خرجت عبله من الكافتريا التى بجوار معهد الصحراء للكمبيوتر والذى التحقت به بعد مشاكل كثيرة مع عنتر الذى رفض ان تخش المعهد وتطورت المشاكل حتى وصلت مرحلة جعلت عبلة تعيد له كل صوره وخطاباته والشنطة المصنوعة من جلد الاسد الذى اصطاده شرف بتاع كتاب المطالعة، والذى كان معه عنتر عندما اصطاد الاسد ولكنه طلب من عنتر ان يسمح له بعدم ذكر اسمه فى كتاب المطالعة عشان يقشر حبة.... كان برفقة عبلة لحظة خروجها من الكا فتريا زميلها الهيثم بن هشام الذى حذرها عنتر كثيرا من مباراته بسبب لبسه للبنطلون السستم..وتفاجأت عبلة بعنتر يقف بحصانه جوار المعهد فصاحت بسرعة .. ابتعد ايها الهيثم وتالله لو شاهدك عنتر الان لقطعك اربا اربا فإن عنتر لايؤمن بالصداقة بين الرجل والمرأة ..فأبتعد الهيثم سريعا وهو يرتجف من الخوف واتجهت عبلة ناحية عنتر الذى صاح فيها..تبا لكى يا عبلة اهذه هى دراستك ؟؟؟ تقضين جل وقتك فى الكافتيريا .. فصاحت عبله وما حاجتك بى مش نحنا فرتقنا من بعض ؟؟؟ فأخذ عنتر نفسا عميقا وانشد قائلا انا الراجيكى يا عبلة واشوفك جايه مخلوطه فى الكا فتريا قاعده هناك وتطلبى قهوه مظبوطه قاعده كمان مع الهيثم زى جكسويه جلفوطه يغشك انتى بالمكنات ومدنقره انتى فى الفوطه فصاحت فيه عبله ويحك يا عنتر اتتهمنى فى شرفى ثم انشدت قائله: عنتر انت زول حقار ودايما صرت بتنقنق بقيت طوالى متضايق ويوم والله بتطرشق بقيت يومى بتجوط فينى وتهدد انو حتفرتق أسيب الكمبيوتر كيف ؟؟ حلاتك ويا حلاة لقلق فرد عنتر بسرعة بجد ما اتوقعت اسمع منك شعر زى ده فطأطأت عبلة رأسها فى خجل وقالت اعذرنى يا حبيبى اسمح لى بإكمال الكورس ولن ادخل هذه الكا فتيريا بعد اليوم وحتى الفطور حأجى حاشياهو من البيت ولكن قل لى كيف حالك انت ... فرد عنتر انا ذاهب الان لحراسة البترول مع الفرسان حتى يعطونى الكثير من الدراهم واجى اعرسك..فصاحت عبلة ماذا يا عنتر ؟؟؟ اتريدنى ان انتظرك حتى خروج البترول ثم تنهدت وامسكت بلجام حصانه وانشدت قائلة منتظراكا يا عنتر يمضى شهر ويمر الحول وحاتك اصلى ما خنتك وما قابلت غيرك زول كتير طلبونى من اهلى واسأل ناجى ود الصول وداير برضى انتظرك لمن يطلع البترول؟؟؟؟؟ فطأطأعنتر راسه وهو فى حيره من امره .. فصاحت العفراء وبعدين تعال هنا لقد رايتك فى زواج سعديه بنت الشامى عندما كنا مختلفين فى وضع لم يعجبنى ولا يشرف فارسا مثلك ثم انشدت قائلة لقيتك انت فى الحفله وقاعد جنبك الجكسى لابس ليك قميص اصفر وتشرب ليكا فى ببسى غلبنى اتعشى وحياتك بس اكلتا من الصحن شبسى وشايفاك انت تتلفت زى الصينيه بالفكسى فرد عنتر عذرا حبيبتى فقد حضرت الى الحفل متأخرا ولم اجد مكانا غير ذلك، فصاحت فيه ولكن اية شهامة الفرسان وحتى وان كنا مختلفين لماذا لم تقم بتوصيلى لخيمتى بعد انتهاء الحفل فرد عنتر بسرعة بالله ؟؟؟ عشان يفوتنى قطع الرحط.؟