*إذا رأيت أنياب الليث بارزة..(احتمال يكون عندو وجع ضرس). *أنا وأخوي على ابن عمي وأنا وابن عمي على (بقية الورثة). * أقلب القدرة على فمها.. (تطلع المره عين أبوك). *إذا كانت عندك حاجة عند الكلب..(شيلا منو وقول ليهو جرّ). *كتلوك...ولا (جوك ناس النفايات والعوائد). *الرجال ماتوا في (سوق الله اكبر). * كل التقول عليهو موسى...يطلع (كوسه). * زامر الحي (عدادو عشاء ساااااكت). * ليس الرجل من يقول كان ابي ولكن الرجل من (ساق الهمر). * القرش الابيض..اشتري (بيهو كفنك طوالي)..قبل الاسعار ما ترتفع..!!! * الجاتك في (ديمقراطيتك) سامحتك. * عينك (للحكومة)..تطعن ب(السيسي). * الباب البجيب (الضرائب)..لصق فيهو صورة (الرئيس). * (المكرفون) مدقوق..و(الفنان) في السوق. * الغالباهو (المعيشة) بيطرد (حماتو) من البيت. * التسويهو فلانة بالكريمات..تلقاهو في (وشها). * (لالوب) رجالنا..و لاعنب (ناس مهند). * بلدا ما فيها (ميسي) يقدل فيها (مهند الطاهر). * ماحكّ (جيبك)..مثل (طفلك). * مفطوم (اللحمة) ما بتسكتوا (موية الفول). * (الحافلات) تجقلب..والشكر ل(بصات الوالي). * تجري جري الوحوش..(غير ماهيتك) ما بتحوش. شربكة أخيرة: نعتذر للقراء الأكارم على ضيق المساحة وعدم نشر الكثير من الامثال، مع الوعد في اقرب فرصة مواصلة ما تبقى منها، (ما تخافوا..الامثال الزي دي في بلدنا ما بتنتهي كلو كلو)...تحياتي..