# سيدنا موسى كليم الله جاء ذكره في القرآن الكريم وأخيه هارون في اكثر من موضع [ولما جاء موسى لميقاتنا وكلمه ربه قال ربِ أرني أنظر اليك قال لن تراني ولكن انظر إلى الجبل فإن استقر مكانه فسوف تراني ولما تجلى ربه للجبل جعله دكاً وخر موسى صعقا فلما أفاق قال سبحانك تُبت إليك وأنا أول المؤمنين٭ قال يا موسى إني اصطفيتك على الناس برسالاتي وبكلامي فخذ ما اتيتك وكن من الشاكرين] صدق الله العظيم. # ويخبرنا سبحانه وتعالى انه بعث موسى بتسع ايات بينات وهي الدلائل القاطعة على صحة نبوته وصدقه فيما اخبر به عمن ارسله الى فرعون. والآيات حسب اتفاق الفقهاء هى: 1/ العصا 2/ اليد 3/ السنين 4/ البحر 5/ الطوفان 6/الجراد 7/ القمل 8/ الضفادع 9/ الدم. # وقد أوتى موسى عليه السلام آيات أخر منها: ضربه الحجر بالعصا وخروج الماء منه ومنها تظليلهم بالغمام وإنزال المن والسلوى. هدايا الحلقة: 1/ جاء من منتديات كورة ( تلفزيون المرح) ان بتاع مكتبة من أهل الخيال اتشوكش فقعد وكتب للمشكوكشة: كنت بريدك لي (آخر لحظة) لكن بعد سمعت أخبار انك بتمشي (الصحافة وبتلاقى (السوداني) في (قلب الشارع) ومرات في (الميدان) جنب (قوون) الشمالى وبتحكوا (حكايات) بصوت عالى لامن يسمع (الصدى)، فكرت اسيبك وشفت بي عيني المجردة و(بالمجهر) حقائق كانت غائبة عني أفعال كانت دايرة منى (انتباهة) علشان كدة قلت ادق ليك (اجراس الحرية) واقول ليك اخرجي من هذه (الدار) اذهبي لترتدي له أزهى (الوان) وعبري له بكل انواع (الفنون) فقد علمت انني لست (الزعيم) في قلبك وانه هو (حبيب البلد) يكفيني ان اكون المراقب و(المشاهد) ارحلى معه لا ابالى حتى ولو رحلتم (المريخ) وفي الختام ما حأقول اكتر من وداعاً يا من كنت (فتاتي) وكنا (هو وهي). 2/ حاجتين مستحيل تسمعهم من اهلك: 1/ شكلك تعبت من المذاكرة؟ 2/عايزة فلوس تاني ولا ديل كفاية؟ 3/ واحدة مطلعة رخصة سواقة جديدة هى راجعة من الشغل راجلها اتصل بيها يطمئن عليها وقال ليها خل بالك علشان قالوا دلوقتى في التلفزيون انه في عربية مجهولة ماشة عكس حركة السير ومجننة المرور، قالت ليه هي عربية بس؟ دا كل العربات ماشة عكس المرور يا اخوى!. 4/ لبنانية ضربت زوجها كف فرد عليها: لما هذا يا حبيبتي؟ قالت ليه: كنت بتأكد من محبتك لي ثم احتضنته. واحدة سودانية راجلها جعلى سمعت بالقصة حبت تقلدها قاعدة مع راجلها ضربته كف... الشليقة لحدى هسع في الانعاش!. 5/ سكران وقف بتاع ركشة قال ليه وديني سنوات الضياع لمبتنا ناقصة كباية... بتاع الركشة ما فهم حاجة ولما زهج منه قال ليه جداً اركب وتوش وداه القسم، السكران قال ليه: دي وين؟ قال ليه: دي وادي الذئاب!. 6/ قال ليك المراة زي الكهرباء اذا احسنت استخدامها انارت لك حياتك واذا اسأت استخدامها بتلحقك حبوبتك!. 7/ شايقى قال لصاحبه: بدور اعرس لي لبنانية زي التفاحة، صاحبه قال ليه التفاح اليومين دي ضارب... عرس ليك شايقية زي التمر خمسين سنة وما بتجيها الحبة!. 8/ القاضي: وين العصا الهددك بيها زوجك؟ الزوجة: كسرتها في راسو يا مولانا علشان ما يخوفنى بيها تاني!. 9/ كيف تصبح المرأة أم صالحة؟ تسمي بنتها الكبيرة صالحة!. 10/ الضحك من غير سبب زي الراجل من غير شنب والبنت من غير دهب!. 11/ حنكوش قال لأمه: لو ما جبتي لى جلاكسي الجديد حآكل قنقليس بالشطة واموت!. 12/ الاستاذ للتلميذ اذكر ثلاثة حيوانات برمائية، التلميذ: الضفدع وابوه وامه!. 13/ الزوج: امشي افرشي لي المصلاية عاوز اصلي الضهر، الزوجة: الشرع قال صلاة الرجال في المساجد، الزوج: والشرع قال مثنى وثلاث ورباع، الزوجة: افرش ليك المصلاية وين؟ في البرندة ولا الأوضة..!. خاتمة: ولله في خلقه شؤون، وسبحانه الذي اسرى بعبده ليلاً من المسجد الحرام الى المسجد الاقصى، وسبحان من مفاتيح خزائنه في قول كن انها عظات وعبر، نرجو ان نتأسى بها. مع تحياتي،،،
