لمن تحاول تعمل ليك (مدخل) تلقائي كدا او روتيني الحكاية بتكون واضحة. زي شاعر كان في الجامعة ..وقف يقول لينا قصيدة ...ساعة قال لينا (مدخل) كلنا قمنا جاريين ..قلنا ليه (مدخلك) دا ما تفكوا براحة ..شنو فاكي لينا مدخل زي (عنقريب الجنازة).
مدخل ....قصيدة هي وإلا شقة.
دا مدخل ولا دفار الالزامية يا ود الناس.
مثلا تلاقى ليك زول بدون مناسبة ..تقول ليه اسمع انا شفتك وين قبل كدا.
وتقعدوا تشاوفو ...تشوف الاضان ..والنخرين ..وتقعد تنظر في (الجبهة).
لا لا ..الحاجات دي ما غريبة عليّ.
الاضان القاعدة براها دي ...شفتها قبل كدا...لاقتني في حتة...مرت عليّ.
الاضنين الزي لوري البرتكان.
حنك قديم خلاص ...وما فيه اي ابتكار او تجديد ..او نظرية.
الزول بس لمن ما يكون عندو موضوع بقول ليك : (انا شايفك وين؟).
العيون (الشتر) ديل لاقني في حتة قبل كدا...حلة كوارع ...صينية باسطة ...لا ..لا انا شفتها قبل كدا.
انت عيونك ديل كنت مخزنن في (المنطقة الصناعية)..وإلا كنت رافعن في (تنكر).
عيونك زي الاجازة البتقع في نص الاسبوع ..لا بتعرف تأكل بداية الاسبوع ..لا بتعرف تأكل نهاية الاسبوع.
لكن انا متأكد اني شفتك تقعد تعتذر ..وتكسر في التلج وتقول والله الذاكرة بقت كعبة تصور امس قابلت (الوالد) ..ما عرفتو إلا بالقميص الشادي مني.
اباء الزمن دا الواحد عادي جدا يدخل ليه في ( تي شيرتي) ويقعد اليوم كلو في (الفيس بوك)..الاب من الولد ما بتعرفو.
في الحلاقة ما بتفرزهم.
والحاجة الكبيرة ذاتها لو ما كنت عاوز منها (المصاريف) ما كنت بعرفها.
ناس خالد عندهم حبوبة اسمها (رهف)....قلت ليهم والله حبوبتكم دي زي (المازدا) المكنتها (تايوتا).
زي ورق السجائر.
او زي (الراكوبة) الفيها (نجفة).
او زي البامية المفروكة بالرغيف.
في حاجة غلط هي شنو ما عارفها.
الواحد بقى يطلع الصباح من البيت ..يرجع ما هو.
في لخبطة في الحتة دي.
تقعد للفطور ..تكتشف انو الوقت فات (دا غداء)...الكلام دا طبعا ما في رمضان.
المدام تقول ليك دا الغداء ...تقبل بالنظرية دي في نص الغداء ..تكتشف ليك صحن فول في الصينية ..تقول للمدام انت وقت الوجبة دي (غداء) جايبي لي (فول) مالك ...شنو الاستنكاح البتعملي فيه دا؟.
العلاقات نفسها بقت ضيعفة والذاكرة بقت (ليمونة) ما بتشيلها.
اقول ليكم حاجة ذاكرتي دي (5 في 2) بقت ما عندها ليها طريقة.
ما فى حتة.
اي حاجة ارسلها للذاكرة ..تقول لي الذاكرة امتلأت ...يجب مسح بعض البيانات.
قمت مسحت ليك شنو؟.
مسحت ليك (مسطبة) كاملة ..اي زول يلاقني ما اعرفو ..اقول دا اكيد من ناس المسطبة.
المشكلة في ناس بتمسح ساكت.
مرة واحد ...لاقي ليه زول (جديد) ، اول مرة ينزل الشارع...ثبتو ليك وقال ليه : (اسمع انا شايفك وين؟).
والله بي (ربطة جرجيرك) دا نحن اتلاقنا في حتة.
ما غريب عليّ.
يا زول انا اول مرة البس (الساعة) دي .....ما اظنك شفتني قبل كدا.
نشرة جوية شنو البجي فيها انا (مطرة)..انا النشرة الجوية في البيت ما قاعد احضرها تقول لي انت بتجي في النشرة الجوية..مشاهدة ساكت عندي فيها رأي.
عاوز تجيبني في النشرة الجوية ..انت عاوز ليك (صاقعة) تقع في رأسي دا.
