شاب استطاع أن يقدم خلال فترة وجيزة من ظهوره في الساحة الغنائية الشبابية مجموعة أعمال جديدة واشتهر بالاجتهاد والبحث عن الجديد دوماً.. كان من ضمن منظومة الأصوات التي قدمها برنامج (نجوم الغد) على قناة النيل الأزرق ثم عاود الظهور مرة أخرى على ذات الشاشة الاسبوع الفائت معلناً على تقدم ملحوظ شهدته تجربته الغنائية خلال السنوات القليلة الماضية. (الوطن) جالسته بهدوء وفتحت صدره لتحاوره في مضابط سريعة وجريئة عن تجربته في المدة الفائتة واستطاعت أن تخرج منه بالكثير من المعلومات.. ٭٭ الشاب رامي عبدالعظيم عرف الجمهور عليك؟ - أنا رامي عبدالعظيم أسكن الخرطوم امتداد ناصر وكنت ضمن دفعات برنامج (نجوم الغد).. ٭٭ بدأت المسيرة في هذا الدرب فهل ستواصل؟ - المسيرة دي عايز أتخصص فيها للنهاية.. والبدأ حاجة لازم يكملها.. أنا بحب الغناء وبعتبروا مشروعي الكبير وحلمي العايز أحققو.. ٭٭ أبناء جيلك من المغنين في نظرك؟ - هذا الجيل كويس.. فوجود فنان مثل محمود عبدالعزيز هو حالة فنية كبيرة.. وطه سليمان الذي استطاع فتح شباك للعالمية وخلى الناس بره تتلفت للغناء السوداني. ٭٭ أغنيات رامي واختياراته ؟ - أحاول اختيار الكلمات المتفردة واهتم بتفاصيل الأغنيات اختيار الكلام والالحان.. وبشوف الحاجة القربية من أذن المستمع السوداني وبتحل قضايا خاصة قضايا ومشاكل الشباب. ٭٭ هل انتم في هذا الجيل تعانون من مشكلة شعر وعدم وجود شعراء جيدين ؟ - مافي مشكلة شعراء لكن عندنا مشكلة مفردة رصينة وجميلة.. الناس بقت تكتب أي كلام بس.. وأنا أتعامل مع شعراء شباب متمكنين أمثال عمر سيد أحمد، مهدي مصطفى «دامبا» وغيرهم من شعراء هذا الجيل البقدرو يكتبوا كلمة رصينة.. ٭٭ رأيك في مسيرة الغناء السود اني الآن ؟ - نحن كغناء سوداني ما ماشين لي قدام والحال كلو واقف ومقفول. ٭٭ قاطعته مستفسراً: وماهو السبب في رأيك؟ - في ضعف إعلامي.. ونحن ناس بنخجل من حاجاتنا وما قادرين نقدمها ونطلعها للخارج وعودنا الناس البره انو حاجاتنا حقتنا بس.. وعشان كده مهما تطورنا سنظل في نظر الخارج متأخرين.. ٭٭ معنى هذا الحديث أننا لدينا عقدة؟ - نعم للأسف الفنان السوداني عندو عقدة نقص تجاه الآخر ٭٭ قاطعته مرة أخرى : وكيف نخرج للعالمية في رأيك؟ - في رأيي الفن السوداني يحتاج لزيادة عرض وإعلام ومشاكل الغناء كلها إعلامية ونحن ما بنطور غنانا ياهو الغنا ذاتو بنغنيهوا بنفس طريقتنا ومزيكتنا.. ٭٭ هل هناك تدني في الذوق العام للمستمع السوداني؟ - ايوه الذوق العام بقى متدني والناس بقت ما عايزة تسمع كلام سمح والبسمعوا ديل ناس بسيطين ما كتار. ٭٭ لماذا لا تكون المعضلة في الفنان وليس في الذوق العام؟ - ما أظن كده بس يمكن يكونوا الفنانين كسلانين شوية وده البدي الإحساس مرات بأننا كفنانين ذوقنا هابط لكن كمان في فنانين بغنوا أي كلام. ٭٭ قلت إن سبب محلية الغناء السوداني هو الإعلام؟ - الإعلام السوداني ضعيف بصفة عامة، وما بهتم بموضوع انو يطرح الغناء بره. ٭٭ طيب كيف ذلك وانت آخر الذين أخرجهم الإعلام للساحة عبر برنامج تلفزيوني؟ - برنامج (نجوم الغد) هو من البرامج الجيدة لكنو ما بديك المساحة الكافية عشان تعرض تجربتك.. ٭٭ الحديث كثير عن أن هناك ظلماً للأصوات في هذا البرنامج؟ - هذا حديث غير صحيح أنا كنت ضمن الدفعة 71 وكان في انصاف كامل.. وكلنا طلعنا راضين. ٭ هل يسير رامي عبدالعظيم على الطريق الصحيح لصنع تجربة كبيرة؟ - أنا في طريقي لأصنع تجربتي الخاصة ومجتهد في كده.. ٭٭ طموحك الغنائي؟ - أنا أحترم الجميع.. لكن طموحي ما بحصرو في حد معين.. عايز أكون فنان عالمي زي «محمد وردي» أو «مايكل جاكسون». ٭٭ هل انت محظوظ في ظهورك بهذه السرعة؟ - بتنهيدة طويلة : بسيط يا أخي.. حظي خدمني في حاجات ووقف تاني.. ٭٭ ختاماً؟ شكراً لصحيفة (الوطن) والتحية لكل الجمهور وخاصة جمهور رامي عبدالعظيم وكل الشعب السوداني بمناسبة عيد الاستقلال والعام الجديد.. وشكر خاص للصحفي حسن بربر ولك أيضاً يا أستاذ..