وضع رئيس نادي كوبر ابا ذر عبد الباقي أبو كساوي النقاط على الحروف حول الظروف التي يمر بها النادي والعمل الذي يقوم به مجلس الإدارة.. ورد على الانتقادات التي تطالهم وكشف المثير في العديد من الملفات وذلك من خلال توضيح مطول نشرته الصفحة الرسمية لنادي كوبر بموقع التواصل الاجتماعي "فيسبوك" جاء فيه ما يلي: (الإخوة الأعضاء أهل كوبر الكرام) السلام وعليكم ورحمة الله في البدء ما كنت اريد ان اتحدث في بعض الامور الداخلية لولا كثرة الكلام والانتقادات الهدامة. أولاً من الجانب الفني دي رابع مباراة لكوبر وان شاء الله حانستعدل نعم انحنا ما سجلنا كويس ليه عشان مافي لعيبة في الساحة كلهم مفكوكين شهر 11 القادم، سجلنا بعض اللاعبين ولسه ما استلموا مستحقاتهم كاملة عندنا اصابات .. ما تخافوا على التيم.. الموسم الفات كان عندنا 8 نقاط فقط في الدورة الاولى والحمد لله ثبّتنا التيم بجدارة، وإن شاء الله ده الحايحصل الموسم ده. يا ناس كوبر لازم تعرفوا انحنا في مرحلة بتاعة تأسيس ودي مرحلة صعبة جدا لاجيال قادمة ولمن المرحلة دي تنتهي حانسلمكم النادي ده إن شاء الله ومعه مستندات الدخل والمنصرفات ونفسح المجال لآخرين وإن شاء الله حاتشكرونا عليها اتذكروا الكلام ده كويس.
الموسم الفات لمن مسكنا التيم ما في زول عاوز يمسكو.. وانحنا التيم ده قبلنا ادارته بعد إلحاح.شديد.. انا وسعد سليمان نائب الرئيس مشغولين ولدينا اعمالنا الخاصة وسياستنا بتختلف في تسيير النادي عن البقية، وكنا بندعم التيم من الخارج. لعلمكم لمن عملنا استلام وتسلم السنة الفاتت ماكان في اي مستند.. استلمناه عشان مايكون في محاسبة. دي حقائق الناس مفروض تعرفها وانا مسؤول عن ذلك. اللعيبة الصعّدوا التيم اغلبهم مشوا، وكان الباقي يومين للتسجيل عشان يقفل، ومعظم اللعيبة الكويسين الفي الساحة مشوا. وكما ذكرت لكم انا وسعد ما كنا عاوزين نمسك التيم الا بعد إلحاح من الإخوة في كوبر وتشاورات كتيرة.. مسكنا التيم ودي ضريبة كوبر علينا عشان ننهض بالنادي والتيم، كانت المهمة صعبة للغاية، لكن انحنا قدر المسؤولية إن شاء الله وضخينا حوالي 10 مليارات. أولاً سجلنا بعض اللعيبة الكانوا في الساحة وسيرنا النادي، وضخينا 20 مليار ثانياً. النادي صعد للممتاز الموسم الماضي ونشكر الادارة السابقة، لكن الحمد لله ثبّتنا النادي في الممتاز بمجهوداتنا والتوظيف الصحيح للمال وكنا قريببن من التمثيل الخارجي. دي واحدة من الإنجازات...بعض الناس بينتقدوا فينا نحن ما عا وزين شكر ... لو اي واحد سأل نفسه نحن لاقين شنو من وراء نادي كوبر عشان نسمع الكلام والانتقاد الهدام ده كله نقبل الانتقاد، لكن كمان ادونا حقنا. بالنسبة للاستثمارات: تشاورنا انا والاخ سعد ووصلنا للاستثمارات بأنه الحل للخروج من هذه الازمات المالية ولكي يعتمد النادي على نفسه لا الافراد. 1. أولاً استثمرنا وفتحنا عطاءً لعدد 8 دكاكين حديدة على سور النادي وده دخل زيادة لنادي كوبر عائده كاملا سوف يكون بعد فترة قصيرة. 2. تقليلا للصرف عملنا تعديلات على مباني النادي وعملنا فيها المعسكر.. عشان ما تدفع للمعسكرات خارج النادي وعملنا حمامات جديدة ومكيفات. 3. رفعنا الايجارات القديمة 4. اجرنا حوض السباحة والكافتيريا وصالة الجيم 5. والآن بنحاول نزيد ايجار الانتنا زين وسوداني في النادي الى 500 مليون في الشهر. 6. القطعتان امام مدينة كوبر الرياضية بنحاول نستثمرهما مع جهات مختلفة. 7. ولدينا استثمار جار الآن في الطابق الاول للنادي. العطاء فاتح. 8. استفدنا من سياج الخماسيات واضفنا عليها حديدا لعمل السور في الميدان الكبير بعلم وزارة الشباب والرياضة. 9. ضبطنا دخلا للنادي مع آليات الدخل والصرف.