بعدين ناس النشرة الجوية ديل ناس بنتظروا (المطرة) لمن تجي ..وتكسر البيوت ..والناس تغرق...يجوا بعد (السيول والفيضانات والامطار) دي يقول ليك بنتوقع تهطل امطار امس او اول امس.
هي هطلت وانتهت ..والجماعة لسع بتوقعوا.
تتوقعوا شنو هي مطرة وإلا كورة..غايتو عاملين ليك ارصاد جوي ساكت وقاعدين...انا ما عارف الارصاد دا عاملنو لي شنو؟.
ارصادكم دا (جدادة) ما برصيدها.
ارصادكم دا زي (الطبق) بتاع ناس خليفة ..يظبطوا ليك (قناة النيل الازرق)...يجيب ليهم (تلفزيون عطبرة).
يعدلوا ليك الطبق عشان يجيب ليهم مباراة القمة التى تجمع بين الهلال والمريخ ...يقوم الطبق (كتر خيرو) يجيب ليهم (الدافوري) الفوق.
طبق شغال على كيفو.
مرة قاعدين نحضر في (عثمان حسين)..فجأة الطبق جاب لينا (سيف الدين علي بتاع الرياضة).
قلنا دا شنو دا ؟...انتوا الطبق دا جنّ؟.
يوم الاثنين ..يجيب لينا برنامج الجمعة بتاع الرياضة في التلفزيون القومي ونحن بنعجبك ...نقعد نطقطق في اصابعنا.
حكاية (انا شايفك وين؟)..دي ذكرتني ليها الاحداث في المريخ الان.
ناس المريخ ديل بكامل قواهم العقلي ...عاوزين يقنعونا ان بطولة الظفرة دي بطولة.
تاني قاموا يعملوا لينا في نفس الحركات.
قطعوا ليهم حاجة من رأسهم وعاوزين يعملوها لينا (بطولة).
وعاوزين الناس تصدق مزاعمهم تلك.
زمان قبل الكهرباء ما تدخل البيوت ..وقبل الموبايلات ابو كاميرا ..المريخاب كانوا غاشين الناس بي بطولات وهمية كدا.
قالوا عليها بطولات جوية.
البطولة يعملوها في (مجمع جياد)..ويقولوا ليك دي بطولة جوية.
يجبوها بي (كارو)..ويقولوا (جوية).
زمان ما كان في وعي.
يعني الواحد عادي جدا كان تطقوا ليك (ملاريا)..يقوموا نسوان الحلة يقولوا ليه احسن حاجة للملاريا ..تشرب ليك موية نيم.
عندنا واحد ..قال ماشي تركيا ...ناس الحلة كلهم قالوا ليه عليك الله جيب لينا معاك من تركيا (حلومر)...والله تركيا دي قالوا ليك فيها (حلو مر وقمردين).
وكانوا كمان بدوه (الصور).
ما عارف علاقة الصور بالحلو مر شنو؟.
زمان كان الحاجات دي بتحصل ..البسافر كلو يقطعو ليك فيه (4) صور.
الزول وقت يكون عاوز يعرس ..الصيوان يدقو قبل (40) يوم ..تقول اول زول في الدنيا يعرس.
تكون عاوز تضبح ليك (عجل)..يقولوا ليك قبل (العجل) احسن تضبح ليك (حمل).
تجيب (الحمل)..يقولوا ليك حمل واحد ما بمرقك.
اها الوقت داك ..المريخاب غشوا ليك الناس بالبطولات الجوية.
هسع من الكهربة دخلت ...والعالم اتفتح ..وبقى في (ديجتال)..شفتوا ليكم المريخ دا جاب ليه بطولة.
بطولة الممتاز يا الله بشيلها.
المريخاب الايامات دي الظاهر ظهر ليهم فقر (لوردات)..قاموا قالوا احسن (نغزل) لينا بطولة (وهمية) كدا ونجيبها.
الجماعة لاقين الناس مشغولين بالعيد ...عاوزين يقنعوا ليك الامة دي بي بطولة وهمية كدا في الامارات.
بطولات (العقالات)...والريالات.
هرتهم دي عاوزين يقنعونا بي انها (اسد).
قاموا رفعوا ليها الصوت.
غيروا للكديسة (النغمة).
وعملوا ليها (كفر) جديد.
الحكاية دي بذكرني ليك بي (عثمان ود الشالي).
عثمان ود الشالي دا ..زوجتو قالت ليه إلا تجيب لينا (خروف).
وعثمان ود الشالي ظروفو ما بتسمح بالخروف.
ما عندو قدرة الكلام دا.
قام عمل شنو؟.
جاب ليه (ديك)..وركب ليك فيه (اريل) خروف.
اريل خروف يعني (قرن)..وساق الديك ومشى على زوجتو.
