(التيار) الباب البجيب الريح الحنة زينة.... للمرا....وزينة قديمة قدم الانسان....قالوا زمان الفراعنة كانوا بيتحننوا.... يعني كيلوباترا ..كانت بتتحنن...وأظنها كانت بترسمها كمان الجن الجننتو الناس زمان دا ما جن جاي ساكت ،جن حنة...حتشبسوت قالوا برضو كانت بتتحنن..علا والله حنة حتشبسوت دي ما داخلة لي راسي..قولوا لي ليه؟... قلتو لي ليه؟...حتشبسوت دي في زمنها كانت ما عندها شغلة غير الحرب... تمرق من حرب تدخل في حرب تانية... وقت عشان تتحنن وتدخل ايديها وكرعيها في اكياس بلاستيك وتمدهن عشان ينشفن ما عندها..و صبرا ينشف الحنة ما عندها وما فايقة... برضو قالوا عشان هي مره الكهنة ما كانوا دايرنها تحكم،عشان تقنعهم، مرقت وملصت هدوم النسوان ولبست هدوم رجال وركبّت ليها دقن صناعية... ومرقت الشارع....وبرضو كانت تجيد فنون القتال... يعني زولة لبع وكسر وضفر.... ما زولة حنة ومنكير وبوديكير... والذي منه.... لكن برضو قالوا كانت بتتحنن...!.. الحنة جميلة مافي شك..وخاصة لما تكون في الشخص المناسب في البكان المناسب بالطريقة المناسبة... في نسوان الحنة فيهن تزيدهن سماحة..وفي واحدات تشوف الحنة في كراعها تقول المرا دي الظلطا شنو في كرعيها ديل؟...مذيعات التلفزيون بقن يتبارن الايام دي في الحنة..هن وضيفاتن.... الضيفات ما يقولو ليها تعالي لينا يوم الاربعاء الجاية...علا ومن دربها دا وعلي الحنانة.... اما المتفرجات القمحانات ما عندهن غير يقعدن يتفرجن ويعلقن علي التوب وعلي الحنة..والنضم الاساسي العشانو اتعمل البرنامج يدخل بالاضان دي ويمرق بالتانية....لو كنت حنانة لاستفدت من هده الثورة ،ثورة حنة نسوان التلفزيون واعلن عن رسمات للحنة تتماشى والبرنامج.... حنة نشرة الاخبار...حنة برنامج التبيخ... حنة برنامج بيتنا...حنة برنامج سهرة...حنة منقول من خارج الاستوديهات...والحفلات الخارجية.... اركّز على المذيعة وحركاتها في البرنامج وخصوصا حراكات ايديها.... اكتر حاجة بتكررها شنو؟،، بتخت الايد ياتا فوق التانية؟...بتحك طرف راسا متين؟... كم مرة في الساعة بتصلح سماعة الاضان.. وتعصرها لي جوا...؟....وتقعد كيف لما يكون في زول متصل على البرنامج من برا؟...قاعدة تطقطق اصابعيها... والا قاعدة تلويهن في بعض؟....بتجر التوب فوق راساها كم مرة؟....فيهن واحدات ترنع لي ورا عشان التوب يقع وترفعو تاني....وفيهن واحدات ممكن تكون لابسة باروكة وحريصة انو التوب ما يقع ويتكشف المستور.... تلقاها الحلقة كلها تجرجر في التوب...كما اضيف الي الحنة تمارين وكورسات سريعة لضيفات التلفزيون..... عشان توري الحنة...متين تتمحن.. وكيف تتمحن؟ ومتين تجر التوب.. ومتين ترميهو وخصوصا لما تقعد تضحك..تقرقر وتدنقر وبسرعة ترفع الراس والتوب ح يقع... تجرو تاني ... لكن جرة خفيفة في نص الراس بس.. عشان يقع تاني. وترفعو وهي توري الحنة... والبرنامج لو فيهو فنان وقام يغني.. تصفق معاهو كيف... يعني ما تشبح ايديها وتضربن في بعض زي شيالين اغاني الشايقية.....صفقة خفيفة وتراعي فيها ان تكون قفا الليد واضح عشان الحنة المرسومة في ضهر الليد. وممكن تقعد تقلب في ايدا مع الغنا في حركات توري فيها انها مستوعبة كلمات الغنية وانها اثرت فيها يعني لو الفنان قال (ليه؟....ليه؟) هي برضو تقول (ليه ؟ ليه؟)وتوضح ليه ليه دي بحركات اليد......لما الكميرا تقابلها ما تفوت الفرصة طوالي تمد ايدا وتجر توبا...مرة تحت لحدي الحنك ومرة فوق لحدي قفاها.....وربنا يسهل. قفل الباب:- إختفى صوتي فراجعت طبيبي في الخفاء . قال لي: ما فيك داء. حبسه في الصوت لا أكثر… أدعوك لأن تدعو عليها بالبقاء ! قَدَرٌ حكمته أنجتك من حكم (القضاء) حبسه الصوت ستعفيك من الحبس و تعفيك من الموت و تعفيك من الإرهاق ما بين هروبٍ و اختباء.