان وكان في نفس الوقت المسؤول عن المهنيين في مكتب الفئات وهو من المؤسسين لعمل التامين الاسلامي في السودان. واذكر ان الاخ محمد النبهاني كان مسؤول السكرتارية التنفيذية واستفدنا منه كثير في كتابة وصياغة التقارير التنظيمية وارسالها للجهات المختلفة . {وبعد ذلك؟ -عملت في الاتحاد الاسلامي العالمي للمنظمات الطلابية بطلب من الاخ العزيز د. مصطفى عثمان اسماعيل وزير الاستثمار حاليا الذي جاء من بريطانيا انذاك امينا لاتحاد الطلاب وعملت معه منذ 1989 حتى 1993م، وكان الاتحاد واجهة للمنظمات الطلابية والشبابية في الدول الاسلامية وعملت بعدها في مركز الدراسات الاستراتيجية في مجال تنظيم العمل الخارجي التنظيمي حتى 1998م، ووقتها بدأت تظهر الخلافات وخرجت قبل حدوث انشقاق الاسلاميين في السودان . {الى اين؟ -كانت لدي علاقة مع الاخ العزيز د. موسى كرامة مدير عام شركة الصمغ العربي وهو بمثابة الاخ الاكبر وطلب مني تأسيس فرع شركة للصمغ في تشاد و بعد ان عملت في الصمغ (6) شهور في السودان ذهبت الى انجمينا وادرت شركة الصمغ بنجاح من تشاد وكنت اصدر الصمغ العربي من انجمينا الى امريكا ودبي والخليج والهند واوربا وقضيت على التهريب تماما واوقفت تهريبه عبر تشاد ونيجيريا بتوفيره رسميا وواجهتني صعوبات ومخاطر لأن عمل الصمغ قريب من عمل المخابرات فيه مصالح متداخلة وواصلت حتى طردت من تشاد الى السودان لأسباب سياسية في 2004م، وكنت وقتها اعمل لصالح تجهيز العمل الثوري في دارفور. {كيف بدأت علاقتك بالعمل العسكري قبل تمردك؟ -نعم كنت في مناطق العمليات بالجنوب في مرات عديدة واشهرها كنت مع ابطال الميل اربعين وتمكنا من ايقاف زحف الحركة الشعبية نحو جوبا حتى تحقيق السلام واشهر ابطال الميل اربعين آنذاك الشهداء آدم شرابو مناي وعلى عبد الفتاح وآخرين ومن الاحياء الآن ناجي عبد الله والهادي وآخرين. {اين كنت يوم 30 يونيو 1989م يوم قيام ثورة الانقاذ الوطني؟ -كنت في الخرطوم ولم اكن بعيدا عن التغيير {متين اول مرة لاقيت الشيخ الترابي؟ -كنا على تواصل معه من وقت لآخر منذ ايام الجامعة وايام عملي باتحاد المنظمات الطلابية الاسلامية وكنا نزوره في المنزل بصحبة طلاب افريقيا وآسيا وأوروبا ويعطيهم جرعات تنويرية ولما كنا في الاستراتيجية كنا نلتقيه من وقت لآخر وايضا كنا نلتقي الرئيس البشير والنائب الاول للرئيس علي عثمان محمد طه من وقت لآخر. {كيف ترى شخصية الترابي؟ -هو كقائد سياسي لا شك انه ارتكب بعض الاخطاء التنظيمية والدليل على ذلك الانشقاق الكبير الذي حدث في الحركة الاسلامية ولكن كمفكر لا مثيل له في الكثير من القضايا الفكرية وتفكيره دائما متقدم جدا بدليل ان اصحاب الافق الضيق في الفكر الاسلامي يصفوه بالزندقة ولكن سرعان ما يتراجعوا بعد سنوات يعني بفهموا متأخرين {ما هي اهم الصفات التي جذبتك لشخصية الرئيس عمر البشير؟ - هو انسان متواضع وخلوق في تعامله مع الناس ومنفتح وتلقائي جدا وواضح وهو شخص مرح ويتمتع بشخصية قوية جدا في الجد . {نعود الى الاسرة الصغيرة ونتعرف على افرادها وهل كان الزواج تقليديا ام يتميز بالحداثة؟ -الزواج مزيج من القديم والجديد والد زوجتي كان صديقا لشقيقي الاستاذ آدم وكان يعمل مشرف زراعي في زالنجي ونيرتتي وكنت ازورهم في الاجازات وتعرفت هناك على زوجتي السيدة سهام حسن لسان وتم الزواج . {والابناء؟ -ابنتي الكبرى سارة تدرس في كلية الطب بجامعة الاحفاد في السنة الاولى وبعدها محمد الفاتح وهو ممتحن للجامعة وعبد السلام وهو ممتحن للثانوي وندى في سنة خامسة اساس والاخير منتصر في الصف الثالث بمرحلة الاساس. {والدك تزوج اربع مرات وابناء قبيلتكم يتميزون بالتعددية لماذا خالفتهم؟ -مبدئيا ما عندي مانع اتزوج من اخرى او ثلاث ورباع ، لكن لم يحدث حتى الآن ربما للظروف التي مرت علينا خلال السنوات الماضية وعندها كنت خارج السودان لمدة (9) سنوات وما لاقيت اولادي الا تلات مرات ونحن ما عندنا تعقيدات في موضوع التعددية في الزيجات وهذا الموضوع عادي جدا بالنسبة لنا. {الى اي مدى ترتبط بي كيف وسلطان الشاي والقهوة؟ -مرتبط بالشاي لدرجة كبيرة وللشاي طقوس خاصة في دارفور لكن الفترة التي قضيتها في تشاد علمتني شراب الشاي الاخضر {والسجاير؟ {دخنت من 1977 - حتى 1986م وتركت التدخين الحمد لله . {كيف قررت تتخلص من الخرمة؟ -استفدت من عملي مع الاخوان في الحركة الاسلامية وجدت انهم ناس (مولانات( وما بحبوا التدخين وتوقفت عنه خاصة انه محتاج لي جو وشلة وكنت اعاني في الاجتماعات الطويلة وانتظر (البريك( واخرج وادخن.. وعزمت اني اترك التدخين ونجحت لكن (يضحك( كنت خرمان سنتين ونص. {علاقتك كيف مع الفيسبوك ؟ -كنت ادخل الفيسبوك يوميا ايام جولات التفاوض للتواصل مع الاصدقاء لكن الآن لا اجد وقتاً لدخول الشبكة العنكبوتية الا في بعض الاوقات . {لسه بتسمع الاغاني ؟ -اذا لقيت وقت ما بقصر وبحب اسمع الفنانين الكبار واطرب للفنان احمد المصطفى وعثمان حسين وحمد الريح وسيد خليفة . {والفنانين الشباب؟ -اتابع اغنيات برنامج اغاني واغاني بقناة النيل الازرق ومعجب باسلوب عمنا السر قدور واستمع لكل اغنيات الشباب والشابات بالبرنامج الرائع .