زوجتو قالت ليه يا عثمان ود الشالي (الخروف) المخلقن دا جبتو لينا من وين؟.
عثمان ود الشالي زول صعب ..قال ليها يا ولية ..مخلقن ما مخلقن دي ما قضيتي ..انت قلت عاوزة (خروف) وانا جبت ليك (خروف).
بعدين يا ولية انت ما عارفة (خرفان) الزمن دا بقت كدا.
الولية قالت ليه لو الخرفان بقت كدا ...الديوك بقت كيف يا راجل.
عثمان ود الشالي قال ليها ديوك شنو؟...الديوك دي انقرضت عديل كدا ..هسع من (20) سنة كدا ..سمعت ليك ديك بعوعي.
الموضوع دا انتهى زمان مع التكنلوجيا.
عثمان ود الشالي قبل ما يكمل كلامو (الديك) الجابو قام يعوعي..(المرا) قالت ليه سجمي خروفك الجبتو قعد يعوعي.
ود الشالي عاين للديك كدا ...وقال ليها الظروف الاقتصادية الصعبة التى مرت بها البلاد ..خلت (الخروف) دا بدل ما يقول (باع)..يقول (كاك).
والله (الخروف) دا لو ما ضهرو قوى ...كان اشتغل ليك (هزاز) عديل كدا ..احمدي الله ساكت انو فيه صوت.
ملحوظة : عشان كدا خلوها مستورة يا مريخاب.
هوامش
ناس المريخ وقت رمضان يسخن معاهم بعملوا ليهم (بطولة) خارجية.
ويقوموا يكسروا ليها (تلج).
الشغل دا ...شغل جرسة من رمضان ساكت.
الهلال بسبب الوزير بقى زي (الاوقاف).
ما معروف الهلال ماشي على وين؟.
والسبب الوزير.
الوزير ما عندو قدرة قانوينة ليعلن من خلالها لجنة تسيير ...والوزير في نفس الوقت ما عندو شجاعة كافية يعلن فيها استمرار مجلس الهلال الشرعي.
لذلك استقرار الهلال اصبح بسبب الوزير في مهب الريح.
بطولة الممتاز سوف تنطلق يوم 20 اغسطس ...ويوم 13 اغسطس سوف يلعب الهلال امام الاهلي شندي في مباراة صعبة.
والامور في الهلال الي الان ما واضحة.
البركة في السادة وصلاح محمد آدم ..الشغالين في هذه الظروف الصعبة.
لمصلحة من ..تترك الامور في الهلال على هذا النحو.
انظروا الي المستفيد من هذه الاوضاع ...سوف تجدوا الاجابة.
كل الاندية الان في مسكرات ...الهلال بدون مجلس ..بسبب الارهاصات التى اطلقها الوزير.
في كل يوم اقرأ خبر عن ان الوزير سوف يعلن عن لجنة التسيير خلال 48 ساعة.
وحتى الان مضت كمية من ال (48) ساعة ..وما في اي حاجة.
وضل مجلس ..ولا لجنة تسيير.
الهلال لحمو مر.
وما في حاجة بتمشي في الهلال غير القانون والديقراطية ...والانتخابات.
عشان كدا الوزير الان في ورطة.
ومجلس الهلال تبقى له 3 شهور فقط.
لو اكمل البرير فترته ..لكان ذلك افضل للهلال ...وللسودان.
غايتو (الفيفا)...واقفة على الهبشة.
بالمناسبة المنتخب طلع من كل التصفيات ..والهلال والمريخ برة المنافسة ...والاتحاد العام ما عندو اي دور ...لذا فان (تجميد) الفيفا للسودان ..افضل من هذه (الفوضي)..ومن هذا التدخل الغريب من السلطة.
الهلال وضع الوزير في مطب صعب.
الوزير يبحث الان عن مخرج.
لا سيما وان قيادات عليا في مقدمتها رئيس الجمهورية ..ورئيس المجلس التشريعي لولاية الخرطوم ..رفضوا تدخل الوزير ..واكدوا على اهلية الحركة الرياضية.
على العموم هذه الاوضاع الضبابية ..الخاسر الوحيد فيها الهلال.
يبدو انهم يبحثون فقط عن اضعاف الهلال ..وتفتيته.
لا يعقل ألا يصرف لاعبي الهلال مرتباتهم الي الان ...والعيد باقى ليه 72 ساعة.
دا كلام يا جماعة.
ولا احد يسأل من هذا غير الوزير.
يا سيادة الوزير ..شوفوا المطرة عملت شنو؟..الهلال خلوه ..عندو رجال بحموه.
