(التيار) الباب البجيب الريح قيل ان الشتارة وراثة.... تنتقل عبر الجينات في الاسرة الواحدة...وقلما تحدث طفرة يطلع واحد ما اشتر...لو داير تعرف انك في بيت ناس شتر او شتراء او اشترين.... اول حاجة من خشم الباب بتلقى كيس الزبالة مرمي علي جنبة..ونص الوسخ مشتت وكديستين يبحتن فيهو.. وربما يتشكلن....الباب تلقاهو عليهو بصمات الشفع الشتر... مسافة خمسين سنتم من الواطا اثار اليدين بتاعت الشفع وااااضحة وهي غير منتظمة مشتتة... متر ونص اثار ايدين الناس الكبار برضو...وربما تجد اثار ضرب بالحجار للباب عشان يفتحوهو... الترباس حقو بايظ.. والوكرة حالجة بدل ان تتحرك في محور ستين درجة تلقاها تتحرك في محور تلاتمائة وستين درجة...الترابيس والبيمسكن ضلفة الباب الفوق والتحت اكيد اكيد فيهم واحد ما قاعد يقفل كويس تفتح الباب وتدخل ما تقول السلام عليكم كويس تجيك كورة طائرة تضربك في عينك...الشفع يكونو بيلعبو في الحوش ومن الشتارة الكورة تضربك انت...وتدخل وانت خاتي ايدك فوق عينك المضروبة.. في الصيف تلقى العنقاريب مشتتة برضو في نص الحوش.... وكمية بتاعة نعلات مجدعة...بدون انتظام... غير الشرابات برضو.... ممكن تلقى فردة سفنجة تحتضن فردة جزمة وهن متكلات علي الحيطة....تدخل جوا على البرندة عشان تسلم تلقى اربعة نسوان شتر قاعدات يقومن والاربعة يمدن ايديهن في لحظة واحدة عشان يسلمّن... وانت ما تعرف تمد ايدك لي منو فيهن؟... بعد ما تحل معادلة السلام الصعبة دي.. يزحن كلهن وكل واحدة تقول لك تعال اقعد هنا.... من دوب ما قعدت كويس يجي شافع اشتر جاري يعتر في كراعك ويقع في الواطا...ويصرخ... يقومن الاربعة نسوان يتلافنو اتنين كل واحدة من ايد واتنين كل واحدة من كراع..وتسمع اللحن العاطفي بريييييي.. بريييييي.. برييييي...... من مجموعة عقد الجلاد دي وبصوت اشتر....تفوز احدهن بالشافع وتشيلو وترجع عشان تقعد في العنقريب تقعد في طرف العنقريب وما تقعد كويس تقع في الواطا هي والشافع... وينقلب اللحن الي( ووووب علي وووب علي).بعد ان تهدأ عاصفة وقعة الشافع تحت كرعيك يخيم علي المكان صمت اشتر وتتخللها مطايبة وسلام وسوال عن الاهل .....وانت قاعد يجيك صوت كباية وقعت واتكسرت من المتبخ فتعلم ان الشربات محمداك... تقوم واحدة من النسوان تجيب طربيزة طقطاقة وترزعها تحتك تلقى واحدة من كرعين الطربيزة وقعت فوق كراعك..تنط انت من عصرة كراع الطربيزة.... والطربيزة تتقلب.... وتقوم تصلحها انت كوقاية امنية. وعدم ثقة في تقدير من وضعتها بداية...تظهر من على البعد شابة شترا تحمل صينية صغيرة وفي نصها تجلس كباية شربات... تكركب من بعيد...وهي في طريقها اليك ... يعنر لها خيط غليظ مربوط بين عنقريبين رابطنو الشفع عشان يلعبو.... تتفنقل وتتشنقل الشابة وتطير الصينية وتطير معاها الكباية وتصلك وهي تحمل بقايا عصير كركدي... تلقاهو اشتت فوق وشيك ثم جلابيتك و من ثم نعلاتك... قفل الباب:-
أنت يا جنة حبي واشتياقي وجنوني أنت يا قبلة روحي وانطلاقي وشجوني أغداً تشرق أضواؤك في ليل عيوني آه من فرحة أحلامي ومن خوف ظنوني
