من ربنا خلق الدنيا، وخلق آدم وحواء.. كانت المرأة تكوس لإرضاء الرّجل ولفت نظرو وانتباهو ليها. وبرضو في رجال بيكوسو لإرضاء النسوان. الدق والبُطان بالسوط.. العند أهلنا دا كلو عشان الراجل يعجب المرا.. وانو حمّال أسية. السوط ما بيهمو عشان عشرة جلدات كان مية.. ويركز واح ساكت ما بيقولها وإن قالها يحردن بنات أعمو... والما بنات أعمو يجردن معاهن عشان يخجلنو ويدخلنو في ضفورو... يطلع من الحفلة مثخن الجراح... وضهرو خيران خيران من الدق... لكن نفسياً مبسووووط... ويخت طاقيتو فوق حواجبيهو.... ويقدل في نص البنوت... وهو واثق من نفسو تمام الثقة... وبنات أعمو واثقات من رجالتو تب. ضهر شبعان سوط كل ما بسمع لو دلوكة هبكت... يقعد يرجف ويملص هدومو ويكون داير ينجلد... وينجلد... ويشبع ضهرو العطشان للسوط... ويحقق أمنية ترباس في غنية "يا اخواني البنات القدة عطشانة.. بتدور الرجال البي يحملو بطانا"... ؛؛ الراجل كل ما بسمع لو دلوكة هبكت... يقعد يرجف ويملص هدومو ويكون داير ينجلد، ويحقق أمنية ترباس في غنية "يا اخواني البنات القدة عطشانة ؛؛؛ القدة السوط أو الجلد... وعنقريب القِد "بكسر القاف"... هو عنقريب الجلد... ينسجوهو بدل الحبال بالجلد. القدة عطشانة يعني السوط عطشان وداير يروى من الدم حق الجلد... يشوه الرجل جسده ويتحمل التعذيب عشان خاطر بنات الشيخ وناس فاطنة. الشلوخ بالرغم من أنها كانت للرجل وللمرأة... لكن في المرا كانت تعتبر تجميلا... وموضع غزل للرجل "ام شلاخن ستة... فرتقت قلبي حتة حتة". ودق الشلوفة للمتزوجة... كان برضو نوع من الوشم... يعتبر تجميلاً... بالرغم من أنها تتابع المرا من يوم تدخل عشة الزوجية لحدي ما تدخل بيت حقها... تشويه برضو لكن زمان ما كان تشويه كان تجميل عشان المرا تعجب الراجل... الخفاض الفرعوني تشويه برضو... وبرضو لإرضاء الرجل. شلوفتها تحمد سيدا بعض القبائل الأفريقية... الشلوفة الكبيرة عند المرا تعتبر جمالاً... عشان كدي تلقى النسوان يجتهدن اجتهاد شديد عشان شلاليفن يبقن كبار... وتحديداً الشلوفة التحتانية، الفوقانية ما بيهبشنها... لي فهم يعرفنو هن... ؛؛؛ نساء بورما مشغولات بالرّقبة وطول الرقبة هو معيار الجمال... يجيبن حلقة حديد أو صفيح حول الرقبة "طوق".. يملاها تب ؛؛؛ لدرجة إنو فيهن واحدات وشيها كلو بقى عبارة عن شلوفة وبس... من بعيد تشوف المرا تقول النصيبة الشايلة ليها كوريك في خشمها دي شنو؟ المرا فاكة إيدها ساكت وشايلة صينية اللكل بي خشمها؟ لكن دي شلوفتها تحمد سيدا، شلوفتها برااااها ما معاها أي زول... لكن، باقي لي الصينيين لو سمعوا بالناس ديل ح يسو مصنع شلاليف... ويبيعو ليهم الشلوفة بالشي الفلاني... وممكن حكومتهم تبقى تفتيحة وتعمل ليهم ضريبة شلوفة... ورسوم شلاليف... ويكون في نقلتية شلاليف... وعييييك... لأنو شلوفة زي دي بتكون معرّضة للحوادث ممكن تتشرم أو تتقدا. طبعاً، بالنسبة لينا نحن لو شفتها بتخطفها وتجري بيها لأقرب مستشفى توديها الحوادث... ويتلمو