كتبنا من قبل عن العلاقة غير الودودة ما بين الفتيات و(التمباك)، وصعوبة قبول الفتاة بالارتباط برجل (متمبكاتي) إلا في حالة الضرورة القصوى- والضرورة القصوى هنا أن يكون قطار الزواج قد غادر محطات الفتاة بلا رجعة- لكن صديقي خيب كل احتمالاتي تلك حول الموضوع بعد أن روى لي حكايته العجيبة مع احدى الفتيات اللاتي غادر ذلك القطار محطتها منذ سنوات، حيث قال لي بغضب: (مشيت ليهم البيت عشان اتقدم...ابوها اداني ليها قبل ما اتكلم ذاتو...وأمها قالت لي ما دايرة منك لا توب لا ريحة انا دايرة لي راجل (تفتيحة)...صمت صديقي قليلاً قبل أن يواصل حكايته: (بصراحة وعشان اكون معاك (شفاف) البت شينة شديد والله..بس كمان انا قلت الشناة ما مشكلة..الكلام في الاخلاق..وخطبتها والمواضيع كلها كانت باسطة)...صمت صديقي مرة اخرى قبل أن يخرج كيس التمباك من جيبه و(يدردم) له سفة كاربة وضعها بعناية بين شفته العليا وجدار اللثة ثم يواصل: (اها يا زول بعد كم يوم كدا مرقنا نتفسح...وقعدنا في شارع النيل...والامور كلها كانت في السلك لحدي ما طلعت كيس التمباك من جيبي...في اللحظة ديك البت قعدت تكورك ودخلت في هستيريا عجيبة والناس إتلمت فينا...اها يا زول بعد ما راقت شوية كدا، سألتها عن الدراما العملتها دي...اتخيل قالت لي شنو..؟)...حاولت أن اتخيل لكن صديقي كعادته قاطع (حبال خيالاتي) وهو يواصل ضاحكاً: (قالت لي يا انا...يالتمباك)...سألته بسرعة: (اها..وانت اخترت شنو..؟)، نظر إلى في بلاهة قبل أن يقول بسخرية: (ياخي إختيار شنو...انا قلت ليها والله لو انتي مفروض يجيبوك كإعلان في اكياس التمباك بي شناتك دي)..!! وطبعاً عزيزي القارئ انت لست بحاجة لتعرف أن العرس (طرشق).!! (حدربي)...استنساخ (غير منطقي): الفنان الشاب عمر حدربي قال في تصريح صحفي امس إن اغنيات نادر خضر هي ملك للشعب السوداني كله، وتصريح ذلك الشاب منطقي، لكنه نسى أن يذكر انها ملك للشعب (وجدانياً) وليس (استهلاكياً)، والحديث هنا لحدربي نفسه الذي ظل منذ وفاة الراحل المقيم يردد اغنياته في الداخل والخارج، دون أن ينتبه إلى انه بطريقته تلك يحاول أن ينصب نفسه (نادراً جديداً) للفن السوداني وهو الشيء الذي نرفضه وبشدة، لأن الموضوع بهذا الشكل سيخرج عن اطار دائرة الوفاء وسيدخل في اطار (التكسب)، وأن يتكسب حدربي من ارث نادر الفني فذلك امر غير مقبول. عزيزي حدربي...اترك اغنيات نادر وشأنها...لا تبحْ لنفسك وللآخرين استهلاكها من منظور (الوفاء)، فزمان الوفاء ولَّى يا عزيزي، ولا مكان له في إعراب الواقع المعاش، وابحث عن شخصيتك الحقيقية وقدم نفسك من خلال (عمر حدربي)، وليس عبر (استنساخ) غير منطقي للراحل المقيم نادر خضر لأنه وببساطة غير قابل للاستنساخ...نتمنى أن تدرك رسالتنا هذي، ونتمنى الا نعود اليك مرة أخرى. لعناية القراء الكرام: رسائل عديدة وصلتني من قراء الزاوية الاكارم عبر الايميل الخاص والصفحة الرسمية بموقع الفيس بوك ، والغالبية العظمى منها يطالب بالتحدث عن عدد من الظواهر السالبة في المجتمع، من ضمنها استخدام مكبرات الصوت في الاسواق، وبيع الروائح المغشوشة للمواطنين، وسوء المواصلات العامة، ونعدهم بإذن الله أن نخصص لتلك القضايا مساحات واسعة خلال الايام القادمة..دمتم ودام تواصلكم معنا..تحياتي.
