الخرطوم : الصيحة قالت نانسي عجاج لو لم اكن مطربة لاصبحت معلمة وكتبت منشورا على صفحتها قائلة : حسام : لو لم تكوني موسيقيةً ، ما هي المهنة التي كنت تودين ممارستها؟ نانسي : والله أنا كان عندي أمنيات كثيرة جداً واحدة منهم والأساسية – وما زالت عندي بالمناسبة – أنه أبقى أستاذة في فترات سابقة كنت بختار مواد معينة في مواد من أول ما بدأت أدرس كنت بحبها : اللغة الإنجليزية ، الكيمياء ، الأحياء أنا المواد دي كنت بحبها أنا امتحنت علمي أحياء أنا عموماً مهمة التدريس عاجباني وأقدرها جداً لأنه دي حاجة بتدخل جوا عصب كل حاجة . يعني الأستاذ ده هو الزول القاعد مع أطفالك واللي بيربي معاك وأكثر منك كمان . ممكن يتحول دوره لمجرد زول يلقن معلومات بطريقة صحيحة أو خطأ . أو ممكن يتحول إلى مُربيّ حقيقي . يعني التدريس بشمل التربية، فأنا بحبه . غير كونه تربية ومهمة خطيرة لأنك كأستاذ بتتعامل مع ناس متفتحين وشرهينللمعرفة وللأسئلة وللاكتشاف ولغيره . سواءً الأطفال أو الباحث عن المعرفة عموماً . في إيدك تحببهم المادة أو تنفرهم منها بالنسبة للأطفال فانت مشارك أساسي في عملية التربية وممكن تزرع قيم كتيرة وجميلة في التلاميذ ديل . أشياء ما موجودة في المنهج المدرسي دي حاجة محتاجة وعي وإبداع وخيال وطولة بال . يعني أنا بتذكر أنه في فترات دراسية محددة كرهت مواد، وحبيتها وجبت فيها أعلى الدرجات في مرحلة تانية ببساطة لأنه الأستاذ مختلف . يعني ممكن مستقبلك كله يضيع عشان الأستاذ الأستاذ ده ما حاجة ساهلة . بدون ترديد الشعر والكلام الجميل بتاع " قم للمعلم وفه التبجيلا "... وإيه وإيه، دي حاجة خطرة فأناأحبها وأحب إبداعها وأحب تحدياتها . حأحب أفكر كيف أوصل معلومة . زي ما بحب أوصل أغنية ❤️