الدكاترة ويتمحنو في النصيبة الجاتهم دي... ويقعدو يتغالطو يا ربي دي بطن الكراع والللا الشلوفة... ويشككوا في علم التشريح الدرسوهو... بعافيتهم! رقاب بورمية في بورما النسوان مشغولات بالرّقبة وطول الرقبة هو معيار الجمال... يجيبن حلقة حديد أو صفيح حول الرقبة "طوق".. يملاها تب... ؛؛؛ النسوان بجتهدن بحثاً عن إرضاء الرجل، بأدوات التجميل... وعدة التجميل تلقى الواحدة شايلة ليها شنطة تكركب كلها، شي علب وشي فتايل وشي أقلام، ومُنضرة، وبنس ؛؛؛ وكل ما الرقبة اتمدت كل ما جابو حلقة جديدة وركبوها في الفراغ الفضل وتصل الحلقات لي عشرة حداشر حلقة... بالطريقة دي يصل طول الرقبة تلاتين سم. وفي الصين في بعض المناطق النسوان بيعتبرن سر الجمال في النخيرة.. وتلقاهن طول الوقت يصوطن في النخيرات... مرة يقدوهن... ومرة يقلبو فتحات النخرة ويمرقوهن لي برا زي جيوب البنطلون... ومرة يسدوهن بي فله... ويخلو فيها خريم صغير عشان الهواء... والفلة تكون ملونة... وفي كل العالم كان قديد الإضنين وما زال تشويه برضو لإرضاء الرجل لتعليق الحلقان... وقد النخرة عشان الزمام... كلو تشويه في تشويه... في بعض مناطق الصين نسوان برضو مشغولات بالكرعين قدم الكراع... كل ما كانت صغيرة كل ما كانت سمحة وتجنن... من البت صغيرة يلبسوها جزمة ضيقة ويتنو الأصابعين عشان الكراع تدخل في الجزيمة... وتقعد كدي سنين... في النهاية تلقى عندك كريع زي كدر الحمار.. ويااااا حلاة الحِنة فيها. مكياج المهرجات حالياً تجتهد النسوان بحثاً عن إرضاء الرجل. بأدوات التجميل... وعدة التجميل تلقى الواحدة شايلة ليها شنطة تكركب كلها... شي علب وشي فتايل وشي أقلام... ومُنضرة... وبنس... وفي جيب صغيروني تلقى ورقة أم خمسة جنيه وأم جنيه ورقتين ملفوفات في بعض وحديدة أم خمسين قرش... وجيب تاني صغيروني زيو تلقى فيهو صندوق لبان... وشريط بندول... ومناديل ورق مرة يكونن منديلين مكرفسات في بعضن واللا مطبقات غير طبيق الشركة... كل المعدات والأدوات والآليات دي... عشان السماحة... وعشان الواحدة تبقى سمحة في عين الراجل... والغريبة فيهن واحدات يقولن ليك الرجال يطيرو في القبل الأربعة... وهي تشيل وتتجلط وتتمسح عشان تعجبهم... وأحياناً المكياج يخليها زي المهرج وإنت تشوفها ما تعرف تضحك واللا تبرك في الواطا وتقعد تجعر وتبكي وتشيل لك هين تراب وتكبو فوق راسك. وشيش مشوه استعمال المواد الكيماوية في التّجميل عندها مخاطر كتيرة... ممكن واحدة تكون متعودة على الكريمات عشرات السنين... وفجأة منو وليها وشيها يضرب... وما يتعرف دا وشي واللا ضهر ايد... يتشوه الوشيش، العليهو الرك... ؛؛؛ استعمال المواد الكيماوية في التّجميل عندها مخاطر كتيرة... ممكن واحدة تكون متعودة عليها، وفجأة منو وليها وشيها يضرب... وما يتعرف دا وشي واللا ضهر ؛؛؛ وتقوم على المساسقة على الدكاترة... وقدر مافي وصفة تلقاها جلبطت بها وشيها... وتقول بس لو أرجع زي ما كنت أول... حب شباب نمش... جن أحمر... بس أرجع زي ما كنت... وبرضو فيهن واحدات القادرات وعندهن قريشات مزهجاتنهن واقعات في عمليات التجميل... تغيّر في النخرة... ترجّع اللضان لي ورا... تصوط في وشيها لمن يصبح عليها صباح... وتعاين في المرايا وتقول يا ربي البعاتية البتشبهني دي منو؟ وحات الله العوينات ديل ما غريبات علي؟ مرا خواجية اسمها جوسلين، راجلا اسمو "اليك ويلدنستين"... ملياردير أميركي، عندو قروش لا ليها حد ولا ليها عد بيريد الكدايس ريدة شديدة... محل ما تشوفو تلقاهو معاهو كديسة مرتو قالت اليك دا ما دام بيريد الكدايس كدي انا اتقلب كديسة عشان ترضيهو... ويتبسط منها. عملت عملية تجميل كلفتها أربعة ملايين دولار في النهاية بقت تشبه الكديسة بالظبطي والربطي الراجل طلقها... بعد ما اتقلبت كديسة. ؛؛؛ المرا دي إن اشترت وشي كديسة حق بلاستيك وأول ما الراجل يكوكو خشم الباب تلبس الوشي، وتلاقيهو الوشي كلو بي دولار واااحد.. وتوفر باقي القريشات ؛؛؛ دقسة امرأة لكن أظنها هي دقست تكون نست تسوي ليها ضنب... عشان هو يقتنع أنها كديسة كاملة غير منقوصة... بعد ما وشيها بقى يشبه الكديسة، لكن حسي قالو إتلقى شاب عرسها، بي دي كدوسيتا. مرا تدفع أربعة ملايين دولار عشان تتقلب كديسة وترضي راجلا! لكن بعد شوية ح يزهج من مصاقرة الكديسة القدامو دي.. ويطلقها برضو... غايتو مسيكينة اتقلبت كديسة ساكت وعشان ترجع زول تاني دايرة ليها أربعة مليون دولار أو أكتر... واللا ترضى بي نصيبتها دي.. وتحوم باقي عمرها وهو كديس حسي المرا دي إن اشترت وشي كديسة حق بلاستيك وأول ما الراجل يكوكو خشم الباب تلبس الوشي، وتلاقيهو الوشي كلو بي دولار واااحد... وتوفر باقي القريشات ويبقى وشيها الأصلي قاعد.. ما كان أخير لها... لكن يا قولة المقالة الشقي يعتر ليهو وشيهو. ؛؛؛ صيني، شاب وسيم، شاف واحدة صينية زيو، سمحة شديد.. حباها.. حبتو.. عرسو بعض، المرا حملت، وكل مرة تقول ليهو والله دايرة ولد يشبهك بس ؛؛؛العرق الصِّيني دساس صيني برضو، شاب وسيم، شاف واحدة صينية زيو.. سمحة سماحة شديدة.. حباها.. حبتو.. عرسو بعض.. المرا حملت.. وهو متابع معاها. وكل مرة تقول ليهو والله دايرة ولد يشبهك بس... وهو يقول ليها لا انا الداير بت تكون مقطوعة منك وفي سماحتك دي... المرا ولدت واتحلت بالسلامة.. وجابت بنية.. والأبو فرحان قطعاً البنية تشبه أمها في السماحة... البنية كانت شينة شنا مرة.. وهو يقول حسي عشان صغيرة لما تكبر بتبقى سمحة... والبنية كل ما يصبح صباح هي ماشة شينة... وشنا مرة... الراجل شك... فحص الحامض النووي للبنية لقاها فعلاً بنتو... عصر على الأم... وينقنق... في النهاية الام اعترفت أنها عملت عمليات تجميل كلفتها مئة ألف دولار أميركي... من دربو داك وعلى البوليص... ويفتح بلاغ في الأم... والمحكمة حكمت ليهو بي مئة وخمسين ألف دولار... ختاهن في جيبو.. وحرد البنية لي أمها.. وقال لها الكعوبية الجبتيها دي، إتبالي بيها إنتي... إنتي نان تسوي في عمليات التجميل وناسية إنو العرق دساس!
