*زمان السودان كلو مقتنع انو هيثم مصطفى احسن لاعب في السودان. *وزمان برضو السودان كلو مقتنع انو حمدوك افضل خبير اقتصادي في السودان. *بعد شوية الصورة اتقلبت *لما هيثم ماقدر يجيب كاس خارجي بقوا يتريقوا عليهو. *لا ومشوا لابعد من كدا لما شطبوهو في اغرب حادثة رياضية تمر على البلد. *واتحول سيدا بقدرة قادر ل(سيبا). *وبعد كمان سجل للمريخ الند التقليدي للهلال فقد باقي دهشتو وتاريخو ذاتو. *برضو حمدوك *نفس الدواء بس من شركة تانية *اول ماظهر الناس بقت تتغزل في (باصاتو)…ا…اقصد (خبراتو). *وبقى هاشتاق شكرا حمدوك هو الاكثر تداولا. *تلقاهو لافي في الفيس زي (صور لوشي). *بعد سنة بالتمام والكمال الوضع اتغير. *والنقة بدت تكتر. *والتريقة بدت تظهر. *والناس بدل شكرا حمدوك بقت تقول (ورورووووووك). *ودا كلو ليه. *لانو حمدوك برضو ماجاب كاس خارجي (اقتصادي). *يعني لانزل دولار ولا رفع عقوبات. *وبكدا لحق حمدوك الكابتن هيثم مصطفى. *الاتنين بعد ما كانوا نجوم الساحة بقت الناس ليهم مامرتاحة. *وهنا في سؤال مهم. *المشكلة في حمدوك والبرنس ولا فينا كشعب ماعندنا قدرة على الصبر والاحتمال.؟ *طيب زاوية تانية *المشكلة في حمدوك ولا البرنس ولا في (اللوبي) الاشتغل (قرف) ضد الاتنين ديل عشان ماينجحوا.؟ *لا هيثم يجيب كاس…ولا حمدوك يعدل الرأس.؟ *بكرة مواصلين في الموضوع دا عشان هسي المساحة بتاعت العمود انتهت. *خليكم قراب.