نحن مسكنا النادي لعدة اغراض ونمشي إن شاء الله. أولاً عملنا استثمارات عشان مافي ادارة تاني تعاني وتعتمد على موارد النادي لا الأفراد. ثانيا ثبتنا نادي كوبر في الممتاز وده وضعه الطبيعي لكي نكون من الأندية المحترمة في منظومة الدوري الممتاز. السؤال هو، نادي كوبر كان لديه ميزانية شبه مفتوحة من جهات ذات صلة بالنادي على مر السنوات الماضية. لماذا لم تدعموا الرابطة والمال كان متوفرا وتطالبوننا بدعم الرابطة الآن.. نحن بنحاول نضبط قروش النادي الما معروفة ماشة وين. عُمر ادارة النادي 4 سنوات اذا منتخب واذا تعيين اقل من ذلك، وجدنا هنالك عقداً لمدة 10 سنوات للانتنا بتاعة النادي زين وسوداني و7 سنوات للطابق الأعلى دكان عصام والفرن؟ ايجار الدكان بجوار محمد طه من الباطن، وناس الفرن قاعدين في غرفة داخل النادي .. ده كلو شغل عشوائي.
انحنا كنا بنسكت على هذا واكتر، لكن كمان عاوزين يتكلموا في استثماراتنا من حر اموالنا لنادي كوبر، لازم الناس تعرف.. وننهي الفساد وعدم المحاسبة.. البيحصل الآن ده، ما اتعمل في نادي كوبر قبل كدا، مع انو في ميزانية شبه مفتوحة من جهات ذات صلة بالنادي لازم تعرفوا كان في فساد تقيل، وفي ناس كتيرة بعدوا عشان عاوزين الفائدة الشخصية. وعاوزين يطعنوا في الإدارة الحالية. مفروض اي زول في كوبر قلبه على النادي يكون معانا عشان نحن غرضنا بسيط نحمي النادي من النهب وعدم المحاسبة ونعمل نظام منصرفات ودخل للنادي. للأسف بعض الناس في نادي كوبر ما عاوزين نظام عشان ما يتحاسبوا. الناس البينتقدوا فينا نقد هدام ديل حاجة من الاثنين أ) ما عارفين الحاصل شنو. وممكن يسألوا عشان يعرفوا ب) او فاسدين وبيدعموا الفساد.. ما عندي ليها تفسير غير كدا.
ما معقول نادي زي نادي كوبر ما يكون فيهو دفاتر دخل ومنصرفات... يعني بالبلدي كدا لا بتعرف دخلت كم؟؟ ولا صرف كم؟؟ كثير من الناس هنا في كوبر ضدنا انا ما عارف ليه. نحن دفعنا للنادي حوالي 30 مليارا للآن (كان أولى بيها اولادنا) عشان نرجع حقوق النادي ونحمي النادي من النهب ومحاسبة الفاسدين. نحن كنا ماشين نهاية الموسم الفات بعد الإنجازات العملناها بس في حاجات ماكنا خلصناها زي ايجارات المدينة الرياضية. في شهر 4 المقبل إن شاء الله متوقع الدخل بتاع النادي يصل علي الاقل إلى 4 مليارات جنيه في الشهر، وعندما مسكنا النادي كان دخله حوالي 180 مليون في الشهر... ونحن عملنا ده كله في سنة واحدة وإن شاء الله الادارة البتجي بعدنا تحافظ عليه وتطور في النادي.. في الختام، اتمنى من ناس كوبر أن يدعموا فريقهم في الفترة القادمة، مع انه التيم معسكر في نادي كوبر، لكن ما في اي دعم يذكر الموسم ده.. في دعم من بعض الاخوة لكن بسيط جداً...
أباذر وسعد سليمان ماشين من النادي قريب بس بلاش التنظيرات والكلام المحبط.
