كلب الهنا ياسر عبد الله (فى حادثة غير مسبوقة اقتحم كلب من فصيلة وولف المانى مدرب تدريباً بوليسياً قسم امن المجتمع بالخرطوم شرق مستسلماً ومسلماً نفسه للقناص الذى عاد للتو من حملة لابادة الكلاب الضالة استهدفت مربعات منطقة الرياض بالخرطوم فى الثامنة من صباح الأربعاءالماضي). هذه فقرة من خبر أوردته السوداني في عدد الخميس أمس الأول، الطريف في الخبر ان الكلب (الحنكوش) عندما إستغرب الشرطي(القناص) من تصرفه وخاطبه قائلاً: (تعال ياعريف) فتفاجأ بالكلب يمثل أمامه بذات طريقة الكلاب البوليسية، وبعد عدة مخاطبات مع الكلب توصل القناص الى ان الكلب مدرب تدريباً بوليسياً وأنه من نوع كلاب الوولف الالمانية القيمة فتمت مخاطبة وحدة الكلاب البوليسية ظناً بان الكلب يتبع لهم الا أن رد وحدة الكلاب البوليسية بالشرطة جاء صادماً ليؤكد بان الكلب لايتبع لها ما يشير الى ان الكلب ربما تملكه احدى العائلات الثرية بالمنطقة الا ان احداً لم يبلغ عن اختفاء كلبه حتى الان. الكلاب من فصيلة (وولف) الألمانية (غالية الثمن) وقد يتجاوز سعر الكلب (6) الآف جنيه، وطبعاً دا ما الموضوع، الأهم من ذلك ان غذاءه (مكلف جداً) وقد يتجاوز في اليوم (130) جنيهاً، لانو ببساطة ما بياكل من الشارع، ويتغذى على لحوم طازجة (علم والله)، وكمان (لو الصحن وسخان)، بعاين ليك باستخفاف وبديك (ضهرو)، ولازم تقوم بعمل نزهة ليهو (خارج المنزل) يومياً، ولابد ان يقيم في مكان (بارد) ونظيف، وله كرت صحي ويخضع لتطعيم دوري. والكلب الوولف ضخم جداً وشرس للغاية ، وتستخدمه الأسر الثرية في الحراسة،( يعني بجيب حقو ولو في حرامي تلب ( أن شاء الله حرامي القلوب ذاتو) في البيت الله قال بقولوا وربما تاب توبة نصوحة لانه بقطعوا حتة حتة ). يعني الكلب (زي دا) يكلف غذاؤه شهرياً نحو (3) الآف جنيه، (مرتب وزير عديل كدا)، وبعد دا يفترض انو الواحد لو قالوا ليهو يا (كلب) ما يزعل، اسع العيشة دي في زول لاقيها، لحوم طازجة يا مفتري وكيلو الضان ب(70) جنيها، والكلب المسكين السلم نفسو دا لو قعد ليهو اربعة يوم بس في قسم الشرطة ح يعمل عجز في ميزانية القسم لانو ما بياكل بوش ولا فول ولا سلطة دكوة، وقد يقول قائل اريتو حالنا بحال (الكلب الوولف) أو كما قال.